Emus 7 - V'nen P'as iv'i Turanien Trtarep' m'a Turanien M'dah

A Emus ila sei ml

¹ Sarei, a Mlin Atua iv'iv'en si laha a kana. Palei, iani ti tapat avp'lt kavtetv, itudina hin naran nina p'as itama sarei eia naran pai itv'i ti ipahiris. Nvrdaui, iv'i naran nina p'as itama sarei eia naran pai itv'i ti ipahiris, kav'i naran na ti a mlin ittr sera nina itauamu.

² Laha, itu hin, naran artapat lera atvhan sera nina udlani arna v'anu, nv'ana, kavr ti a, “!U Mlin Atua, pamhmah a kam'em' arna si stuam'em', ntu tamat hilaha! !U, pam'ahu a ti a Sikup ipap'tir uam, sena ti isusupa uaki!”

³ Sarei, a Mlin Eia ivav v'ahienan, la ier si lera ha, kavr ti a, “Aau, ikatu hin.”

Nap'

⁴ Sarei, a Mlin Atua iv'iv'en si laha a kana. Palei, a Mlin Atua iv'ara a nap', a ti iparp v'anu. Laha, iani ti naui lil imar udlani, kalev'la si udlani arna v'anu lera.

⁵ Laha, nv'ana, kavr ti a, “!U Mlin Atua, pahiris, ntu tamat hilaha! !U, pam'ahu a ti a Sikup ipap'tir uam, sena ti isusupa uaki!”

⁶ Sarei, a Mlin Eia ivav v'ahienan arna si lera, kavri ml, kavr ti a, “Aau, ikatu hin.”

Nahau atina sei m'ei

⁷ Sarei, a Mlin Atua iv'iv'en si laha a kana. Palei, a Mlin Lilad ip'tir arna naml hua lil athl sarei m'a nahau (la audei a ti nakal ipap'tir ip'ap'as ha). Sarei, iuada nahau (la audei a ti nakal ipap'tir ip'ap'as ha) al lm'an.

⁸ Sarei, a Mlin Eia ivr a kana, kavr ti a, “?Emus, nakm kla v'ata?” Sarei, nvrprani, kavr ti a, “Nla nahau (la audei a ti nakal ipap'tir ip'ap'as ha).” Sarei a Mlin Lil ivr ti a, “Palei, Kana p'etu nahau (la audei a ti nakal ipap'tir ip'ap'as ha), ipater a p't nut nar arm'ertuak a Isrel. Laha, nkav'el kasiv'r arna navanel ml.

⁹ Nut eia, la avv'i nkan Aisak ha, apavv'i nut si kinkin ihei. Nut arm'ertu a Isrel avtutuah a nln nakl apavrama kavv'i nut stu uaki. P'ep'tir m'a tali han karp nl nam'elan a Serupuam.”

Amasaia irn istu

¹⁰ Sarei, Amasaia, la iv'i pris a Petel ha, itep'a v'nen asn a Serupuam, iv'i mlin a Isrel, kavr ani, kavr ti a “A Emus itvrur sarah a p't nut nar m'ertu na nl nam'el a Isrel. Laha, v'anu iarndu ti ipalak a nv' v'nenan.

¹¹ Sena ti a Emus itv'ana sarei, kavr ti a, ‘Tali han ipamk ipatrp'n a Serupuam. Sarei, arm'ertu a Isrel apavp'resin arna v'anu uraur, aau, arm'ertu apavv'av'ar, sarei, apavln v'anuar.’ ”

¹² Sarei, Amasaia iv'ana m'ei a Emus, kavr ti a, “!Nakm, dui, la klela sei ha, pav'el! Paruh kadav'a arna v'anu a Suta. Pahan p'ret atlera, aau, pavrp'ep'a sei atlera.

¹³ V'eti mavrp'ep'a sei ml arna nut a Petel, sena ti iv'i nut p'asan a mlin, kav'i nut nmahan a mlin iter.”

¹⁴ Sarei, a Emus ivrpren Amasaia, kavr ani, kavr ti a, “Itauamu kana nav'i pruvet ki. Aau, nav'i a natn a pruvet. V'eti nv'i m'ertu ip'aurr sivsiv, kav'i m'ertu ip'aurr nava nai, la avr ti iv'i sikamu ha.

¹⁵ Sarei, a Mlin Eia ilev' kana, naran nsapar sivsiv uaki. Laha, a Mlin Eia iv'ana m'a kana, kavr ti a, ‘Pav'a kavrp'ep'a sei anr arm'ertuak a Isrel.’

¹⁶ Laha, sena si lera, parn v'nenan a Mlin Eia. Nakm kvr ti a, ‘Mavrp'ep'a sei anr arm'ertu a Isrel. Masran v'nen a ti ipaier nl nam'elan Aisak.’

¹⁷ Sena si lera, a Mlin Eia iv'ana inap'i laha, kavr ti a, ‘A naum ipav'i tav'et na navanel arna v'anu lil. A natm dui m'er a natm tav'et apavrars a nv' tali han. Apatina v'anuam m'a nahau atina sei m'ei, katupapri. Nakm pam'a arna v'anu ipamk, la istu arna nahn Atua ha. Sarei, arm'ertu apavlev'lar arm'ertu a Isrel arna v'anuar, kavv'av'ar dav'a ti apavp'resin arna v'anu uraur.’ ”