Evases 1 - V'nen P'as iv'i Turanien Trtarep' m'a Turanien M'dah

A Pul ivr ip'as anr m'ertuan Atua avlak a Evases

¹ Kana nv'i a Pul kav'i apuselan a Iesu Kristu, sena ti Atua irni. Ntep'a ruplet laha iv'alet asnm'i, kvlak a Evases kavv'i m'ertuan Atua kavv'ah a Iesu Kristu.

² Nrn ti Atua iv'i a Tetiad m'ei a Mlin Lilad iv'i a Iesu Kristu apartu vtmien m'a tamat a kam'i.

Atua imhmah a m'ertu la avp'lt m'ei a Kristu ha

³ P'vpatei Atua iv'i a Tetian a Mlin Lilad a Iesu Kristu, sena ti hin itep'a si p'sp'as udlani idan eia arna M'im'iln P'as, sena ti nvp'lt m'ei a Kristu.

⁴ Hin itv'li sera nakd a ti p'vp'lt m'ei a Kristu, naran idaan nadep', a ti p'vp'as kavviviln arna nahn arna vtmienan.

⁵ Hin ittu sera nakd a ti p'vrama kavv'i a natn aranan a Iesu Kristu, inep'a nut Hin irn ip'as ani inap'ei.

⁶ Hin imhmah a nakd aranan a Kristu la ilap'as ani istudau ha, a ti p'vani ti nahan ipav'a eia, sena ti vtmienan ilil istudau.

⁷ Hin a Iesu iulla nakd a din, kalev'la si stuad udlani iviviln a nut vtmienan Atua ilil inap'ei.

⁸ Hin itu nakd vtmienan ilil istudau kani ti nvrndu mamh v'ahien p'asan kavrndu navanel viviln.

⁹ Hin iv'iv'en a nakd v'ahienan la itutuani tituei ha, sena ti irn ip'as ani a ti ipav'iv'ani.

¹⁰ A ti ipatup'lten si udlani iter arna nut eia m'a nut a nadep' aranan a Kristu, arna naran Hin itaui a ti ipaviviln ani.

¹¹ Nvp'lt m'ei a Kristu kavlev' sian. Atua itv'li sera nakd inep'a nut Hin irni inap'ei, sena ti Hin isapa v'ahienan uaki arna si udlani.

¹² Kataui ti nakd, la nvv'ah a Kristu itauamu ha, p'vpata si p'sp'asan.

¹³ Kam'i kvv'ahi naran kvrn v'nen viviln, iv'i v'nen a ti a Iesu ipalev'la kam'i. Laha, naran kvv'ahi, Hin itu M'im'iln P'as na turanien p'as a kam'i, kav'iv'en ti kvv'i nkan.

¹⁴ M'im'iln P'as lahara iv'i turanien na si p'sp'as la ipav'i nkad ha, naran si udlani la a Iesu itulla sarei ha ipav'i nkan, kani ti nahan ipav'a eia sena si p'sp'asan.

Tamatan a Pul

¹⁵ Sena si lera, naran kana nrn ti kam'i kvv'ah a Mlin a Iesu, karn nut kvlap'as anr m'ertuan Atua udlani inap'ei,

¹⁶ Nvr ip'as an Atua sanam'i nakl kavrur kam'i arna tamatak iel.

¹⁷ Karn ti Atuan a Mlin Lilad a Iesu Kristu, iv'i a Tatei p'vpatei nakl, ipatu M'im'iln P'as a kam'i a ti pavrndu sei, kav'iv'en Hin a kam'i.

¹⁸ Kaiela v'ahienam'i a ti pavla sei ituran a kam'i sena ti iv'ara a kam'i, kavrndu si p'sp'asan la ipav'i nkar m'ertu p'asan ha, nut ilil inap'ei.

¹⁹ Kav'iv'en a kam'i nut huan itu nakd nvv'ahi, nut ilil inap'ei, iviviln a nut huan la im'akar istudau ha.

²⁰ Iv'iv'en nut huan lera aranan a Kristu, naran iani ti ithal ml arna m'ien, kani ilak arna m'ldaun arna nut eia.

²¹ Kani ti ilil mau kasiv' ensel lil, m'er kavman, m'er ensel nut huar iak, m'er mlin. Nahan ilil kasiv' nka m'ertu udlani nahar ilil, iav'i arna naran laha uaki, v'eti arna naran ipama uam.

²² Katu si udlani a nv' tln a Iesu, kataui a ti Hin ipav'i pt si udlani arna sas,

²³ La iv'i p'akn ha, kalinkar sas inep'a nut Hin ilinkar si udlani inap'ei.