Evases 2 - V'nen P'as iv'i Turanien Trtarep' m'a Turanien M'dah

Atua ilev'la kam'i arna vtmienan kani ti kvv'ah a Iesu

¹ Tituei kam'i ktvram'a sarei kavluvn a v'nen huan Atua kavan si stu.

² Arna naran lera kvsapa p'kl na nadep', inep'a nut mlinar m'im'iln stu la avlak unanut ha, irni inap'ei. Hilaha, m'im'iln stu lera im'akar a nlr m'ertu avluvn a v'nen huan Atua,

³ Tituei nakd udlani nvnap'i lera kavsapa p'kl p'akd irni uaki, kavan si udlani p'akd m'a v'ahienad irn nam'er ani a ti p'vani. P'kld iv'iv'en ti nvv'i m'ertu na ti Atua ipav'ana hua m'a nakd, ipanep'a m'ertu uraur.

⁴ V'eti Atua ilini a vtmien kalap'as a nakd istudau.

⁵ Naran ntvram'a sarei arna si stuad, iani ti nvp'lt m'ei a Kristu kavsilv' ml. Arna vtmienan ilev'la kam'i.

⁶ Kani ti nvthal ml m'ei a Kristu Iesu arna m'ienad kavlak m'ei arna nut eia.

⁷ A ti, arna naran ipatauatah, Hin ipav'iv'en nut vtmienan ilil inap'ei, kav'iv'en nut ilap'as a nakd aranan a Kristu Iesu inap'ei.

⁸ Sena ti Atua ilev'la kam'i arna vtmienan kani ti kvv'ah a Iesu. Iav'i sena pariam'i, v'eti Atua ituvn a si lera a kam'i.

⁹ Iav'i sena sei m'ertu avani, imahei ti m'ertu kinkin ipukl hin sanan.

¹⁰ Sena ti Hin ien nakd aranan a Kristu Iesu a ti p'van pari p'as la Atua ittu sarei a ti p'vsapei ha.

Din a Iesu iani ti kvmima asn a Mlin Eia

¹¹ Sena si lera, kam'i pavv'ahur ti tituei kvv'i v'anudl arna p'akm'i. M'ertu a Isrel, la atvan sera p'au anr ha, hir avvr ti kam'i kvv'i v'anudl, sena ti ahavan p'au a kam'i.

¹² Arna naran nen, kam'i kaavlak mima asn a Kristu, v'eti kvv'i v'anudl arna nahr m'ertu a Isrel. Arna naran nen, turanienan Atua iav'i nkam'i, kaavtrah ti turanienan Atua ipama katu hin, Atuam'i ihei arna nadep' ka.

¹³ V'eti hilaha, aranan a Kristu Iesu, kam'i la tituei kvlak v'iv'a ha, kvrama kavmima asn Atua, sena din a Kristu.

Hin a Iesu uaki iv'i tamatad

¹⁴ Sena ti Hin uaki iv'i tamatad, kani ti arru arma karamk uaki kakapr naml lil iter a p't nut nad.

¹⁵ Katu p'akn a ti ipalev'la v'nen huan a Musis m'a si udlani itaui a ti p'vsapei, a ti p'vlak arna tamat, kani ti arru aparma karv'i nl nam'el m'dah iamk, sena ti arp'lt m'ei, dav'a kan tamat.

¹⁶ Katu p'akn iamk arna su lamu, a ti ipani ti arru aparma karamk arna nahn Atua, kani ti tv'aln ikalep'la tv'aln ml.

¹⁷ Kadama kavrp'ep'a v'nen p'as na tamat a kam'i kvlak v'iv'a, m'a hir avlak mima asnn.

¹⁸ Sena ti aranan a Kristu nakd nrru, (m'ertu a Isrel m'er v'anudl) nrmima asn a Tatei arna M'im'iln P'as iamk.

A Kristu iv'i nakalamu na nmahan Atua

¹⁹ Sena si lera, kam'i kaavv'i v'anudl ml, v'aha m'ertu avlak av'aran, v'eti kvv'i tiamk m'er m'ertu p'asan Atua kavlak arna nl nam'elan,

²⁰ Kavv'i nakal na nmah la apusel m'er dui na v'nenan Atua avhli ha. Hin a Iesu iv'i nakalamu nen.

²¹ Nakal udlani na nmah ip'lt mamh asnn, dav'a kav'i nmah p'asan a Mlin Lilad.

²² Kam'i kvp'lt m'ei, laha Atua ihl kam'i kvrama kavv'i nmahan arna M'im'iln P'as.