Emus 9 - V'nen P'as iv'i Turanien Trtarep' m'a Turanien M'dah

A Mlin Lil ip'tir asn tiv' na sakrivais

¹ Laha, nlei a Mlin Lil ip'tir asn tiv' na sakrivais. Laha, iv'ana, kavr ti a, “Parpr nakal na liu, a ti nadep' a nv'r ipadudul. Pardus nakal lera, apavrars arna ptr m'ertu udlani. P'etrpep'nr duanar m'a tali han. Ipavr ti m'ertu kinkin ipav'a ti iparuh asnr, v'eti ikaruh kadav'a a vut kinkin. Aau, v'eti ipavr ti m'ertu kinkin iparuh asnr, v'eti apavram'a uaki, akavsilv'.

² Ipavr ti apavhl nadep' a ti apavrav'a auei al nep'v'en lil, v'eti lm'ak ipalev'lar dan atlera. Ipavr ti apavhap'r a ti apavier p'knaran, p'elev'lar atlera, apavrars a nadep'.

³ Ipavr ti apavtutuah arna nut eia na ptha lil a Karmel, p'edan atlera katala anr, sarei kalav'r. Ipavr ti apavrav'a auei arna nut auei dau na nata lil, a ti apavtutuah dav'a ti Kana nkalar, v'eti p'ev'ana hua m'a nmat na nata, ipahar.

⁴ Ipavr ti apavrav'a kavp'resin arna v'anu uraur, kavlak arna nahr m'ertu avmlanr, p'ev'ana hua m'a tali han, ipatrpep'nr. P'ep'ar m'a m'atak, a ti p'utakm anr, ikav'i a ti p'en si p'as anr.”

⁵ A Mlin Atua na m'rnur, iv'i Atua la ier nadep' m'a lm'an, sarei ima kav'i nauei ha. Hir udlani, la avlak atlera ha, apavvalau. Nut lera udlani ipalini a nauei kanep'a sera Naui Lil, sarei nauei lera ipav'a a nadep' ml, aau, ipanep'a nut Naui a Itsip iani inap'ei.

⁶ Atua--la itu mamh sei arna p'knaran, katu mamh uar nai avrav'a auei al nadep', kav'ara a nauei dan al nata, sarei katp'srani arna nah nadep' ha--a Mlin Eia iv'i nahan.

⁷ A Mlin Eia iv'ana, kavr ti a, “?U arm'ertu a Isrel, kaavrndu ti kvnep'a sarar arm'ertu a Itiupia asnk? ?Kana nv'av'ar arm'ertu a Isrel dan a Itsip, kav'av'ar arm'ertu a Vilistia dan a Kavtur, kav'av'ar arm'ertu a Siria dan a Kir, v'aha ihei?

⁸ Palei, m'aten a Mlin Atua avp'a v'anu stu. Laha, p'utakm ani kalev'lei arna nadep' ka. V'eti nkautakm a nl nam'elan a Sikup udlani, kahiris ani, ikahei.” A Mlin Eia iv'ana, kavr si lera.

⁹ Laha, Atua iv'ana, kavr ti a, “Sena ti nvrdaui, p'ev'ana hua, sarei p'endina nl nam'el a Isrel arna nahr v'anu udlani, ipanep'a nut adulen uit kalev'la heian inap'ei. V'eti m'et na uit kinkin ikahrs arna nadep'.

¹⁰ Arm'ertu na si stu, la avv'i arm'ertuak ha, apavrars a nv' tali han. Sena ti avv'ana kavvr ti a, ‘Der lil ikasiv' kam'em', aau, ikaier kam'em' ki.’

¹¹ Arna napn lera p'hlur nmah kanuisan a Divt, la itars sarei a nadep' ha. P'enur sei, la itmaur sarei ha, aau, p'elav'r nai stustu m'er nav'et stustu, sarei kani ti nmah lera ipap'tir ml. P'ehluri, ipap'tir kanep'a nut ip'tir inap'ei itauamu.

¹² Ipanap'i lera, a ti apavlav'r duanar m'ertu a Itum, m'er v'anudl udlani, la nahak iter aranar ha.” A Mlin Eia, la ipan si lera ha, iv'ana, kavr si lera.

¹³ Laha, a Mlin Eia iv'ana ml, kavr ti a, “Palei, napn itv'i ti ipama ra, naran lera m'ertu, la itr nadep' m'a tali lil ha, ipasiv' m'ertu ilev'la tim'ah al pitvet. M'ertu, la ipas krep a ti ipama kav'i naui m'iel ha, ipasiv' m'ertu ilu m'et na sei. Laha, naui m'iel, la ip'eset ha, ipararev' dan arna ptha lilil, aau, ipararev' auei kadan arna mrnut udlani.

¹⁴ Kana p'elev'm'alet anr m'ertu, la avp'resin arna v'anu uraur ha, avv'i arm'ertuak a Isrel. Arm'ertu lera apavhlur v'anu lilil, la m'ertu ihei a nlr ha, sarei kavlak a nlr ml. Apavlu pitvet na nahau na krep, sarei kavm'n naui m'iel dan aranar. Apavhl pitvet, sarei kavhan nava nai dan al pitvet lera.

¹⁵ Kana p'elaur al nadep'ar. Akarv'lar ml, a ti apavln nadep' la nttu sarei anr ha.” A Mlin Eia, la iv'i Atuam ha, ivrp'ep'a si lera.