Emus 5 - V'nen P'as iv'i Turanien Trtarep' m'a Turanien M'dah

Tklien iamk sanan a Isrel

¹ U arm'ertu na nl nam'el a Isrel, pavrn v'nen laha kana p'evrp'ep'ei, ipaier kam'i, kav'i tklien ipamk:

² Uarav'aran a Isrel itars sarei, ikailaph ml. Im'atr arna nadep'an, arm'ertu atvruh sarei asnn. M'ertu ihei a ti ipasr lm'an a ti ipap'tir.

³ Sena ti a Mlin Atua iv'ana inap'i laha, kavr ti a, “Ipavr ti v'anu lil ipamk ipatap'er m'ertu ipav'i tausen iamk (1,000), arki ipanelnal (100) uaki apavsilv'. Ipavr ti v'anu lil ipamk ipatap'er m'ertu ipanelnal (100), arki ipanal uaki apavsilv' kavv'i duana nl nam'el a Isrel.”

Atua ivrp'ep'a ti arm'ertu apavrn istu sena si stuar

⁴ Sena ti a Mlin Atua iv'ana inap'i laha m'a nl nam'el a Isrel, kavr ti a, “Pavtala Kana, sarei kavsilv'.

⁵ V'eti mavtala nut a Petel, mavrav'a a Kilkal, aau, mavv'el kavier a Persipa. Sena ti arm'ertu a Kilkal apavp'resin arna v'anu uraur, a Petel ipama kav'i nut stu ipamk.

⁶ Pavtala an a Mlin Eia, sarei kavsilv', imahei ti ipardus Hin karp nl nam'elan a Susev', aau, ipanep'a sera nap', dav'a ti ipahiris ani. M'ertu kinkin ikakm't nap' lera arna nut a Petel.

⁷ !Sena ti kam'i kvlev' v'nen hua, sarei kavvavi dav'a ti iv'i si haau iamk, aau, kavtin p'kl viviln a nv' nadep'!”

⁸ Atua ien msi nahan iv'i Pleiatis, m'a nki nahan iv'i Uriun. Ivav m'lk na m'ien, kani ti ima kav'i m'etav'aran ml. Iani ti nut ren ima kadam't kanep'a sera lihat. Iv'ara a nauei, la iter al nata ha, katp'srani arna nah nadep' ka. A Mlin Eia iv'i nahan.

⁹ Iutakm a m'ertu hua, nl reran inep'a sera nu lil iamk. Inap'i lera, nl reran, la ihua ihuadau ha, irs arna nmah hua lil.

¹⁰ Arm'ertu avlep'la m'ertu iv'ana hua asn pn liu na v'anu, aau, avlep'la m'ertu iv'ana iviviln, avlep'lei istudau.

¹¹ Sena si lera, sena ti kvpas m'ertu sian ihei a nadep', kavlev'la takis sena uit asnn, aau, sena ti ktvhl sarar nmah m'a nav'et atri, v'eti mkavlak a nlr--aau, ktvlu sera pitvet na nahau na krep, la avp'eset ha, v'eti mkavm'n naui m'iel dan aranar pitvet lera.

¹² Sena ti Kana nrndu si stu lil kam'i kvani, m'a nut ktvluvn a sera v'nen huak. Ktvutakm sarei a m'ertu viviln, katvlev' sera nav'et a ti pan pari stu. Ktvan sarei ti akav'ana hua mamh m'a m'ertu sian ihei, naran itala ani asn pn liu na v'anu.

¹³ Laha, m'ertu, la iv'ahur mamh sei ha, ikavr si kinkin naran lera, sena ti iv'i naran na si stu lil.

¹⁴ Pavtala si p'sp'as, kavruh arna si stu, a ti pavsilv'. Ipanap'i lera, a Mlin Atua na m'rnur ipalak m'a kam'i, ipanep'a nut kam'i ktvr sarei inap'ei.

¹⁵ Pavlep'la si stu, kavlap'as a si p'sp'as. Pavani ti v'nen hua ipap'tir mamh asn pn liu na v'anu. Ipanap'i lera, nsarei a Mlin Atua na m'rnur iparn istu a duanar arm'ertu a Susev'.

Napnan a Mlin Eia

¹⁶ Sena ti a Mlin Atua na m'rnur, iv'i Mlin Lilad, iv'ana inap'i laha, kavr ti a, “Apavtakal arna navanel udlani. Laha, apavv'ana arna navanel lilil udlani, kavvr ti a, ‘!Usa! !Usa!’ Apavv'ara a m'ertu ip'aur pitvet, a ti ipavalau eia. Aau, apavv'ara anr m'ertu avrndu ti apavhai arna tklien, a ti apavtakal eia.

¹⁷ Apavtakal aranar pitvet na nahau na krep, sena ti Kana p'ev'el kasiv' kam'i.” A Mlin Eia iv'ana, kavr si lera.

¹⁸ !Usa sanam'i, la kvrn ti napnan a Mlin Eia ipama ha! ?Sena ti napnan a Mlin Eia ipasr lm'am'i ipanap'i? Nut ipam'alk, aau, ikav'i nut ren.

¹⁹ !Ipanep'a sera naran m'ertu ipamk iparuh asn laiun, sarei, si dm iv'i pea ipap'tir asnn! !V'aha, ipanep'a sera naran m'ertu ipamk ipandinei ti ipav'a eim al nmah, katu lm'an arna naml, sarei, nmat ipahei!

²⁰ ?Kavrndu ti napnan a Mlin Eia ipam'alk, nut ikaren? ?Kavrndu ti ipam'alk ipastudau, akala nut ren ki?

²¹ A Mlin Eia iv'ana, kavr ti a, “Kana nlep'lar napn nar tim'ah lililam'i. Narn ip'as a kam'i naran kvp'lt arna nahak.

²² Ipavr ti pavtaur uvrin aali m'er uvrin iv'i uit sanam'i, nkarn ip'as anr. Nkav'ahurr uvrin sena tamatam'i, aau, ipavr ti apavv'i si slm la avmrmr ha, v'eti nkav'ahurr.

²³ Pavlev'la nadl na npinam'i, sena ti nkav'rn a npin idan asnr kita kam'i kvsnei nakl.

²⁴ V'eti v'nen hua ipav'el kanep'a sera nauei naran irarev', aau, p'kl viviln ipararev' kanep'a sera naui lil ipamk.

²⁵ ?U nl nam'el a Isrel, kam'i kvtaur sakrivais m'er uvrin a Kana, naran kvlak arna nut kaka pai inelv'a (40) hara?

²⁶ V'eti kam'i kvrman a Sikut, iv'i mlinam'i. Aau, kvrman a Siun, m'er aitulam'i, m'a msi, la iv'i nkar atuam'i, la kvani sanam'i ha.

²⁷ Sena si lera, Kana p'etep'a kam'i pavp'resin arna v'anu a tv'eliel na v'anu lil a Tamaskas.” A Mlin Eia, la nahan iv'i a Mlin na m'rnur ha, ivrp'ep'a si lera.