Isrel 11 - V'nen P'as iv'i Turanien Trtarep' m'a Turanien M'dah

V'ahien P'as

¹ V'ahien p'as iv'i ti p'vrndu mamh ti si udlani Atua ituran ani ipatu hin, kavtrahi. V'ahien p'as lera iv'iv'en a nakd a ti sei nkavlei, iv'i si dau.

² Atua iv'iv'en ti arm'ertarep'ad tituei avp'as, sena ti avv'ahi.

³ Sena ti nakd nvv'ah Atua, nvrndu ti Atua ien si udlani arna v'nenan uaki, kan si udlani nvlei arna sei nkavledaui.

V'ahien P'asar a Eip'el, a Inuk m'ei a Nua

⁴ Sena ti a Eip'el iv'ah Atua, itu uvrin an Atua ip'as kasiv' ki a Kein itau ani. Sena si lera, Atua iv'iv'en ti hin iviviln arna nahn sena ti Atua irn ip'as a ti ipalev' sei itau ani. Dui lera itam'a sarei, v'eti v'ahien p'asan iv'ana m'a nakd uam.

⁵ Sena ti a Inuk iv'ah Atua, Atua ilev'la ti iahm'a. “Laha ahapaslei ml sena ti Atua itlev'la sarei.” Sena ti Paivul ivr ti naran Atua idalev'lei, Atua irn ip'as ani.

⁶ V'eti ipavr ti m'ertu iav'ah Atua, Atua ikarn ip'as ani naran kinkin. Sena ti ipavr ti m'ertu kinkin ipama asn Atua, ikv'ah ti Atua iak, kamhmah a m'ertu la avtala ani ihua ha.

⁷ Sena ti a Nua iv'ah Atua, hin iv'rn a v'nenan Atua, naran ivrp'ep'a sei idatu hin, kadedrn ani, kandedp' nauak lil a ti ipalev'lar m'ertu avlak al nmahan. Naran ien si lera, inep'a ti iv'ana hua m'er m'ertu udlani avlak arna nadep', kadama kaviviln arna nahn Atua, arna v'ahien p'asan.

V'ahien P'asan a Epraham

⁸ Sena ti a Epraham iv'ah Atua, isapa v'nenan, naran Atua iv'ara ani kavr ti ipav'a a nut iamk ipav'i nkan m'er nl nam'elan udlani. Iv'el, v'eti iarndu nut ipav'a.

⁹ Sena ti iv'ah Atua, ilak al v'anu Atua itturan sarei ani a ti ipav'i nkan, kav'i v'anudl arna v'anu uraur, kavlak al nmah kanuis m'ei Aisak m'ei a Sikup, la avp'lt m'ei kavlev' turanienan Atua ha.

¹⁰ Sena ti hin itala a v'anu iamk, nakalamu nen iak, iv'i nki Atua iv'ahuri kahli.

¹¹ Sena ti a Sera iv'ah Atua inap'ei, Atua itu nut huan ani a ti ipatkar kalev' a natn, naran itv'i sera v'nm'aran, katsiv' naran nen. Sena ti hin irndu ti Atua, la itturan sera si lera asnn ha, ipan sei ivri.

¹² Sena si lera, dui iamk lera, la ittrtarep' sarei, ihih ti ipam'a ha, hin ima kav'i a tetiar m'ertu avstudau kavnep'a msi na p'knaran, kavnep'a nun iter a p'ak nata, la akaspandri ha.

Hir avla turanienan Atua iter v'iv'a au, kavuadei

¹³ Hir udlani lera avv'ah Atua, kavram'a naran adavla sei Atua itturan ani asnr, v'eti avla turanien lera iter v'iv'a au, kavrndu mamh ti ipatu hin, kavuadei, kavvrp'ep'a ti avv'i v'anudl uaki, nmahr ihei arna nadep' ka.

¹⁴ Sena ti m'ertu avvr si lera, avvrp'ep'a ti avtala a nut iamk ipav'i nkar.

¹⁵ Nvrdaui, imvr ti amvv'ahur v'anu avdan asnn, navanel imiak a ti amvrahum'alet.

¹⁶ V'eti hilaha avrn nut iamk ip'as mau, iv'i nut arna v'anu eia. Sena si lera, Atua iamamih a ti apavvr ti iv'i Atuar, sena ti Hin itendedp' sera v'anuar itamk.

V'ahien P'asar a Epraham, Aisak, a Sikup m'ei a Susev'

¹⁷ Sena ti a Epraham iv'ah Atua, itau Aisak asnn, iv'i uvrin, naran Atua iendinei. Aau, m'ertu la itlev' sera turanienan Atua ha, hin itau a natn iamk dudau asnn.

¹⁸ Atua itvrur sarei ha, kavr ti a, “Nl nam'elan Aisak uaki ipav'i nkam,”

¹⁹ Sena ti iv'ah ti Atua irndu ti ipani ti ipathal ml arna m'ien. Laha, Atua itum'alet ani ml, inep'a ti ithal ml arna m'ien.

²⁰ Sena ti Aisak iv'ah Atua, hin imhmah anr a Sikup m'ei a Isau, kavrur sei ipatu hin.

²¹ Sena ti a Sikup iv'ah Atua, hin imhmah anr a natn a Susev' arru arv'i dui, naran ihih ti ipam'a. Iua napilaktan kapatei Atua.

²² Sena ti a Susev' iv'ah Atua, naran ihih ti ipam'a, ivrp'ep'a ti m'ertu a Isrel apavruh a Itsip, katu v'nen a ti apavuam'alet a sun.

V'ahien P'asan a Musis

²³ Sena ti a tetian a Musis m'ei a unian arv'ah Atua, artutuani nal itl, sena ti arla ti iv'i mardel p'as iamk. Ahardedrn a v'nenan a mlin lil.

²⁴ Sena ti a Musis iv'ah Atua, naran ima kalil, iarn ti apavr ti iv'i a natn a natn tav'et a mlin lil a Itsip.

²⁵ V'eti irn ip'as mau a ti ipap'lt m'er m'ertuan Atua arna der iarr isiv' ti iparn ipap'as ikap'arei arna si stu.

²⁶ Kav'ah ti ip'as mau a ti ipap'lt m'ei a Kristu arna nut avsip'lani inap'ei, isiv' ti ipalav'r si p'sp'as udlani iter arna nut a Itsip.

²⁷ Sena ti iv'ah Atua, iruh a Itsip. Iadedrn a nl reran a mlin lil, sena ti ip'tir, inep'a ti ilei Atua, la m'ertu iarndu ti ipalei ha.

²⁸ Sena ti iv'ah Atua, ien tim'ah na Pasuva katu v'nen a ti apavisen di sivsiv arna nakal na liu, imahei ti ensel la irp titiamu udlani ha ipaiarr.

²⁹ Sena ti avv'ah Atua, avlu nata, nahan iv'i Nata M'iel, inep'a ti avv'el arna nadep' m'am'a uaki. V'eti naran ardu a Itsip avrn ti apavan si lera, hir udlani avtpl.

Hir udlani, Atua iv'iv'en ti avp'as sena ti avv'ahi

³⁰ Sena ti m'ertu a Isrel avv'ah Atua, naml imlden Seriku irs, naran atvv'el sarei katvspat ani napn itsaru.

³¹ Sena ti tav'et na navanel, nahan iv'i a Rehap, iv'ah Atua, hin iahm'a m'er m'ertu udlani ahavv'ah Atua, sena ti ilev' dui artala a navanel na ti apavutakm a v'anu, arna tamat.

³² ?P'evr v'ata ml aranan? Sena ti naran nen ihei a ti p'evrur a Kitiun, a Parak, a Samsun, a Septa, m'ei a Divt, a Samuil, m'er dui na v'nenan Atua udlani.

³³ Hir udlani avan pari lilil, sena ti avv'ah Atua, kavkasr v'anu kinkin kavan sei iviviln, kavlev' turanienan Atua, kavtukar pn laiun.

³⁴ Kavkam't nut hua na nep'v'en kavruh asn tali lil itr m'ertu. Naran nut huar ihei ml, avrama kavhua, kavrama kavhua mau arna naur, kavani ti m'rnurar v'anudl avruh.

³⁵ Tav'et avlev' a natr avthal ml arna m'ien. M'ertu kinkin uraur, autakm a p'akr, v'eti ahavrn ti apavln v'ahien p'asar a ti der imaiarr ml. Sena ti avrn ti apavthal ml arna m'ien ipap'as mau.

³⁶ M'ertu avhlhalar hir uraur kavsip'lanr kavrpr a nai. Aau, kavhudar hir uraur kavsranr al p'resin.

³⁷ Kavmhrp'nr kavilus p'akr, kavhlhalar, kavtrp'nr a tali lil. Avunanut kavua nil a p'ak sivsiv v'aha nani. Ahaviak a si kinkin, der iarr istudau, avutakm anr ihuadau.

³⁸ Hir avp'as istudau, iaviviln a ti m'ertu na nadep' apavlak m'er. Avunanut arna nut kaka m'a ptha, kavlak al navap m'a plku nav'et.

³⁹ Hir udlani, Atua itv'iv'en sera ti avp'as sena ti avv'ahi, v'eti ahavlev' turanienan.

⁴⁰ Sena ti Atua iv'ahur nakd a ti ipamhmah a nakd mau, a ti hir apavp'lt m'a nakd a ti p'vp'as udlani.