Isrel 10 - V'nen P'as iv'i Turanien Trtarep' m'a Turanien M'dah

Di pluk m'a nani iarndu ti ipalev'la si stu

¹ V'nen huan a Musis iv'iv'en m'lk na si p'as ipama uaki, iav'iv'en p'akn dau. Sena si lera, sakrivais avani dav'a dav'a arna pai udlani, iarndu ti m'ertu la avan si lera ha apavrama kavviviln arna nahn Atua naran kinkin.

² Imvr ti imnap'i lera, amdavani ml. Sena ti imvr ti sakrivais nen itmhmah sera si stuar, amdavv'ahur si stuar ml.

³ V'eti naran avsapa p'kl lera avv'ahur si stu ml arna pai udlani.

⁴ Sena ti di pluk m'a nani iarndu ti ipalev'la si stu naran kinkin.

A Kristu im'a a ti ipan sei Atua irni

⁵ Sena si lera, naran a Iesu ima arna nadep', ivr ti a, “Atua, Nakm kaarn ip'as a sakrivais m'a uvrin, v'eti ktendedp' sera p'akk iamk.

⁶ Nakm kaarn ip'as a sakrivais avali m'a uvrin sena si stu.

⁷ Laha, Kana nvr ti a, ‘U Atua, palei, Kana nma a ti p'en sei krni, inep'a nut aulul ani arna Paivul kavrur Kana inap'ei.’ ”

⁸ Ivri lahara kavr ti a, “Nakm kaarn ip'as a sakrivais m'a uvrin sena si stu, kavr ti kaarn ip'as a sakrivais avali m'a sei avtau anh sena si stu. Nakm kaarn ip'as ani.” Si udlani lera avani inep'a nut v'nen huan a Musis ivri inap'ei.

⁹ Laha, itauatah, ivr ti a, “U Atua, palei, Kana nma a ti p'en sei krni.” Arna v'nen lera, ilev'la p'kl itauamu, a ti ipani ti p'kl ipatauatah ipap'tir.

¹⁰ Arna sei Atua irni lahara, nakd nvrama kavp'as, sena ti a Iesu Kristu itu p'akn iv'amk uaki, ikataui ml.

A Kristu im'ahu a Hin a ti ipam'a iv'amk uaki a ti ipamhmah a m'ertu udlani la avrama kavp'as ha

¹¹ Laha pris udlani avp'tir arna napn udlani kavan pariar, kavan sakrivais inap'amk nakl, la iarndu ti ipalev'la si stu naran kinkin ha.

¹² V'eti Dui lera ien sakrivais iv'amk uaki sena si stu, ikahani ml naran kinkin, sarei kalak arna m'ldaun Atua.

¹³ Sarei, katrah naran m'ertu udlani avlep'lei apavlak a nv' tln.

¹⁴ Sena ti itu p'akn iv'amk uaki kamhmah a m'ertu udlani la avrama kavp'as ha.

¹⁵ Laha, M'im'iln P'as ivrp'ep'a si lera a nakd, sena ti itauamu ivr ti a,

¹⁶ “A Mlin Eia ivr ti a, Si laha iv'i turanien la p'ani m'er ipatauatah a naran lera. Kana p'etu v'nen huak arna nlr, kulul ani arna v'ahienar.”

¹⁷ Ivri ml, kavr ti a, Laha, nkav'ahur si stuar ml, m'a nut avluvn a v'nen huak inap'ei, naran kinkin.

¹⁸ Naran itmhmah sera m'ertu arna si stu lera, uvrin na si stu ikahei ml.

Nakd p'vp'tir ipahua arna v'ahienad

¹⁹ Tv'alk, sena si lera nvviviln a ti p'vrav'a al Nutet na Nutet sena din a Iesu.

²⁰ Hin iela navanel m'dah, iv'i navanel na silv'ien, kani ti nvrndu ti p'vrav'a dan asn kalik itukar Nutet na Nutet, iv'i p'akn.

²¹ Hilaha, Pris Lilad iak, kap'aur nmahan Atua.

²² Sena si lera, nakd p'vmima asn Atua arna nl p'as kavp'tir ipahua arna v'ahienad, sena ti a Iesu itvisen sera nld a ti nkavv'ahur si stuad ml, kasila p'akd a naui p'as.

²³ Nakd p'vuada v'ahien p'asad ipahua, nkavvrdedrn, sena ti M'ertu la ituran ani ha ipauada turanienan ipel.

²⁴ Asnd, tv'aln ipav'ahur tv'aln katp'i a ti ipalap'as a tv'aln kan pari p'as.

²⁵ M'avsapa p'klr m'ertu kinkin, la ahavp'lt m'a sas nakl ha, v'eti tv'aln ipav'ana mamh m'a tv'aln. Nakd p'van si lera mau, sena ti nvla ti napnan a Iesu itmima.

M'ertu iviviln arna nahn Atua ipasilv' arna v'ahien p'asan uaki

²⁶ Sena ti ipavr ti ntvrndu sera v'nen duan Atua, kavrn nam'er a ti p'van si stu uam, kavsapa p'kl stu uam, si uraur ihei ml apavrpi kavtau an Atua, a ti ipalev'la si stuad.

²⁷ V'eti p'vdedrn uaki, kavtrah naran Atua ipav'ana hua m'a m'ertu kutakm a m'ertu avlep'lei al nep'v'en.

²⁸ Ipavr ti m'ertu kinkin iluvn a v'nen huan a Musis, ikam'a pr, ipavr ti m'ertu iru v'aha itl avla si stu iani. Ahavrn istu ani.

²⁹ ?V'eti inap'i, ipavr ti m'ertu ipas a Natn Atua, kasip'lani, kav'ah ti din, la iani ti turanienan ipap'tir ha, iav'i si p'as kinkin, kasip'len M'im'iln P'as na vtmienan Atua? ?Kaavv'ah ti Atua iputakm a m'ertu inap'i lera ipastudau mau?

³⁰ Sena ti nakd ntvrndu sera v'nenan Atua, ivr ti a, “Iv'i pariak, a ti p'etum'alet anr m'ertu sena si stuar. Kana uaki p'ani” A Mlin Eia ivr si lera. Ivri ml, kavr ti a, “A Mlin Eia ipav'ana hua m'er m'ertuan.”

³¹ Si laha iv'i sei p'vdedrn ani ipastudau, a ti p'vrars kavlak al lm'an Atua, la isilv' ha, a ti iputakm a nakd.

³² V'eti kam'i pavv'ahur tituei, naran nut renan Atua ip'hier kam'i, a ti kam'i kvp'tir naran der istudau ier kam'i.

³³ Naran kinkin m'ertu stu avsip'len kam'i kavutakm a kam'i arna nah nelnal. Naran kinkin kam'i kvp'lt m'er m'ertu, la avutakm anr inap'i lera ha.

³⁴ Sena ti kvrn istu a kana naran np'resin. Kvrn ip'as uaki, naran m'ertu avlev' siam'i, sena ti ktvrndu sarei arna nlm'i ti siam'i iter arna nut eia ip'as mau, ikastu naran kinkin.

³⁵ Sena si lera, kam'i mavln p'kl p'asam'i, ti pavp'tir ipahua, sena ti ulien nen ilil ihuadau.

³⁶ Irn ti v'ahienam'i ipap'arei. Sarei, naran ktvan sera si udlani Atua irn ti pavani, kam'i pavlev' sei ituran ani.

³⁷ “Sena ti ikap'arei, M'ertu la ipama ha, ikama pr. Hin ikakanut.

³⁸ V'eti m'ertu iviviln arna nahn Atua, ipasilv' arna v'ahien p'asan uaki, v'eti ipavr ti m'ertu kinkin ipam'alet ml arna v'ahienan, Kana nkarn ip'as ani.”

³⁹ V'eti nakd navv'i m'ertu p'vm'alet ml kavmln, v'eti nvv'i m'ertu nvv'ah Atua a ti ipalev'la silv'ienad.