Ap'u 2 - V'nen P'as iv'i Turanien Trtarep' m'a Turanien M'dah

Pitvet a Iten

¹ Inap'i lera Atua ien nadep' m'a p'knaran m'a si udlani iter a nln, kahiris ani.

² Laha, arna saru na napn, Atua ihiris a parian udlani iani karnrn hin arna saru na napn arna parei udlani la iten sarei ha.

³ Kamhmah a saru na napn kani ti iv'i napnet, sena ti arna napn lera irnrn Hin arna parei udlani la Atua iten sarei ha.

Dui ilak al pitvet nahan iv'i Iten

⁴ Si lera iv'i pla p'knaran m'a nadep', naran Atua ianr, arna napn Atua ien nadep' m'a p'knaran.

⁵ Naran lera nava sei idahei uam arna nadep', nina idahsi uam arna nadep', sena ti a Mlin Atua idatep'a nu a ti ipau arna nadep', m'ertu ipahl nadep' idahei uam.

⁶ V'eti niu ima eia dan dan al nadep' kani ti nadep' udlani im'am'ln.

⁷ Laha, a Mlin Atua ien dui a neiev' na nadep', kaiv lkn kani im'im'in. Laha, dui nen isilv'.

Sei arani al pitvet nakl

⁸ A Mlin Atua ilu pitvet arna Is na nut a Iten katu dui la iani hara a nln.

⁹ A Mlin Atua iani ti nai udlani la ala ti ip'as ha, isi dan al nadep', navan ip'as a tim'ah. Katu nai na silv'ien iter a p't nut na pitvet, m'a nai na ti m'ertu iparndu si p'as m'a si stu.

¹⁰ Nauei iamk irarev' dan a Iten a ti pitvet ipalev' nauei, irarev' kairirpri arna nut iv'a.

¹¹ Naha nki iamk iv'i a Pisun. Ki lera iv'i nki irarev' kamldan nut a Havila udlani, iv'i nut kul iter.

¹² Kul arna v'anu lera ip'as. Nai p'as iamk iak, uin m'in ip'as istudau, nahan iv'i ptelium. Nav'et p'as iamk iak atlera, nahan iv'i uniks.

¹³ Naha tv'el nauei iv'i Kihun. Ki lera iv'i nki irarev' kamldan nut a Kus udlani.

¹⁴ Naha nitla nauei iv'i Taikris. Ki lera iv'i nki irarev' kadav'a arna Is na nut Asiria. Naha niv'a nauei iv'i Iuvretis.

¹⁵ A Mlin Atua ilev' dui lahara kataui al pitvet a Iten a ti ipam'akar kap'auri.

¹⁶ Laha, a Mlin Atua itu v'nen hua a dui lera kavr ti a, “Nava nai udlani al pitvet pud vn ani.

¹⁷ V'eti nava nai na ti m'ertu iparndu si p'as m'a si stu mkaudi, sena ti ipavr ti pud nava nai lera, arna napn nen lera mkam'a pr.”

¹⁸ A Mlin Atua ivr ti a, “Iap'as a ti dui ipamamk. P'en m'ertu ml ipasr lm'an kaviviln ani.”

¹⁹ Laha, a Mlin Atua ilev' nadep' kan si dm udlani ilak arna nadep', m'a m'anh udlani itetv eia, kauirma asn Atam a ti iparndu nahar la Atam ipatau anr ha. Naha si dm udlani iv'i nki Atam itau anr uaki.

²⁰ Atam itu naha si slm udlani, m'a m'anh itetv eia, m'a si dm udlani ilak arna nadep', v'eti akapasla m'ertu ipasr lm'an kaviviln ani.

²¹ Sarei, a Mlin Atua iani ti Atam im'atr vnapn. Laha, ilev'la su ninakln iamk kauakar m'lnen ml arna p'akn.

²² Laha, su ninakln lahara, la a Mlin Atua itlev'la sarei asn dui, iani ima kav'i tav'et, kav'av'ei kauirv'a asn dui.

²³ Laha, Atam ivr ti a, “M'ertu laha iv'i suk dau kav'i p'akk dau. Apatu nahan ipav'i Tav'et sena ti iaan asn Dui.”

²⁴ Sena si lera dui ipaln a tetian m'ei a unian karp'lt m'ei a naun, karma karamk arna p'akr.

²⁵ Dui m'ei a naun arru karmalmal, v'eti aharmamih.