Isrel 6 - V'nen P'as iv'i Turanien Trtarep' m'a Turanien M'dah

Pavlev' v'nen p'as ipahua mau, ipaviviln a m'ertu lil

¹ Sena si lera p'vln pla v'nen p'asan a Kristu kavlev' v'nen kinkin ipahua mau ipaviviln a m'ertu atvlilil sarei. Nkavhlur nakalamu arna nki ml ntvdren sarei ip'tir. Nakalamu lera iv'i ti p'vvav nld kavln parei la ulien nen iv'i m'ien ha, kavv'ah Atua.

² Iv'i v'nen ivrur paptais kinkin, kav'i v'nen na ti apavtu lm'a natei arna m'ertu, kav'i v'nen ivrur ti m'ertu apavthal ml arna m'ien, kav'i v'nen na ti Atua ipav'ana m'a m'ertu udlani katu ulien viviln anr ikahiris naran.

³ Aau, p'van si lera, ipavr ti Atua ipam'ahu ani.

⁴ V'eti m'ertu udlani la avln v'nen p'as hara, akavm'alet ml. Sena ti atvla sera nut renan Atua. Atvrn sera sei Atua ituvn a m'ertu, katvp'lt sarei arna parian a M'im'iln P'as.

⁵ Katvrn sera v'nen p'asan Atua m'a pari lil na v'anuan Atua, la ipama uam ha.

⁶ V'eti ipavr ti hir apavrars kavln Atua, akavvav nlr ml kavrn istu sena si stuar, inep'a nut avani itauamu inap'ei, sena ti avtau a Natn Atua arna su lamu ml, kavani ti m'ertu avsip'lani.

⁷ Sena ti naran nu iu, nadep' im'ni katu navan imhmah a m'ertu avan pitvet, laha Atua imhmah a nadep' lera.

⁸ V'eti ipavr ti nadep' lera navan ipav'i lu makau m'a hrhrid, nadep' lera iap'as a si ki ipamk, nut pa ti Atua iputakm ani. Dav'a dav'a nava nadep' lera, la istu ha, apali ipahapu.

Nvrndu mamh ti kam'i kvp'as kavsiv' si lera

⁹ Tv'alk nvlap'as a kam'i, nvvri inap'i lera, v'eti nvrndu mamh ti kam'i kvp'as kavsiv' si lera, kavrndu ti p'klm'i iv'iv'en ti Atua ipalev'la kam'i.

¹⁰ Sena ti Atua ianep'a m'ertu stu ti ipavnapn a pari p'as kvani. Hin ikavnapn a parei na vtmien kvv'iv'ani arna nahan arna silv'ienam'i, ti kvmhmah a m'ertuan, kavmhmah anr uam ier hilaha.

¹¹ V'eti nvrn ti kam'i udlani pavm'akar ani ipahua uam, kavuada mamh turanienan Atua dav'a ipaier naran pavram'a.

¹² A ti kam'i mkavrn np'm'i aranan, v'eti pavsapa m'ertu la avp'tir arna v'ahienar ha, kavtrah turanienan Atua ip'arei, kavlav'i.

Atua ikavav v'ahienan naran kinkin

¹³ Sena ti naran Atua itu turanienan an a Epraham, Hin ituran ani kavrdaui arna nahan uaki, sena ti iarndu ti ipaturan ani kavrdaui arna naha m'ertu kinkin ilil aranan, kavr ti a,

¹⁴ “Nvrdaui, p'emhmah anh mau dav'a dav'a, kani ti nl nam'elam ipastudau.”

¹⁵ Laha, hin ilaksrah turanien lera dav'a, kalav'i.

¹⁶ Sena ti m'ertu avturan sei kavvrdaui arna nahar m'ertu ilil kasiv'r. Laha, naran avvrdaui inap'i lera, avv'ah ti v'lv'elien udlani ipahiris.

¹⁷ Atua irn ti ipav'iv'ani ihua ti ikavav v'ahienan naran kinkin. Sena si lera, itu turanien anr m'ertu apavlev' turanienan, kavri ml kavrdaui.

¹⁸ Sei iru lera, akavavdri, Atua ikahap'il ani. Sena si lera, nakd, la nvruh kavrama asn a Iesu ha, p'vp'tir ipahua, kavuada turanienan, la Atua itaui arna nahd ha, kavtrahi.

¹⁹ Turanien lera, la nvtrahi ha, iuada silv'ienad ihua, ikamln, inep'a nut aka na nauak iuada nauak inap'ei, kani ti nvrav'a eim al Nutet na Nutet, la kalik lil itukari ha.

²⁰ A Iesu, Hin itauamu a nakd kadav'a eim al nutet lera, kadama kav'i Pris Lil dav'a ikahiris naran, kalak arna nl nam'elan a Melkisetek.