Evases 6 - V'nen P'as iv'i Turanien Trtarep' m'a Turanien M'dah

Armardel, pavani ti nahar a tetiam'i m'ei a uniam'i ipav'a eia

¹ Armardel, pavsapa v'nenar a tetiam'i m'ei a uniam'i sena ti kvp'lt m'ei a Mlin Lilad, sena ti si lera iviviln.

² “Pavani ti nahar a tetiam'i m'ei a uniam'i ipav'a eia.” V'nen hua lera iv'i tertauamu la turanien ip'lt aranan ha, kavr ti a,

³ “A ti silv'ienam ipap'as, palak ipap'arei arna nadep' ka.”

⁴ Kam'i, tatei udlani, mavtp' a netm'i a ti nlr iparer, v'eti pavp'aur mamahr kav'iv'anr arna navanel viviln m'a v'nen p'asan a Mlin Lilad.

Arm'ertu na m'akarien pavsapa v'nenar mlin na pariam'i

⁵ Arm'ertu na m'akarien, pavsapa v'nenar m'ertu avv'i mlin na pariam'i arna nadep' ka kavani ti nahar ipav'a eia, kavvrdedrn sanan, kavani arna nlm'i udlani, inep'a ti kvani asn a Kristu.

⁶ Mavani ipap'as naran m'ertu avp'a kam'i uaki, a ti hir apavrn ipap'as ani uaki, v'eti pavani ipap'as sena ti kvv'i m'ertu na m'akarienan a Kristu, kavan sei Atua irni sena ti kvrni arna nlm'i.

⁷ Kavrn ip'as a ti pavm'akarar m'ertu uraur, inep'a ti kvm'akaran a Mlin Lilad, iav'i sena ti kvm'akarar m'ertu.

⁸ Sena ti kvrndu ti a Mlin Lilad ipul m'ertu udlani sena pari p'as kinkin avani. Iav'ahuri ipavr ti kvv'i mlin, v'aha m'ertu na m'akarien.

⁹ Kam'i kvv'i mlin na parei, pavv'ahur m'ertu na m'akarienam'i ipanap'i lera. Mavv'ana stu m'er, sena ti kvrndu ti a Mlinam'i iak arna nut eia, v'eti hin iav'ahur nah m'ertu.

Pavua su nauran Atua udlani

¹⁰ Tv'alk, pna sei p'evri hilaha. Kam'i pavhua aranan a Mlin Lilad, kavlak arna nut huan.

¹¹ Pavua su nauran Atua udlani a ti pavrndu ti pavp'tir naran a Sitan ipamlen kam'i kan pari na hap'ilienan.

¹² Sena ti nakd naavan naur m'er m'ertu na nadep' v'eti nvan naur m'er m'im'iln stu lilil, m'er kavmanar m'im'iln stu, m'er mlinar m'im'iln stu la avani ti nadep' ka iter al m'alk ha, kavan naur m'er m'im'iln stu la avan si stu ihuadau arna nut eia ha.

¹³ Sena si lera, pavua su nauran Atua udlani a ti pavp'tir arna napn stu. Sarei, naran ktvan sera si udlani, pavp'tir uam.

¹⁴ Sena si lera, pavp'tir kavua sitrav na v'nen dau, kavua sat aian na p'kl viviln.

¹⁵ Kavua sus na ti pavtrah ti pavvrp'ep'a v'nen p'as na tamat.

¹⁶ Ilil arna si udlani lera, pavtukar kam'i a sil na v'ahien p'as, a ti pavkam't nalu na nep'v'en udlani la a Sitan ilua kam'i ani ha.

¹⁷ Kavua manu aian na ti Atua ilev'la kam'i, kavua tali lil na M'im'iln P'as, iv'i v'nenan Atua.

¹⁸ Kavtu tamat nakl kavmiman sei an Atua arna M'im'iln P'as. Pavrasp' aranan arna nut huam'i udlani kavtu tamat sena m'ertu p'asan Atua udlani.

¹⁹ Kavtu tamat sena kana, a ti Atua ipatu v'nen a kana a ti p'evrp'ep'a v'nen p'as ipahua, kani ti m'ertu apavstudau apavrndu v'nen tutuah na v'nen p'as.

²⁰ Sena v'nen p'as lera, kana np'resin kav'i v'nenan a Mlin Lilad. Pavtu tamat a ti p'ep'tir ipahua, kav'ana ipaviviln.

V'nen itauatah dauan a Pul

²¹ V'eti a Tikikas, iv'i tv'ald nvlap'as ani, kav'i dui ien parian a Mlin Lilad ip'as nakl, ipavrp'ep'a si udlani asnm'i, a ti pavrndu mamh nut nlak inap'ei m'a sei nani nakl.

²² Ntap'ei iv'alet asnm'i a ti pavrndu nut nvlak inap'ei, a ti hin ipani ti pavrn ipap'as arna nlm'i.

²³ Nrn ti tamatan Atua ipaier tv'ald udlani, m'a vtmien m'a v'ahien p'asan Atua, iv'i a Tatei m'ei a Mlin Lilad a Iesu Kristu.

²⁴ Nrn ti vtmienan Atua ipama aranar m'ertu udlani avlap'as an a Mlin Lilad a Iesu Kristu arna nl p'as. Amen.