Isrel 13 - V'nen P'as iv'i Turanien Trtarep' m'a Turanien M'dah

P'klr m'ertu avv'i Kristin

¹ Kam'i pavlap'sp'as a kam'i nakl.

² Mavvnapn a ti pavlev' v'anudl, sena ti m'ertu kinkin avlev' ensel inap'i lera, v'eti ahavrndaui.

³ Pavv'ahur m'ertu avp'resin, ipanep'a ti kam'i kvp'resin m'er, kavv'ahur m'ertu der iarr, sena ti kam'i kvlak arna p'akm'i inap'ar.

⁴ Kam'i udlani pavv'ah ti m'arit iv'i si p'as. Dui imam'atr m'a tav'et uraur, tav'et imam'atr m'a dui uraur. V'eti Atua iputakm a dui ien si stu m'a tav'et, kutakm a tav'et ien si stu m'a dui, kutakm a dui iv'nah tav'et m'a tav'et iv'nah dui.

⁵ Kam'i mavsapa p'kl ti pavrn nam'er a sia tv'elm'i, v'eti pavrn ip'as uaki arna sei iv'i nkam'i. Sena ti Atua ivr ti a, “Kana nkalnh naran kinkin, v'aha karuh asnm naran kinkin.”

⁶ Sena si lera, nakd nvrndu ti p'vvri ipahua, kavvr ti a, “A Mlin Eia isr lm'ak, kana nkadedrn. ?M'ertu ipan v'ata a kana?”

Pavv'ahur m'ertu avp'aur kam'i kavvrp'ep'a v'nenan Atua a kam'i

⁷ Pavv'ahur m'ertu avp'aur kam'i kavvrp'ep'a v'nenan Atua a kam'i. Pavsapa v'ahien p'asar, kavv'ahur nava p'klr.

⁸ A Iesu Kristu inap'amk iel nanv', dika, dav'a dav'a ikahiris naran.

⁹ Mavm'ahu a ti apavrv' kam'i a ti pavsapa v'nen istudau iururaur nakl. Sena ti ip'as a ti nld ipap'tir arna vtmienan Atua, nld imap'tir arna tim'ah kinkin, sena ti si lera iamhmah a m'ertu avv'ahur sei inap'i lera.

¹⁰ Nakd nviak a nev'etet. Dui udlani avan paria pris arna nmah kanuis na tamatan Atua ahavviviln a ti apavp'lt m'a nakd kavhan sakrivais avani arna nev'etetad.

¹¹ Sena ti pris lil ilev' di si slm kauirv'a al nutet sena si stu. Laha, avel p'ak si slm lera av'aran na v'anu.

¹² Sena si lera, a Iesu irn istu arna p'akn av'aran na v'anu, a ti ipamhmah a m'ertuan a din.

¹³ Sena si lera nakd p'vrav'a asnn, av'aran na v'anu, kavua mamihienan.

¹⁴ Sena ti nakd naviak a v'anuad atlaha ipater ipel, v'eti nvtala a v'anu iamk ipama.

¹⁵ Sena si lera, nakd p'van sakrivais iel asn Atua aranan a Iesu naran nvpatei, iv'i nava pnd, naran nvpata nahan.

¹⁶ V'eti mavnapn ani a ti pavan si p'as kavmhmah a tv'elm'i arna siam'i, sena ti Atua irn ip'as istudau naran avan sakrivais inap'i lera asnn.

¹⁷ Pavsapa v'nenar m'ertu avp'aur kam'i, kavlak a nv'r sena ti hir avp'aur m'im'ilm'i. Sena ti hir akvvrp'ep'a nut avan pariar inap'ei pr. Ip'as a ti apavrn ipap'as arna pariar, amavrn istu, sena ti ki lera ikamhmah a kam'i.

Pavtu tamat sena kam'em'

¹⁸ Pavtu tamat sena kam'em', sena ti nvrndu ti nlm'em' iav'ana hua m'a kam'em', kavrn ti p'vsapa navanel viviln arna si udlani.

¹⁹ V'eti nmiman a kam'i ihua mau a ti pavan si lera, a ti p'em'alet ipalahml mau asnm'i.

Vtmienan Atua ipater asm'i

²⁰ Atua iv'i Atua na tamat. Hin iani ti a Mlin Lilad a Iesu ithal ml arna m'ien, sena di na turanienan ikahiris naran. Hin a Iesu iv'i Dui Lil ip'aur sivsiv.

²¹ Nrn ti Atua lera ipani ti pavp'as arna pariam'i udlani, a ti pavan sei Hin irni, kam'akar a nlm'i arna sei Hin irn ip'as ani, aranan a Iesu Kristu. P'vani ti nahan ipav'a eia dav'a dav'a ikahiris naran, Amen.

²² Tv'alk, nmiman a kam'i ihua, a ti pavv'rn mamh a v'nen nvr a kam'i, sena ti nulul a ruplet laha asnm'i, v'nenan iap'arei.

²³ Nrn ti kam'i pavrndu ti a Timuti ialak ml al p'resin. Ipavr ti ipama ipalahml, kam'em' m'ei p'erla kam'i.

²⁴ Nrn ti pavvr ip'as anr m'ertu udlani avp'aur kam'i, m'er m'ertuan Atua udlani. M'ertuan Atua udlani avlak a Itali avvr ip'as a kam'i.

²⁵ Nrn ti vtmienan Atua ipater asnm'i. Amen.