Isrel 3 - V'nen P'as iv'i Turanien Trtarep' m'a Turanien M'dah

A Iesu ilil mau kasiv' a Musis

¹ Sena si lera, tv'alk p'as, la Atua ilak eia iv'ara a kam'i ha, a ti pavp'lt m'er m'ertuan ha, nrn ti pavv'ahur a Kristu Iesu, la nvv'ahi ha, iv'i Apusel, kav'i Pris Lil.

² Hin iuada mamh parei Atua itau ani, inep'a nut a Musis iuada mamh parian inap'ei, al nmahan.

³ Sena ti Atua irn ti naha Dui lera ipav'a eia kasiv' nahan a Musis, sena ti m'ertu la ihl nmah ha ilil mau kasiv' nmah ihli.

⁴ Sena ti nmah udlani m'ertu kinkin ihli, v'eti M'ertu la ihl si udlani ha, iv'i Atua.

⁵ Nvrdaui, a Musis iuada mamh parei udlani al nmahan, kav'i dui na m'akarien kav'iv'en sei apavrp'ep'ei ipatauatah.

⁶ V'eti a Kristu iv'i a Natn Atua kap'aur nmahan. Nakd nvv'i nmahan lera, ipavr ti p'vuada mamh turanienan Atua, kavp'tir aranan kavrn ip'as sena ti p'vtrah turanienan ipama katu hin, dav'a dav'a ier naran p'vram'a.

Pavuada v'ahien p'as dav'a ipaier naran pavram'a

⁷ Sena si lera M'im'iln P'as ivr ti a, “Dika, ipavr ti pavrn drln Atua,

⁸ Mavan nlm'i ipahua, ipanep'a naran m'ertu a Isrel avani ti Atua nln irer anr naran iendinar arna nut kaka.

⁹ Arna naran lera a tetiam'i avandina Kana istudau, kavla p'klk, kavla pariak pai inelv'a (40).

¹⁰ Laha, nlk irer anr udlani avsilv' arna naran lera. Laha, nvr ti a, ‘Avln navanel p'as arna nlr iel. Ahavrndau alak.’

¹¹ Sena si lera ntu v'nen arna nl rerak, kavr ti a, ‘Akavier nut Kana nrnrn Kana.’ ”

¹² Tv'alk, pavv'ahur kam'i, imahei ti kam'i kinkin nlm'i ipastu a ti mkavv'ah Atua, laha pavruh asn Atua, la isilv' ha.

¹³ V'eti kam'i pavv'ana m'a kam'i arna napn udlani, naran kvvr ti iv'i dika uam, a ti pavp'tir. Imahei ti kam'i kinkin nlm'i ipama kahua sena ti si stu ipahap'il m'a kam'i.

¹⁴ Sena ti Atua iani ti nvrama kavp'lt m'ei a Kristu, ipavr ti p'vuada v'ahien p'as dav'a ipaier naran p'vram'a.

¹⁵ Sena ti Paivul ivr ti a, “Dika, ipavr ti pavrn drln Atua, mavan nlm'i ipahua, ipanep'a naran m'ertu a Isrel avani ti Atua nln irer anr.”

Atua nln irer anr m'ertu udlani avruh a Itsip m'ei a Musis

¹⁶ ?Sena ti hir ak, la naran avrni ha, avani ti Atua nln irer? Avv'i hir udlani la avruh a Itsip m'ei a Musis ha.

¹⁷ ?V'eti Atua nln irer anr hir ak pai inelv'a? (40) Avv'i hir la avan si stu ha, la p'akr avrars al nut kaka ha.

¹⁸ ?Laha, itu v'nen anr hir ak, a ti akavier nut Atua irnrn Hin? Ivr anr m'ertu ahavv'ahi.

¹⁹ Sena si lera, nvla ti ahavrndu ti apavier nut lera, sena ti ahavv'ahi.