Emus 4 - V'nen P'as iv'i Turanien Trtarep' m'a Turanien M'dah

Artav'et a Sameria avstuet

¹ Pavrn v'nen laha, arprapar a Pesan, la kvlak arna ptha lil a Sameria ha. Kam'i artav'et kvutakm anr m'ertu siar ihei, kavrpr m'ertu ahaviak a si kinkin, kavvr anr a naum'i dui, kavvr ti a, “Pavuirma naui m'iel, a ti p'vm'ni hilaha!”

² A Mlin Atua itturan sera si iamk, arna p'kl p'asan. Laha, ivr ti a, “Palei, napn ipama uam, aau, ipama aranam'i pr. Naran lera, Atua ipalev'la kam'i m'a uk, la asr tilau m'ei nakl ha, aau, ipalev'lar a netm'i m'a uk asr tilau m'ei.

³ Pavv'el kavln v'anu kavsiv'r naml hua lilil, la atvkapapr sarei ha. Pavv'el kavspsapa kam'i uaki. Sarei, apavsran kam'i arna nut a Harmun.” A Mlin Eia iv'ana, kavr si lera.

⁴ Laha, Atua iv'ana ml, kavr ti a, “Pavrama a Petel kavan si stu. Aau, pavan si stu mau arna nut a Kilkal. Pavuirma sakrivaisam'i arna m'etav'aran udlani, kavuirma nav'etam'i (ipav'i nav'et ipamk arna nki inal) naran napn apartl apavv'siau nakl.

⁵ Pavtu sakrivais a ti pavr si p'as, kavtu iis a nln. !Pavvrp'ep'ei, aau, pavv'ana m'er m'ertu kavvr ti avv'i uvrin kam'i ktvtu sarei, v'eti m'ertu kinkin idatp' kam'i a ti pavtaui, sena ti kam'i arm'ertu a Isrel kvlap'as a ti pavan si lera nakl!” A Mlin Atua iv'ana, kavr si lera.

Atua iv'ana m'er arm'ertu a Isrel, v'eti ahavv'rn ani

⁶ “Sarei ml, Kana nani ti lum'i avdakr a sei apahani, aau, inap'i lera arna v'anu lililam'i udlani. Aau, nani ti p'ret ihei arna nut udlani kvlak aranan, v'eti kam'i kdavm'alet asnk.” A Mlin Eia iv'ana, kavr si lera.

⁷ “Kana nani ti nu iahau naran nal itl adviak uam, itauamu a naran na ti apalev' tim'ah al pitvet. Nani ti nu iu arna v'anu lil iamk, v'eti nani ti iahau arna v'anu lil uraur. Nu iu arna nut iamk uaki, sarei, nut nu iahau aranan ima kam'am'a udlani.

⁸ Inap'i lera, arm'ertu nar v'anu lilil arru v'aha artl avrav'a arna v'anu lil uraur a ti apavlev' nauei, v'eti avrn navar uam. V'eti kam'i kdavm'alet asnk.” A Mlin Eia iv'ana, kavr si lera.

⁹ “Nrp kam'i m'a sei, la iutakm a nava nai m'a nai ha. Naran pitvetam'i, m'er nut kvlu nahau na krep, m'er p'alakam'i, m'er nai iv'i uliv avrama kavlil, v'eti tapat ihanr udlani. V'eti kam'i kdavm'alet asnk.” A Mlin Eia iv'ana, kavr si lera.

¹⁰ “Ntep'a m'etien stu asnm'i, inep'a nut nani a Itsip. Ntrpep'nr malakalam'i m'a tali han, aau, hir m'er husam'i, la ktvlev' sarei asnr m'ertu uraur ha. Laha, nani ti m'i stu, la idan arna nut kvhl nmah kanuisam'i ha, ima eia kaier sukm'i. V'eti kam'i kdavm'alet asnk.” A Mlin Eia iv'ana, kavr si lera.

¹¹ “Nkasr kam'i kinkin, inep'a nut Atua ikasrr v'anu a Satam m'ei a Kamara. Aau, kavnep'a sera rana nap' iamk, la auadei kalev'lei al nep'v'en ha. V'eti kam'i kdavm'alet asnk.” A Mlin Eia iv'ana, kavr si lera.

¹² Sarei, Atua iv'ana ml, kavr ti a, “U Isrel, sena si lera, Kana p'ani ipanap'i laha anh. !Aau, sena ti p'ani ipanap'i laha, pandedp'h a ti pap'tir arna nahn Atuam, U Isrel!”

¹³ Sena ti palei, Hin la ianr ptha lilil, la ien nalen, la ivrp'ep'a v'ahienan a m'ertu, la iani ti nut im'alk m'etav'aran, la iv'el aranar nut eia dau arna nadep' ka ha--a Mlin Atua na m'rnur iv'i nahan.