Isrel 12 - V'nen P'as iv'i Turanien Trtarep' m'a Turanien M'dah

A Iesu iv'i pla v'ahien p'asad dav'a kahiris ani

¹ ?Inap'i asnd? M'ertu istudau lera avlaktalu a nakd inep'a p'knaran imlden nakd, kavv'iv'en p'klr m'ertu avv'ah Atua. Sena si lera, nakd p'vln si udlani itukar nakd kavsapei a Iesu. Kavln si stu, la irndu ti ipauada nakd ha, kavvrvr arna navanel na vrvrien iter arna nahd.

² P'vp'ei a Iesu, iv'i pla v'ahien p'asad dav'a kahiris ani. Naran Hin ier naran na ti ipam'a arna su lamu, iav'ahur mamihien nen, v'eti iv'ahur si p'sp'as ipama ipatauatah. Hilaha, ilak arna m'ldaun Atua, la ilak arna napl p'asan a mlin ha.

A Mlin Eia irp m'ertu udlani ilap'as anr

³ Kam'i pavv'ahur Hin, la ip'tir uam naran m'ertu stu avsip'lani kavmlani istudau ha, imahei ti np'm'i ipastu arna v'ahienam'i a ti pavrars.

⁴ Naran kvan naur m'a si stu, di natei idararev'.

⁵ Kam'i ktvvnapn sarei a v'nen arna Paivul iv'ana m'a kam'i, inep'a ti kvv'i mardel, kavr ti a, “Natk, naran a Mlin Eia irph, mav'ah ti iv'i si kaka uaki. Mahrs naran iv'ana hua m'ah.

⁶ Sena ti a Mlin Eia irp m'ertu udlani ilap'as anr, karp a nahau a natn udlani ilav'r avv'i nkan.”

⁷ Ipavr ti Atua irp kam'i, ien si lera sena ti kvv'i a natn. Mardel ihei, la a tetian iarpi sena si stuan ha.

⁸ V'eti ipavr ti Atua iarp kam'i, inep'a nut irp m'ertuan udlani inap'ei, iv'i sena ti kvv'i net navanel, kaavv'i a natn.

⁹ Sena ti arna nadep' ka, nakd a tetiad iak, la avrp nakd ha. Laha, nvlak a nv'r. Sena si lera iv'i si lil mau a ti p'vlak a nv' Atua, iv'i a Tetiar m'im'iln udlani, kavsilv'.

¹⁰ Aau, hir avrp nakd arna napn kinkin iastudau, kavsapa v'ahienar uaki, v'eti Atua irp nakd a ti ipamhmah a nakd a ti p'vp'lt m'ei arna si p'asan.

¹¹ Nsarei naran a tatei irp a natn, mardel iarn ip'as ani arna naran nen, v'eti irn istu ani. V'eti itauatah a si lera, navan iak, iv'i sena ti mardel la irpi inap'i lera ha, isapa navanel p'as na tamat.

Kam'i pavsapa navanel viviln a ti tlm'i ipama kapas ml

¹² Sena si lera, kam'i pavani ti lm'am'i m'a plk tlm'i, la im'lili ha, ipahua katetn ml.

¹³ Kam'i pavsapa navanel uaki iviviln ha, a ti tlm'i, la istu ha, imahma kastu mau, v'eti ipama kap'as ml.

¹⁴ Pavsapa navanel na tamat m'er m'ertu udlani. Silv'ienam'i ipap'as pr arna nahn Atua. Ipavr ti ikahei, mkavla nahn a Mlin Lilad naran kinkin.

¹⁵ Kam'i pavv'ahur kam'i ipap'as, imahei ti vtmienan Atua ikalak a nl kam'i. M'ertu kinkin asnm'i imanep'a uar nai stu kinkin isi al pitvet, imahei ti iputakm a m'ertu ipastudau, nlr ipastu.

¹⁶ Asnm'i, dui kinkin imaan si stu m'a tav'et, v'aha ipatetvan tahn an Atua, imahei ti kam'i kinkin ipamk ipanap'ei a Isau, la iulul a nut hua na titiamu sena tim'ah uaki.

¹⁷ Kam'i kvrndu ti itauatah a si lera, naran irn ti ipalav'r si p'sp'as lera, Atua ivrkari. Itakal sanan, v'eti iarn istu mamh sena si stuan.

Kvrama asn nut sasan Atua udlani avp'lt

¹⁸ Sena ti kam'i kaavrama asn ptha, la m'ertu avrndu ti apaviari ha, la ihapu a nep'v'en ha. Kam'i kaavrama arna nut lihat m'a nut m't ha, m'a nut nalen irp istudau ha.

¹⁹ Kaavrama arna nut pavrn drl natav, kavrn nadl ivr v'nen. Naran m'ertu avrn nadl lera, avmimani a ti amavrn v'nen kinkin ml aranan.

²⁰ Sena ti avdedrn istudau, laha ahavhua ml, sena ti v'nen huan Atua ivr ti a, “Ipavr ti si dm kinkin ipamk ipaier ptha, pavmhrp'ni, v'aha pavvap'ni a namas.”

²¹ Naran a Musis ila si lera, irn istu istudau, kavr ti a, “Kana nrdus nlk ani, kavrdedrn ani istudau.”

²² V'eti kam'i kvrama asn ptha, nahan iv'i Saiun, kavrama asn v'anu lilan Atua, la isilv' ha, la iv'i nut a Serusalem iter eia ha. Kavrama asnr ensel avstudau avp'lt ha.

²³ Kavrama arna nut sasan Atua udlani, avv'i titiamu, avp'lt, la Atua itulul sarei a nahar arna nut eia ha. Kavrama asn Atua, la iv'ana hua m'er m'ertu udlani ha. Kavrama asnr m'im'ilr m'ertu p'as, la Atua ianr ti avrama kavviviln ha.

²⁴ Kavrama asn a Iesu, iv'i v'nen na turanien m'dah, kavrama asn din la avisani ha. Din lera ivrp'ep'a si p'as kasiv' din a Eip'el lahara.

Mavtetvan tahm'i an Atua la iv'ana m'a kam'i ha

²⁵ Kam'i mavtetvan tahm'i an Aula iv'ana m'a kam'i ha. Tituei, avtetvan tahr a m'ertu la iv'ana arna nadep' ra, v'eti ahavruh asn nl reran Atua. V'eti ipavr ti nakd p'vtetvan tahd asn Atua, la iv'ana m'a nakd dan a nut eia ha, nakd nkavruh asn nl reran Atua naran kinkin.

²⁶ Arna naran lera, drln Atua iani ti nami imi. V'eti hilaha ituran ani, kavr ti a, “Ipav'amk uaki, Kana p'ani ti nadep' ipadul ml. V'eti ikav'i nadep' uaki ikdul, nut eia ipadul m'ei.”

²⁷ Naran ivr ti a, “Ipav'amk uaki,” iv'iv'en ti ipalev'la si udlani idudul, la m'ertu avani ha, a ti sei ikadudul ipater uam.

²⁸ Nakd nvlev' v'anu la ikadul naran kinkin ha. Sena si lera, nakd p'vvr ip'as an Atua, kavpatei, kavan parian arna navanel viviln, kavani ti nahan ipav'a eia, kavdedrn ani.

²⁹ Sena ti Atuad iv'i nep'v'en iel si udlani.