Ap'u 9 - V'nen P'as iv'i Turanien Trtarep' m'a Turanien M'dah

Atua ien turanien m'ei a Nua

¹ Atua imhmah an a Nua m'er a natn dui, kavr anr, kavr ti a, “A netm'i apavstudau kavnelnal kavlinkar nadep'.

² Si dm udlani arna nadep', m'anh udlani avtetv eia, si udlani avharev' arna nadep' m'er tilau udlani al nata, apavdedrn kavrdedrn a kam'i. Ntaur al lm'am'i.

³ Si udlani avv'el kavsilv' apavv'i tim'ah pavhani. Ntu si udlani a kam'i inep'a nut nttu sera nava nai udlani a kam'i inap'ei.

⁴ V'eti mavhan m'dah a sei m'a din, sena ti din iv'i silv'ienan.

⁵ Nvrdaui, si dm udlani la apavani ti di silv'ienam'i ipararev' ha, p'utakm anr sanan, m'er m'ertu udlani la apavrp silv'ienar tv'alr ha, p'utakm anr sanan.

⁶ M'ertu la iparp m'ertu kani ti din ipararev' ha, m'ertu iparpi ml a ti din ipararev'. Sena ti Atua ien m'ertu iv'i m'lkn.

⁷ V'eti kam'i a netm'i apavstudau kavnelnal. Pavlev' a netm'i apavstudau arna nadep', kavnelnal.”

⁸ Laha, Atua ivr an a Nua m'er a natn dui kavr ti a,

⁹ “Pavlei, kana p'ani ti turanienak ipap'tir asnm'i m'er a netm'i udlani ipatauatah a kam'i,

¹⁰ m'a si udlani isilv' kalak asnm'i, m'anh udlani, si slm udlani m'er si dm udlani arna nadep', si udlani la avaan al nauak ha, si dm udlani arna nadep'.

¹¹ P'en turanienak ipap'tir asnm'i. Nauei ikalinkar nadep' ml karp silv'iena si udlani isilv', nauei ikalinkar nadep' ml kutakm ani udlani.”

¹² Atua ivri ml kavr ti a, “Ki laha iv'i sei iv'iv'en ti turanienak ipap'tir arna p't nut nak m'a kam'i m'er si udlani avsilv' la avlak asnm'i ha, m'er a netm'i dav'a ikahiris naran.

¹³ Nen nev'ielak eia arna p'knaran. Ki lera ipav'i sei ipav'iv'en ti turanienak ipap'tir arna p't nut nak m'a nadep'.

¹⁴ Dav'a naran p'ani ti p'knaran ipanpakar nadep', apala nev'iel arna p'knaran.

¹⁵ Laha, Kana p'ev'ahur turanienak ip'tir a p't nut nak m'a kam'i m'er si udlani isilv'. Nauei ikalinkar nadep' karp si udlani isilv' ml naran kinkin.

¹⁶ Nev'iel ipater eia arna p'knaran, laha naran p'ep'ei p'ev'ahur turanien la ip'tir arna p't nut nak nv'i Atua, m'er si udlani avsilv' kavlak arna nadep' ha.”

¹⁷ Laha, Atua ivr an a Nua kavr ti a, “Ki laha iv'i sei p'ani kav'iv'en turanien la nani ip'tir arna p't nut nak m'a si udlani isilv' arna nadep'.”

A Nua im'nm'n

¹⁸ A natn a Nua avaan al nauak avv'i a Sem, a Ham m'ei a Sep'et. A Ham iv'i a tetian a Kenan.

¹⁹ Hir artl avv'i a natn a Nua, kavv'i pla nelnal udlani avlak unanut arna nadep'.

²⁰ Laha, a Nua ima kav'i dui ien pitvet kalu nahau iv'i krep.

²¹ Laha, im'n ui krep lera kinkin kam'nm'n kahsla klusan al nmah kanuisan.

²² Dav'a, a Ham, a tetian a Kenan, ila p'akn a tetian ti imalmal kavr anr tv'aln arru arlak av'aran.

²³ Laha, a Sem m'ei a Sep'et arlev' kalik kartaui arna var, karv'el kartetvan tahr kartukar p'akn a tetiar la imalmal hara. Artetvan tahr a ti amarla ti a tetiar imalmal.

²⁴ Dav'a, naran naui m'iel iarpi ml, a Nua ithal karndu sei a natn dui titiatah iani asnn, kavr ti a,

²⁵ “A Kenan ipalak a nv' nl reran Atua. Asnr tv'aln, hin ipav'i dui na m'akarienar m'ertu na m'akarien.”

²⁶ Ivri ml kavr ti a, “Npatei a Mlin Eia, la iv'i Atuan a Sem ha. A Kenan ipav'i dui na m'akarienan.

²⁷ Atua ipani ti nut huan a Sep'et ipama kalil mau, dav'a hin ipalev' nadep' nmah kanuisan a Sem avrater aranan. Laha, a Kenan ipav'i dui na m'akarienan.”

²⁸ Itauatah a ti nauei m'a nata ilinkar nadep', a Nua isilv' pai inelnal iv'atl pln inellm' (350) aranan ml.

²⁹ Paian a Nua udlani inelnal iv'asav'et pln inellm' (950), sarei im'a.