Evases 3 - V'nen P'as iv'i Turanien Trtarep' m'a Turanien M'dah

Atua iv'iv'en v'nen tutuah na v'nen p'as ivrur v'anudl an a Pul

¹ Sena si lera, kana, nv'i a Pul, np'resin sanan a Kristu Iesu sena kam'i v'anudl.

² Nsarei ktvrn sera ti Atua itu kana parian a ti p'ev'iv'en vtmienan a kam'i.

³ Kav'iv'en a kana kavrp'ep'a v'nen tutuah. Ntvrur sera si lera tituei isusupa uaki arna ruplet.

⁴ Ipavr ti pavv'ana arna ruplet lera, pavrndu nut nrn v'nen tutuahan Atua aranan a Kristu inap'ei.

⁵ Tituei Atua iav'iv'en si lera anr m'ertu, v'eti hilaha iv'iv'en si lera anr apusel p'asan m'er dui na v'nenan arna M'im'iln P'as.

⁶ Irn ti v'anudl apavp'lt m'er m'ertu a Isrel kavp'lt arna p'akn ipamk, kavp'lt arna turanien ipamk aranan a Kristu, sena v'nen p'as.

⁷ Atua iani ti kana nma kav'i m'ertu na m'akarien na v'nen p'as lera, inep'a nut Atua ituvn a vtmienan a kana inap'ei. Hin nut huan iak a ti ipan si lera.

Atua irn ti a Pul ipavrp'ep'a v'nen tutuah anr v'anudl

⁸ Arna vtmienan itu si laha a kana la nsusupa kasiv' m'ertu p'asan Atua udlani ha, a ti p'evrp'ep'ei anr v'anudl v'nen p'as na si p'sp'asan a Kristu la m'ertu iarndu ti ipaspani ha.

⁹ Kav'iv'en anr nelnal a ti apavp'lt m'a nakd kavrndu v'nen tutuah. Atua la ien si udlani aranan a Iesu Kristu ha itutuan si lera tituei, naran na ap'u dav'a ier dika.

¹⁰ A ti hilaha sas ipav'iv'en v'ahien p'sp'asan Atua anr ensel lil m'er kavman udlani arna nut eia.

¹¹ Inep'a nut ittu sarei inap'ei tituei dau, aranan a Kristu Iesu iv'i a Mlin Lilad.

¹² Nakd navmamih a ti p'vmima asn Atua, sena ti nvv'ah a Iesu, navdedrn.

¹³ Sena si lera nmiman a kam'i ihua, a ti v'ahienam'i imahrs sena der ier kana sanam'i, sena ti si lera iani ti naham'i ipav'a eia.

A Pul itu tamat sena sas a Evases

¹⁴ Sena si lera kana nsisihpu asn a Tetian a Mlin Lilad a Iesu Kristu.

¹⁵ Sena ti m'ertuan udlani, arna nut eia m'a nut a nadep', avlak arna nl nam'elan.

¹⁶ Ntu tamat a ti Hin la si p'sp'asan istudau ha, ipani ti pavhua arna nlm'i arna M'im'iln P'asan,

¹⁷ A ti a Kristu ipalak a nlm'i arna v'ahien p'asam'i, a ti kam'i pavhua arna vtmien kavnep'a sera uar nai, v'aha nakalamu la iuada nadep' ihua ha.

¹⁸ A ti kam'i m'er m'ertu p'asan Atua udlani pavrndu nut vtmienan a Iesu ip'hp'h, kap'arei, kadav'a a nadep' kadav'a eia inap'ei.

¹⁹ Kavrndu vtmienan a Kristu la ilil kasiv' si udlani nvrndaui ha, a ti kam'i pavlini a si p'sp'asan Atua udlani.

²⁰ Hin irndu ti ipan si udlani nvmiman ani, v'aha kavv'ahuri, kasiv' si lera istudau, arna nut huan la ien parei a nld ha.

²¹ Nvrn ti nahan ipav'a eia arna sas aranan a Kristu Iesu, dav'a ipaier nl nam'el udlani dav'a ikahiris naran. Amen.