Isrel 5 - V'nen P'as iv'i Turanien Trtarep' m'a Turanien M'dah

Pris lil ipav'i dui Atua itaui

¹ Pris lilil udlani p'sev', la Atua iv'lai arna p't nut na m'ertu ha, Hin itaui a ti ipav'i v'nenar m'ertu arna sian Atua, a ti ipatu uvrin kan sakrivais sena si stu.

² Hin irndu ti iparn istu sena m'ertu ahavrndu sei, m'er m'ertu avluvn a v'nen huan Atua, sena ti hin iahua inap'ar.

³ Sena si lera irn ti hin iparp si slm sena si stuar m'ertu uraur m'a sena si stuan.

⁴ V'eti m'ertu kinkin ikaua pari p'as lera sena ti hin irni uaki. Ikahei. M'ertu uaki Atua iv'ara ani irndu ti ipani, inep'a nut Atua iv'ara an a Erun inap'ei.

A Kristu iv'i Pris Lil dav'a ikahiris naran

⁵ A Kristu inap'i lera. Hin iahani ti nahan ipav'a eia a ti ipav'i Pris Lil, v'eti Atua iani, kavr ani, kavr ti a, “Nakm kv'i a Natk, dika kiak asnk.”

⁶ Ivri inap'i lera ml arna Paivul arna nut uraur, kavr ti a, “Nakm kv'i pris dav'a ikahiris naran, kalak arna nl nam'elan a Melkisetek.”

⁷ Tituei, naran a Iesu ilak arna p'akn arna nadep' ka, itu tamat kamiman an Atua kav'ara eia ihua katakal asn Atua, la irndu ti ipalev'lei arna m'ien ha. Laha, Atua irn tamatan sena ti v'ahienan iter a nadep'.

⁸ Hin iv'i a Natn Atua, v'eti irn istu arna p'akn a ti iparndu ti ipasapa v'nenan Atua.

⁹ Laha, kadama kaviviln udlani arna parian a ti ipav'i M'ertu ipalev'la m'ertu udlani la avsapei ha, dav'a ikahiris naran.

¹⁰ Atua iv'ara ani a ti ipav'i Pris Lil kalak arna nl nam'elan a Melkisetek.

¹¹ Nvrn ti p'vvrur aulera ipastudau. V'nen lera ihua a ti kam'i pavv'rn ani, sena ti ptm'i ima kadadv.

V'ahienar inep'a v'ahiena mardel inunu uaki

¹² Ktvier sera naran na ti pavv'i tisa, v'eti irn ti m'ertu kinkin ipav'iv'en pla v'nen p'asan Atua a kam'i ml. Kam'i kvrn m'ilik uaki, kdavhua a ti pavhan tim'ah dau.

¹³ Sena ti m'ertu udlani im'n m'ilik idarndu mamh v'nen p'asan Atua, sena ti idv'i mardel pa uaki.

¹⁴ V'eti m'ertu avhan tim'ah hua avv'i m'ertu atvlil sarei. M'ertu lera v'ahienar ihua a ti apavrndu v'ata iv'i si p'as, v'ata iv'i si stu.