Isrel 2 - V'nen P'as iv'i Turanien Trtarep' m'a Turanien M'dah

Mavln v'nen p'as na ti Atua ipalev'la nakd

¹ Sena si lera, irn ti p'vv'ahur mamh v'nen ntvrn sarei, imahei ti p'vuasmni naran kinkin.

² Tituei, v'nen la ensel avvri ha ip'tir ihua. M'ertu udlani la avluvn a v'nenar v'aha ahavsapei ha, Atua itu ulienan anr sanan.

³ A Mlin Lilad ivrp'ep'adina v'nen p'as na ti ipalev'la nakd. M'ertu avrn v'nenan avvrp'ep'ei a nakd ti iv'i v'nen dau. Parei lera na ti ipalev'la nakd ilil istudau. ?Sena si lera, p'vruh asn nl reran a Mlin Eia ipanap'i, ipavr ti navv'ahuri?

⁴ Atua iv'iv'en ti v'nenar iv'i v'nen dau katu pari lilil anr sanan, m'a sei m'ertu apavtah ani, katu sia M'im'iln P'as anr inep'a nut hin uaki irni inap'ei.

Atua iani ti a Natn ima kalak a nv'r ensel

⁵ Sena ti Atua iatu nadep' ipama ml, la nvruri ha, a nv'r ensel.

⁶ V'eti m'ertu iamk ivrp'ep'ei arna nut kinkin arna Paivul, kavr ti a, “?M'ertu iv'i ak, a ti Nakm kv'ahuri, v'aha net m'ertu iv'i ak, a ti Nakm kma asnn?

⁷ Nakm kani ti iv'a a nadep' kanep'a sera ensel. Nakm ktu manu p'asan a mlin aranan m'a si p'sp'asan, kani ti nahan iv'a eia, kani ti ip'aur si udlani Nakm kani.

⁸ Nakm ktu si udlani a nv' tln.” Aau, naran Atua itaui ti m'ertu ipap'aur si udlani, ialn si kinkin a ti iahter a nv'n. V'eti hilaha, ndavla ti si udlani iter a nv'n.

⁹ V'eti nvlei a Iesu, la Atua iani ti iv'a a nadep' kanep'a sera ensel ha, a ti, arna vtmienan Atua, Hin ipam'a sena m'ertu udlani. Laha, Atua itu manu p'asan a mlin aranan, m'a si p'sp'asan, kani ti nahan iv'a eia, sena ti irn istu arna p'akn, kadam'a.

Atua irn ti ipav'av'ar a natn istudau apavrama arna si p'sp'asan

¹⁰ Atua la ien si udlani, kav'i pla si udlani ha, irn ti ipav'av'ar a natn istudau a ti apavlak arna si p'sp'asan. Sena si lera, iviviln a ti ipani ti Mlinar, la ipalev'lar ha, ipama kaviviln udlani a pari lera, arna der.

¹¹ Sena ti Hin la iani ti avrama kavp'as ha, m'er hir la avrama kavp'as ha, a Tetiar iamk uaki. Sena si lera, a Iesu iamamih a ti ipavr tv'aln anr, kavr ti a,

¹² “Kana p'evrp'ep'a naham asnr tv'alk, kahai kapatah a p't nut na sas udlani.”

¹³ Kavri ml, kavr ti a, “Kana p'ev'ahi.” Kavri ml, kavr ti a, “Pavlei, Kana ra, m'er a natk Atua itu Kana.”

¹⁴ A natn lera avua p'ak m'ertu m'a di m'ertu uaki. Sena si lera, Hin a Iesu, iua p'ak m'ertu m'a di m'ertu inap'i lera, a ti Hin, arna m'ienen, iputakm a nut huan a Sitan, la nut hua m'ien iter asnn ha.

¹⁵ Kalev'la m'ertu, la a Sitan ihudar arna silv'ienar udlani ha, sena ti avdedrn a m'ien.

¹⁶ Nvrdaui, a Iesu iahma a ti ipamhmah anr ensel, v'eti sena ti ipamhmah anr a natn Epraham.

¹⁷ Sena si lera, iviviln a ti ipama kanep'a tv'aln arna si udlani, a ti ipama kav'i Pris lil, karn istu anr, kauada mamh parian a ti ipakasr nl reran Atua kulla si stuar m'ertu a din.

¹⁸ Hin irndu ti ipamhmah a m'ertu der iarr, sena ti Hin irn istu naran der iari.