Evases 5 - V'nen P'as iv'i Turanien Trtarep' m'a Turanien M'dah

Pavlak arna vtmien

¹ Sena si lera, kam'i mkvsapei Atua pr kavv'i a natn p'as.

² Kavlak arna vtmien, inep'a sera nut a Kristu ilap'as a nakd inap'ei. Hin im'ahu a Hin kadam'a sena si stuad. Inep'a nut arp pluk tituei katau an Atua inap'ei, sena si stuar udlani, inep'a sei m'in ip'as istudau ani.

³ V'eti m'ertu ien si stu m'a vitar, v'aha m'ertu ien p'kl stu uraur ml ipanap'i lera, v'aha m'ertu irn sia tv'aln, amapaslei a p't nut nam'i naran kinkin, sena ti kam'i kvv'i m'ertu p'asan Atua.

⁴ Iaviviln a ti kam'i pavlsls v'aha kavvr v'nen mamln v'aha v'nen stu apavtma ani, v'eti ip'as a ti pavvr ip'as an Atua.

⁵ Sena ti kam'i ktvrndu sera si laha, ti dui ien si stu m'a tav'et, v'aha m'ertu ien p'kl stu uraur ml inap'i lera, v'aha m'ertu irn sia tv'aln, inep'a ti isapa aitul uaki, hir akavrav'a arna v'anuan a Kristu m'ei Atua.

⁶ Mavv'rn a v'nen kaka, iv'i hap'ilien, sena ti si lera iani ti Atua nln irer anr m'ertu avluvn a v'nen huan.

⁷ Sena si lera, kam'i mavp'lt m'er.

Pavlak arna nut renan a Mlin Lilad

⁸ Sena ti tituei kvlak arna m'alk, v'eti hilaha kvlak arna nut renan a Mlin Lilad. Silv'ienam'i ipanep'a silv'ienar m'ertu avlak arna nut ren nakl.

⁹ Sena ti parian a M'im'iln P'as iani ti m'ertu avan si p'as, kavan sei iviviln kavvr v'nen dau.

¹⁰ Kam'i pavtala a navanel pavsapei iv'i nki a Mlin Eia irni.

¹¹ V'eti mavp'lt m'er m'ertu avan pari na m'alk la ahapasla si p'as kinkin aranan ha, v'eti ip'as a ti pavv'ana hua m'er sanan.

¹² Sena ti iv'i mamihien a ti apavrur si stu udlani avani nakl arna nut m'ertu ahavlar.

¹³ V'eti nut ren iv'iv'en si stu udlani m'ertu avani. Sena ti ipavr ti apav'iv'en si stuar anr, apavlak al nut ren.

¹⁴ Sena si lera, Paivul ivr ti a, “Nakm km'atr, pathal arna m'ien, laha a Kristu ipatu nut ren anh.”

Pavv'ahur mamh navanel kvsapei

¹⁵ Sena si lera, pavv'ahur mamh navanel kvsapei. Kam'i mavnep'a m'ertu ptr ihei, v'eti pavnep'a m'ertu ptr iak.

¹⁶ Arna napnam'i udlani pavm'akar mamh, sena ti napn udlani hilaha ilini a si stu.

¹⁷ Sena si lera, mavnep'a m'ertu ptr ihei, v'eti pavrndu mamh sei a Mlin Lilad irn ti pavani.

¹⁸ Mavm'n naui m'iel kavkasmn ptm'i, v'eti pavlini a M'im'iln P'as.

¹⁹ Kam'i pavvrvr a kam'i arna Npin arna Paivul, m'a npin uraur ipatei Atua, m'a npin ivrur Atua, kavhai kavan npin arna nlm'i kavpatei Atua.

²⁰ Kavvr ip'as nakl an Atua, iv'i a Tatei, arna nahan a Mlinad, iv'i a Iesu Kristu, sena si udlani.

²¹ Tv'aln ipalak a nv' tv'aln sena ti kvv'ah a Kristu.

M'ertu avm'arit apavnap'ei a Kristu m'a sas

²² Artav'et, pavlak a nv' a naum'i nakl, inep'a ti kvlak a nv' a Mlin Lilad.

²³ Sena ti dui iv'i ptn a naun inep'a nut a Kristu iv'i pt sas inap'ei, kalev'la p'akn arna si stu.

²⁴ Sena si lera, tav'et apavlak a nv' a naur arna si udlani, inep'a nut sas ilak a nv' a Kristu inap'ei.

²⁵ Ardu, pavlap'as an a naum'i ipanep'a nut a Kristu ilap'as a sasan inap'ei, katu silv'ienan sanan.

²⁶ A ti ipani ipap'as kasilei a naui na v'nen p'as.

²⁷ A ti ipap'tir arna nahn kalini a si p'sp'as, tkv kinkin ikahei aranan, p'akn ikavrvrihu, v'aha si kinkin inap'i lera ikahter aranan. V'eti ipap'as kaviviln udlani.

²⁸ Dui apavlap'as an a naur ipanap'i lera, inep'a ti p'akr avv'i nkar. Dui ipalap'as an a naun, inep'a ti ilap'as a hin.

²⁹ Sena ti m'ertu kinkin ihei ilep'la p'akn, v'eti imsnani kap'auri inep'a nut a Kristu ip'aur sas inap'ei.

³⁰ Sena ti nakd udlani nvv'i ni p'akn, nvv'i pna p'akn kavv'i pna sun.

³¹ “Sena si lera, dui ipaln a tetian m'ei a unian kap'lt m'ei a naun, laha arru aparma karamk arna p'akr.”

³² V'nen lera iv'i v'nen tutuah lil, v'eti kana nvrur a Kristu m'a sas.

³³ V'eti kam'i udlani pavlap'as an a naum'i p'sev', inep'a ti iv'ih. Tav'et ipan nahan a naun ipav'a eia.