Ap'u 4 - V'nen P'as iv'i Turanien Trtarep' m'a Turanien M'dah

A Kein m'ei a Eip'el

¹ Atam im'atr m'ei a Iv, iv'i a naun. Laha, itkar kalev' a Kein kavr ti a, “Ntlev' sera m'ertu iamk asn a Mlin Eia.”

² Sarei, ilev' titiatah nan ml, iv'i a Eip'el. A Eip'el ip'aur sivsiv v'eti a Kein im'akar al pitvet nakl.

³ Dav'a dav'a a Kein ilev' nava sei al pitvetan kauirma kan uvrin iv'a asn a Mlin Eia.

⁴ A Eip'el, hin ml ilev' sivsiv kinkin, avv'i nki aviak itauamu, kalev' kris nar kauirma katau an a Mlin Eia. Laha, a Mlin Eia iv'ahur a Eip'el kav'ahur sei itau ani.

⁵ V'eti iav'ahur a Kein m'a uvrin iani. Laha, a Kein nln irer istudau kam'er nahn.

⁶ Laha, a Mlin Eia ivr an a Kein kavr ti a, “?Nlm irer sena v'ata? ?Inap'i hin km'er nahm?

⁷ Ipavr ti pan si p'as, nahm ipap'as. Ipavr ti pan si stu, si stu ilak a karliu karn ti ipauadah, v'eti nakm pav'i mlinan pr.”

⁸ Laha, a Kein iv'ana m'a titiatah nan, iv'i a Eip'el. Dav'a, naran arlak al pitvet, a Kein ip'tir karpep'n tv'aln, iv'i a Eip'el.

⁹ Sarei, a Mlin Eia ivr an a Kein kavr ti a, “?Tv'alm, a Eip'el, hini?” A Kein ivr ti a, “Kana narndaui. Kana nap'aur tv'alk.”

¹⁰ A Mlin Eia ivr ti a, “?Kan v'ata? Drl titiatah nam idan asn nadep' kav'ara eia a Kana.

¹¹ Hilaha palakdinei a nv' nl rerak arna nadep' la iurur navan kalev' di titiatah nam al lm'am ha.

¹² Naran pam'akar arna nadep', ikatu nava si kinkin ml anh. Mkalak p'n a nut ipamk ml. Punanut nakl pr arna nadep'.”

¹³ A Kein ivr an Atua kavr ti a, “Ktep'a der ima aranak ihua ihuadau. Nkauadedr der lera.

¹⁴ Palei, ksran kana dika a ti nkalak ml arna nadep'. Nakm patutuah kani a ti nkala nahm ml. Nkalak p'n a nut ipamk ml. P'unanut a nut udlani arna nadep'. Laha, ipavr ti m'ertu kinkin ipapasla kana, iparpep'n kana.”

¹⁵ A Mlin Eia ivr ani, kavr ti a, “Ipavr ti m'ertu kinkin iparp a Kein, p'etum'alet a der ani ml ipav'asaru.” Laha, a Mlin Eia itu mak kinkin arna p'akn a Kein, imahei a ti m'ertu kinkin ipapaslei karpi.

A Natn a Kein itauatah ani

¹⁶ Laha, a Kein iruh arna nahn a Mlin Eia kalak arna v'anu iamk, iv'i nut a Nat, iter arna Is na nut a Iten.

¹⁷ A Kein im'atr m'ei a naun. Laha, itkar kalev' a Inuk. Hin ihl v'anu lil iamk katu nahan isapa nahan a natn, iv'i a Inuk.

¹⁸ Hin a Irat iak asn a Inuk. A Irat iv'i a tetian a Mehusael. A Mehusael iv'i a tetian a Metusael. A Metusael iv'i a tetian a Lameh.

¹⁹ A Lameh, hin iua tav'et arru. Naha tv'aln iv'i Ata, naha tv'aln iv'i a Sila.

²⁰ Ata ilev' a Sapal. Hin iv'i pla nelnal avlak al nmah tvtv kavp'aur pluk nakl.

²¹ Naha tv'aln iv'i a Supal. Hin iv'i pla nelnal avsna kita kaviv lamu.

²² A Sila ml ilev' a Tupal-Kein. Hin irndu mamh p'kl na ti avan pla talei arna aian m'a aian v'il. Nahan a v'nn a Tupal-Kein iv'i a Nama.

²³ A Lameh ivr anr a naun arru, Ata m'ei a Sila, kavr ti a, “Parv'rn a drlk, kam'i krv'i a naun a Lameh, parv'rn a v'nenak. Sena ti nttrpep'n sera dui iamk itr kana karpep'n malakal iamk ith kana.

²⁴ Ipavr ti der ipamam'alet ipav'asaru a m'ertu iutakm an a Kein, nvrdaui, der ipav'anelsaru pln ipasaru (77), ipamam'alet arna m'ertu iutakm an a Lameh.”

²⁵ Atam im'atr m'ei a naun ml, laha ilev' dui pa iamk katu nahan iv'i a Set, sena ti ivr ti a, “Atua itu kana a natk uraur ml, ipav'i m'lnen a Eip'el la a Kein irpep'ni ha.”

²⁶ Dui pa iamk iak ml asn a Set. Hin itu nahan iv'i a Inus. Arna naran lera m'ertu avv'aradinei a nahan a Mlin Eia.