Emus 8 - V'nen P'as iv'i Turanien Trtarep' m'a Turanien M'dah

Nava nai iter al naten iamk

¹ Sarei, a Mlin Atua iv'iv'en si laha a kana. Palei, nla naten iamk. Laha, nava nai, la asvei naran nut ivuv ha, iter a nln.

² Laha, iv'ana m'a kana, kavr ti a, “?Emus, nakm kla v'ata?” Sarei, nvrprani, kavr ti a, “Nla naten iamk. Laha, nava nai, la asvei naran nut ivuv ha, iter a nln.” Sarei, a Mlin Eia ivr a kana, kavr ti a, “Naran na ti sei ipahiris itama sarei aranar arm'ertuak a Isrel. Nkav'el kasiv'r arna navanel ml.”

³ Sarei, Atua iv'ana ml, kavr ti a, “Laha, arna napn lera npin, la apavhai ani al nmah tamat ha, ipav'i tklien. Apalar p'akr m'ertu, la atvram'a sarei ha, arna nut udlani. Arm'ertu apavsranr av'aran, v'eti akavv'ana naran apavani.”

⁴ Parn si laha, kam'i, la kvdrlm'r m'ertu avdakr a sei ha, aau, kam'i la kvani ti m'ertu siar ihei arna v'anu avrars a nadep' ha.

⁵ Kvv'ana, kavvr ti a, “?Naran na nal m'dah ipav'siau v'aran, a ti p'vulul a uit? ?Aau, Sapat ipahiris v'aran, a ti p'vlev' ultin, ipav'i uliena uit? P'vani ti iva ipasusupa, v'eti sekel ipalil, aau, p'vtina sei, v'eti p'vhap'il uaki.

⁶ Ipanap'i lera, p'vul m'ertu sian ihei sena silva, kavul m'ertu idakr a sei m'a savat uaki. Aau, p'vulul a uit la itstu sarei ha.”

⁷ A Mlin Eia itv'ahur sera uklienan a Sikup, katturan sarei, kavr ti a, “Nvrdaui, nkavnapn a parian kinkin.

⁸ ?Nadep' ipadudul sena si laha, v'aha ipanap'i? ?Arm'ertu, la avlak arna v'anu ha, apavtakal sanan, v'aha ikahei? Nadep' ipadudul ipastudau, kalil kanep'a sera Naui Lil, aau, ipama eia, sarei kadav'a a nadep' ml, kanep'a sera Naui a Itsip.”

⁹ Sarei, a Mlin Atua iv'ana, kavr ti a, “Laha, ipatu hin arna napn lera, p'ani ti neiel ipatpl lihalm'au. P'ani ti nadep' ipam'alk udlani, naran idv'i nut ren uam.

¹⁰ P'ani ti tim'ah lililam'i apavrama kavv'i naran na ti apatakal. Npinam'i apavrama kavv'i tklien. P'ani ti m'ertu udlani apavv'u lihar m'a selpak, aau, hir udlani apavv'i nama. P'ani ti ipanep'a naran na ti apatakal sena ti net dui (la imamk asnm'i ha) itam'a sarei. Laha, naran si lera ipahiris, aparn ti iv'i napn haau iamk.”

¹¹ Sarei, a Mlin Atua iv'ana, kavr ti a, “Palei, napn itv'i ti ipama ra. Arna napn lera, Kana p'etep'a m'em'erien ipamk arna v'anu, ikav'i m'em'erien na p'ret, v'aha ikav'i ti aparn navam'i sena nauei, ikahei. Ipav'i m'em'erien a ti akarn v'nenan a Mlin Eia.

¹² Apavv'el, ipatudina a hin arna nata ipamk dav'a kaier nata a tv'eliel na v'anu. Apavv'el dan arna Nut, dav'a ti apavier nut arna Is. Apavvrvr kavrav'a a nut ipamk, sarei kavm'alet ml, a ti apavpasla v'nenan a Mlin Eia, v'eti akavpaslei.

¹³ Arna napn lera, uarav'aran p'sp'as m'er malakal hua apavm'em'a sena ti apavrn navar.

¹⁴ Arm'ertu avturan sei arna naha si stu a Sameria, kavvr ti a, ‘U Tan, nturan sei arna nahan atuam la isilv' ha,’ v'aha, ‘Nvrdaui, hin atua a Pirsipa isilv'.’ Arm'ertu lera apavrars, akavilaph ml naran kinkin.”