Emus 6 - V'nen P'as iv'i Turanien Trtarep' m'a Turanien M'dah

Atua iv'ana m'ei a Saiun m'ei a Sameria

¹ Usa sanam'i, la kvlak vn uaki arna nut a Saiun ha, kam'i la kvv'ah ptha lil a Sameria ha. Kam'i kvv'i m'ertu lilil na v'anu, la iv'i mlinar v'anu uraur ha. Aau, arm'ertu na nl nam'el a Isrel avrav'a asnm'i nakl.

² Pavrav'a a Kalnei kavp'ep'a nut. Sarei, pavandan atlera kavrav'a a Hamat, la iv'i nut lil ha. Sarei, pavv'el kavrav'a auei a Kat, iv'i v'anuar arm'ertu a Vilistia. ?Kam'i kvp'as kavsiv'r v'anu lera nakl, v'aha ihei? ?V'anuar avlil kavsiv' v'anuam'i, v'aha inap'i?

³ Usa sanam'i, sena ti kvvrp'ep'a ti napn stu ikahma uam, idav'i naran nen. Kam'i kvani ti napl na m'ertu irp m'ertu nakl imima ra.

⁴ Kam'i kvm'atr arna pias, la aani m'a lu si dm iv'i elevan ha, kavsran tlm'i aranar napl lililam'i, kavlev'lar net sivsiv asnr sivsiv nakl, kavhanr. Aau, kvlev'lar net pluk dan al nmah, la arpluk avhatat a nln ha, sarei kavhanr.

⁵ Kvlak vn kavsnar kita kavhai, aau, kvan kita m'dah sanam'i, inep'a nut a Divt iani inap'ei.

⁶ Ktven naui m'iel al dis lilil, sarei kavm'ni. Kvtaur pumat p'sp'as arna p'akm'i, v'eti kaavrn istu sena der lil ier nl nam'elan a Susev'.

⁷ Sena si lera, arm'ertu lera apavv'i arki apavp'resin ipatauamu, aau, apalev'lar arki, la avm'atr kavhatat naran avan tim'ah lilil nakl ha.

⁸ A Mlin Atua itturan sarei arna nahan uaki. A Mlin Atua na m'rnur iv'ana, kavr ti a, “Kana nlep'la uklienan a Sikup, aau, nlep'lar nmahar mlinan. Sena si lera, p'etu v'anu lil al lm'a m'ertu uraur, aau, v'anu lil m'a si udlani iter a nln.”

⁹ Naran lera, ipatu hin, ipavr ti ardu inal apavlak uam al nmah ipamk, hir udlani apavram'a uaki.

¹⁰ Sarei, naran m'ertu ipamk, la iv'i tv'aln a m'ertu itam'a sarei ha, ipav'a a ti ipalev'lar p'akr m'ertu atvram'a sarei, hin m'a m'ertu uraur, la irndu ti ipatu nap' a m'ertu itam'a sarei ha, ipavr a m'ertu, la ilak uam al nmah ha, kavr ti a, “?Arm'ertu uraur kinkin avlak m'ah uam?” Sarei, m'ertu ipamk ipavrpani, kavr ti a, “Ihei.” Sarei, ipavr ti a, “!Mav'ana ml! Sena ti p'vdedrn, imahei ti p'vvrp'ep'a nahan a Mlin Eia.”

¹¹ Sena ti, palei, a Mlin Eia ipavrp'ep'a si kinkin, sarei ipakasr nmah lil kakapapri udlani. Aau, ipakapapr nmah pa, kahiris ani.

¹² ?Arhus avvrvr arna nav'et nakl, v'aha ihei? ?Aparndu ti apahl nadep' m'a pluk arna nut lera, v'aha ikahei? V'eti kam'i ktvlev' sera v'nen hua katvvav sarei dav'a ti iv'i naui haau. Ktvlev' sera nava p'kl viviln, katvvav sarei dav'a ti iv'i si haau.

¹³ Kam'i kvrn ip'as istudau sena nut a Lu Tepar, kavvr ti a, “?Arna nut huam'em' uaki kam'em' ntvlev' sera nut a Karnaim, a ti ipav'i nadep'am'em', v'aha ihei?”

¹⁴ Laha, a Mlin Atua na m'rnur iv'ana, kavr ti a, “V'eti palei, Kana p'ani ti v'anu ipamk ipamlen kam'i arm'ertu na nl nam'el a Isrel. Laha, apavutakm a kam'i, ipatudina hin asn pn liu na nut a Hamat, sarei kaier m'ihual arna nut Arapa”.