Evases 4 - V'nen P'as iv'i Turanien Trtarep' m'a Turanien M'dah

Pavamk arna M'im'iln P'as nakl

¹ Sena si lera kana la np'resin sanan a Mlin Lilad ha, nmiman a kam'i ihua a ti p'klm'i ipaviviln kasapa navanelan Atua la iv'ara a kam'i ha.

² V'ahienam'i ipav'a a nadep' nakl, pavv'len, nlm'i imahrer ipalahml. Pavlak ms m'er tv'elm'i arna vtmien.

³ Pavandinei a ti kam'i pavamk arna M'im'iln P'as nakl, kavp'lt arna tamat.

⁴ P'akn iamk uaki iak, M'im'iln P'as iamk uaki iak. Atua iv'ara a kam'i a ti pavv'ah si ipamk uaki kavtrahi.

⁵ Mlin Lil iamk uaki iak, v'ahien p'as iamk uaki iak, paptais iamk uaki iak.

⁶ Atua iamk uaki iak kav'i a Tetiad udlani, kalak eia na nakd udlani, kap'aur si udlani, kalak a nlm'i udlani.

Nut hua ururaur a Kristu ituvn a m'ertu udlani arna sas

⁷ V'eti itup'sev' a nakd udlani nut hua ururaur iviviln a nut a Kristu ituvn a nakd inap'ei.

⁸ Sena si lera, Paivul ivr ti a, “Naran Hin iv'a eia ilev'la m'ertu avan naur m'ei, kauadar apavlak a nv'n, katuvn a sei anr m'ertu.”

⁹ Naran Paivul ivr ti iv'a eia, iv'iv'en ti itama a nadep' auei itauamu.

¹⁰ M'ertu la itama sarei a nadep' hara, M'ertu nen iv'a eia kasiv' nut eia udlani a ti ipalinkar si udlani.

¹¹ Katu m'ertu kinkin a ti apavv'i apusel, katu m'ertu kinkin uraur a ti apavv'i m'ertu na v'nenan Atua, m'ertu kinkin ml a ti apavvrp'ep'a v'nen p'as unanut, m'ertu uraur a ti apavv'i pasta m'a tisa.

¹² A ti ipamhmah anr m'ertu p'asan, a ti apavviviln arna parei, a ti apavani ti m'ertu avv'i p'akn a Kristu apavp'tir ipahua.

¹³ Dav'a ti nakd udlani p'vp'lt kavamk arna v'ahien p'as kavrndau a Natn Atua. Dav'a kavrama kavv'i m'ertu lil kavp'as udlani kavnap'ei a Kristu.

¹⁴ A ti nkavv'i mardel ml kavnep'a nahu na nata la nalen itvi ha, kahpan nauak iv'a eia kadama a nadep' ml, naran m'ertu kinkin avvrp'ep'a v'nen stu asnd kavsner nakd a ti p'vv'ah hap'ilienar, kavsapar.

¹⁵ V'eti nakd p'vvr v'nen viviln arna vtmien, kavrama kavlil arna navanel p'as udlani kavp'lt m'ei a Kristu la iv'i ptd ha.

¹⁶ Hin ip'aur p'akn udlani, a ti ni p'akn apavp'lt mamh arna plkn udlani, a ti ni p'akn udlani ipam'akar ipap'as arna sei iviviln a ti ipani, kavani p'akn udlani ipama kalil mau arna vtmien.

V'ahienam'i ikama kam'dah pr

¹⁷ Sena si lera nvrp'ep'ei a kam'i arna nahan a Mlin Lilad, a ti mavsapa p'klr v'anudl uraur la avv'ahur si kaka nakl ha.

¹⁸ V'ahienar iter al m'alk. Avlak v'iv'a au a silv'ienan Atua, sena ti ahavrndu si ipamk, nlr ihua, akavledu sei.

¹⁹ Ahavmamih a ti apavan si stu, kavtu silv'ienar a ti apavan si stu m'a tav'et, kavrn nam'er a ti apavan si stu udlani inap'i lera.

²⁰ V'eti kam'i kaavla ti p'kln a Kristu inap'i lera,

²¹ Ipavr ti ktvv'rn sarei ani, ti ipavr ti itv'iv'en sera si kinkin a kam'i, inep'a nut v'nen dau iter asn a Iesu inap'ei.

²² Pavsran silv'ien trtarep'am'i kvani tituei, la istu kasapa hap'ilien karn nam'er a si stu ha.

²³ V'ahienam'i ikama kam'dah pr arna nlm'i.

²⁴ Kam'i mkvua silv'ien m'dah pr la Atua iani inep'a Hin ha, kaviviln kap'as udlani.

Mavani ti M'im'iln P'asan Atua iparn istu

²⁵ Sena si lera pavsran p'kl na hap'ilien. “M'ertu udlani p'sev' ipavr v'nen viviln m'a tv'aln,” sena ti nakd udlani nvv'i ni p'ak m'ertu iamk.

²⁶ “Nlm'i iparer, v'eti mavan si stu aranan”. Mavm'ahu a ti nlm'i iparer dav'a ipaier naran neiel ipatpl.

²⁷ Mavtu navanel an a Sitan a ti ipan sei.

²⁸ M'ertu la iv'nah sei tituei ha, imav'nah sei ml, v'eti ip'as a ti ipam'akar a lm'an kan si p'as a ti sian ipaiak a ti ipatu ki anr m'ertu siar ihei.

²⁹ V'nen stu imahmk ipama dan al pnm'i, v'eti pavvr v'nen p'as la irndu ti ipamhmah a m'ertu uraur ha, a ti ipan mamh m'ertu avv'rn a kam'i.

³⁰ Mavani ti M'im'iln P'asan Atua iparn istu, sena ti Hin iv'i turanienan Atua kav'iv'en ti kvv'i nkan, dav'a ipaier napn ipalev'la kam'i.

³¹ Mavsip'len tv'elm'i, mavv'lv'al, nlm'i imahrer, mavv'ara eia sena nl rer, mavv'ana stu m'er tv'elm'i. Kam'i mavrn ti pavutakm a tv'elm'i.

³² V'eti pavan si p'as a tv'elm'i. Nlm'i iparn istu anr tv'elm'i. Pavmhmah anr tv'elm'i arna si stu avani a kam'i, inep'a nut Atua imhmah a kam'i inap'ei arna si stu kam'i kvani, sanan a Kristu.