Emus 2 - V'nen P'as iv'i Turanien Trtarep' m'a Turanien M'dah

A Muap

¹ A Mlin Eia iv'ana inap'i laha, kavr ti a, “A Muap ien si stu artl, aau, ien si stu arv'a. Sena si lera, nkavav v'ahienak a ti nkarpi ml. Sena ti itu nap' a sun a mlin a Itum, dav'a ti avrama kavnep'a sera nauei uaki.

² V'eti Kana p'etep'a nap' ipaier nut a Muap, ipalev'lar nmahar mlin udlani arna nut a Keriut. Laha, arm'ertu a Muap apavram'a, apavkakar dav'a, kavv'ana eia sp'n, m'ertu apaviv natav.

³ Laha, p'etrla dui na v'nen hua asnr, katrpep'nr m'ertu lilil m'ei.” A Mlin Eia iv'ana, kavr si lera.

A Suta

⁴ A Mlin Eia iv'ana inap'i laha, kavr ti a, “A Suta ien si stu artl, aau, ien si stu arv'a. Sena si lera, nkavav v'ahienak a ti nkarpi ml. Sena ti atvlep'la sera v'nen huan a Mlin Eia, adavan sei v'nen huan ivr ti apavani. Hap'ilienar ittp' sarar, laha, avruh arna navanel. Hap'ilien lera avv'i arki a tetiar avsapei itauamu.

⁵ V'eti Kana p'etep'a nap' ipaier nut a Suta, ipalev'lar nmahar mlin udlani arna nut a Serusalem.”

A Isrel

⁶ A Mlin Eia iv'ana inap'i laha, kavr ti a, “A Isrel ien si stu artl, aau, ien si stu arv'a. Sena si lera, nkavav v'ahienak a ti nkarpi ml. Sena ti avulul anr m'ertu viviln sena silva, aau, avulul anr m'ertu siar ihei sena savat iru uaki.

⁷ Avm'im'in ihua naran avp'a neiev', la iter arna pt m'ertu sian ihei ha, avuha navanela m'ertu v'len. Dui iamk m'ei a natn dui arm'atr m'a vitar iamk, laha, iutakm a nahak, la ip'eset ha.

⁸ Avm'atr arna klusar m'ertu uraur, la avv'i m'ertu avkaun anr ha, Aau, avm'atr asnr nev'etet udlani. Avm'n naui m'iel m'er arm'ertu, la atvlak sarei a nv' nl rerak ha, al nmah tamatar atuar.

⁹ V'eti iv'i Kana ntrpep'n sera m'ertu Amur arna nahr. M'ertu lera ip'arei kanep'a sera nai iv'i sita, aau, ihua kanep'a sera nap'ak. V'eti Kana nttrpapr sarar navan, la avrater eia ha, aau, ntutakm sarar uarn, la avrater a nv' nadep' ha.

¹⁰ Sarei ml, iv'i Kana nlev'la kam'i dan arna v'anu a Itsip. Nv'ev'a kam'i pai inelv'a (40), laha, kvv'el dan arna nut kaka, a ti pavrav'a kavlev' v'anuar arm'ertu Amur.

¹¹ Laha, Kana nani ti a netm'i dui kinkin avilaph kavv'i pruvet, sarei kani ti malakalam'i kinkin avrama kavv'i Nasarait. U arm'ertu a Isrel, si lera ittu sera hin inap'i lera, v'aha ihei?” A Mlin Eia iv'ana, kavr si lera.

¹² Sarei, Atua iv'ana ml, kavr ti a, “V'eti kam'i kvtu naui m'iel anr arm'ertu avv'i Nasarait, kavv'ana hua m'er pruvet, kavvr ti a, ‘!Mavvrp'ep'a si kinkin!’

¹³ Palei, Kana nlk idv sanam'i, inep'a nut kat iamk, la ilini a uit ha, idv inap'ei.

¹⁴ Sena si lera, m'ertu, la irndu ti ipavrvr ipalahml ha, nut huan a ti ipan si lera iparuh asnn. M'ertu hua ikahma kahua mau. Sarei, m'ertu irndu ti ipan naur ikalev'la hin, a ti ipasilv'.

¹⁵ M'ertu iuada tenpaui ikap'tir. M'ertu ivrvr ip'eset ikaruh dau. Sarei, m'ertu iua hus nakl ikalev'la hin, a ti ipasilv'.

¹⁶ M'ertu hua, la iadedrn a sei ha, aau, nki iadedrn kanep'a sera m'ertu uraur--arna napn lera hin ipamalmal kavrvr karuh.” A Mlin Eia iv'ana, kavr si lera.