YOEL 2 - ALLAH WENE FANO WENE

Nukoho Tuhan en on anyo enam aik waruhu ulug ebereg welamag ulug hweag-esebag wene

¹ Nenakni Tuhan anukoho anyo mundoho horog aik waha ma, mun horog su reg en de, At Allah ebe wereg ma Dom Sion At obahet mun eneg on fam etman de, bohweap trompet fururuk kamek, ne ap enowarukoho durukmu enele hum ngai duruk hag; hit ap homi o Yehuda fam welahep on henowag elek duruk kamek.

² Nukoho aire mun heik hak deg on watlug, mun mum mam deg laruhu. Ap tentara esan lohwaleg hag de bulue re o dom fam hena salduk kwit buri boroho waharuk hag deg. Wene airoho aruhu on aire eke atsi mu hauk kahe fug on. Ne, fobik mundoho-mundoho etma oho eke aruhu mu hahuk fug on atuk ai.

³ O kwenang etma enalukwema re o Eden Tuhan eyabukmu omano hag deg ma, famen de it nil lauk kwit enambol fil de indok en harep nauk kwit mun han nauk hag, iren di angge su angge yaho on omano mun elehap duruk, airoho elehap durukmu re o iliangge leimu enggelangge mundoho elegma hag atuk. Dorangge eke lin-esauk fug, ne iren ando oho eke foruk fug.

⁴ It enape re kuda hag deg lit de;

⁵ buroho laukmu re kuda fam lauk kwit, weim yapukmu en hweik lahaik wambuk laukmu hag deg. It enebe re ap tentara en weim yabik kukoho lohwalduk hag deg, ne indok en enggelangge nauk kwit aplohok sipuk delelang duruk hag duruk.

⁶ It enebe re hou wilibik waharukmu re ap homi mundoho en enowag elek duruk, ne it enebe abirangge en de enerohole hesilug de hesingno duruk.

⁷ Bulue etma enebe re ap tentara en enautsi neben heben on weim yabukoho hen-heni lauk on etma hag laheg, iren de tentara elehet asiagle fam bog haroho laharuk hag kweheg, duruk kwit de, enebe nim mun bekitdoho eraroho neg laukmu re, kwaniroho amumu wilibik laheg, dahandoho laheg, duruk fug.

⁸ It enebe kwema lauk kwit de eke filig esa fug angge laheg, it enanggobokwe domog laheg duruk. It enebe anggilukdoho lohwaloho lauk kwit de it eke ap eneselei on en enowarik wam no ulug fak lehet wauk on omano moluluk esalug kwik laukmu re, it enebe kwe bal-enebuk fug alereg.

⁹ It enebe o kota ulukdoho kuruk kwit de elehet asiagle fam bog haroho lauk. Ap herako wauk on en herahaikoho jendela yendeg elekwe en kuruk ai hag, it enebe re o wirig fam lahalug kuruk.

¹⁰ Airoho kwik laukmu re kwenang lang deheg, ne bohol inim mil deheg, duruk. Airoho durukmu re mo nim bigalem nim il mum atuk mu, sohwalanggen ombagbag dilelduk on anyo mum aheg duruk.

¹¹ It tentara Tuhan ele holoho diek ulug hweag-esaukmu duruk on etma re, enebe wenag enebuk fug alereg! Diroho diek suroho diek ulug eneg aleroho re Tuhan ele bag uruk. Tuhan anukoho aire mun fulu bolan on, nik aleroho aruhu mu, ap homi en enambong seroho hambuk halug welamuhup fug.

Enobabut aham dukwag ulug hweag-esebag wene

¹² Tuhan en uruk kwit de, “Ai fam en, ketiare henenda mun abirangge fam en ahamdoho An nakit manik. Waharuk kwit de henambilik hweang wereg lit de oba yareheg, somban eheg, duruk kamek.

¹³ Hiren de nit siag duruhuk ulug de henasum dilip debouk fug, ite henenda dilipdoho embeseiyek,” ulug hweag-esebag. Airoho ebag ma re an den hweag-esauk kwit de, diroho irihik, “Henakni Tuhan aire obabut sakoreg lit enda enebeheg, ne ahummu ahe fol folo lahauk fug angge welaheg, unggum anggin on enobam fouk fug angge siag duruk on elehapdoho feseheg, duruk anggere re, henakni Tuhan Allah fam sombandoho manik.

¹⁴ Henakni Tuhan Allah re unggum henobam femin ulug ebetsi on anyo sebel esalug de, hit henobam Aren di angge su angge hilil halaldoho henobaharuk karuhu mu, hiren anggur mel gandum mel Tuhan Allah obahet folug og-utuk kamuhup en de,

¹⁵ Henebe misigmu kabog ulug siburu hweang wereg lit Allah hweag-utuk kamuhup en de, Dom Allah en on Sion fam etma bohweap trompet ele furulug enayonggo feiyek.

¹⁶ Ap homi abirangge eneyonggo folug de, it nenakni Allah obam etmano kabog-enebiek. Andog enepuk kwit de ap homi lohon mel doron mel, omalik ag fam on mel, it duhum sauwe ket lomboreg on mel, oho re it enebe nohorukmu etman embeselug wilibik waheg, dukwag.

¹⁷ It ap imam Tuhan obahet duruk on etmano oho, mezbah dulug ambe olohotma wereg on dulug bulmu etman oba yarukwag. Enoba yatuk kwit de diroho uruk kwit, “Tuhan nenakni, Hat homaliki enelaheg enebin. Hat honggwareg hangge on etma ap homi en siaho feseruk on ai fahet, ulug somban ukwag. Airoho duruk kwit de it enunggul unuk amu on en enele siahap-esauk kwit de, Ap homi Israel on enakni Allah re ebe kema wereg? uruk kam ale fahet de Haren embesouk fug, uruk kamag,” ulug irihik.

Allah en kwenang fanoe febag wene

¹⁸ At Tuhan en anggwenang enda hebagdeg kwenang etma fanoe feheg, ne At omaliki enda hundig enebeheg, debag.

¹⁹ Airoho debagdeg Aren it onggo hweag-esauk kwit de, “Hit henebe homoroho neg nauk kamuhup en de, ketia An den gandum mel anggur mel, zaitun ahalue mel og-hesahuk. Airoho og-hesalug ap homi enunggul unuk amu on en hit maben hag boruk on ai mel, unda yag henepuk on ai mel, airoho henepuk kamag ulug embesehuk fug.

²⁰ Ne, bulue utara fil en elang balug waharuk on etma siloho wilibi fesehuk, Airoho monde feseruk kwit de, foma re o bini lei kwe etma sil esahuk, Elang atam on de ik Laut Mati wereg fil etma lag debeheg, ne elang ombolim on de Laut Tengah fil etma domag eseheg, duhuk. Iren de hit siahap henepswa ai en de An den it elehap debesehuk. Enebe wareg filik amben de sang fang uhu.

²¹ Hat kwenang su hakol duk fug, henda hahayeg hauk kamin. Tuhan en hat hobahet mun along ale duruk on etma ebet hauk kamin.

²² Ne, hit di on su on loboruruk kahep on etma, di enggelangge su enggelangge ketia mundoho sobalduk anggere henobam songgoroho welam fug. Ne, anggur anggen mel, ara mel de anggen deg elegdoho yihikeg, di ahan su ahan anggen anduhuk kwaniroho mun mandoho yihikeg duhu.

²³ Yaho, hit ap homi Sion henap suma, An henakni Tuhan Allah nobabut fano on deg ai en de henahayeg deheg, henawonog en deheg, duruk kamek. Li enggela lolduk on anyo ambiang fam en hit osit higitdoho og-heseheg, li mururik waharuk on fam osit Aren og-heseheg, atam duruk hagdoho enggela alit sobalduk li og-heseheg, duruk karuhu.

²⁴ Mu re gandum anggen loloho belapukmu etma yohwaroho feheg, anggur ahaik mel, zaitun ahalue mel bereldukmu etman ele hetag eheg duhu.

²⁵ An den bulue elang etma hit henobam mondorik waharihik mu re, tahun eta fam hit anggen bal-da on, li eta fam nauk katswa on etma fahet de, hit henangge eleg atsi on etma fahet de An den obalma og-hesahuk.

²⁶ Fobik de hit henasiburu mun siagdoho neg deg ma homoroho neg nauk kwit wereg ma, ap homi en enele sahan wat-hesauk katswa ale etma wat-hesauk kamuhup fug. Hit henobahet de henakni Allah en along on hum ale durukmu re, hiren henakni Tuhan Allah neg leho foruk kamuhup.

²⁷ Airoho henepukmu re hit ap homi Israel on en de, An hit henesahalimu welahi ale mel, Ne, An den nebe hit henakni Tuhan Allah deg lahi ale mel anyo henoluk amuhup. Allah amu on de eke wereg fug, we An namu neg Allah welahi. Ne, it An nomaliki on etma enenggali amuhup fug,” ulug hweag-esebag.

Nukoho o ahae fotog salim anyo enam aik waruhu wene

²⁸ Airoho hweag-esebagdeg eke uruk kwit de, “O ahae fotog salim di ap homi su ap homi fam Naheime hilili feseik waruhuk. Mu re enomaliki ap mel hwelani mel en An nawene hweag-esauk kamuhup. Hit henesahalimu etman ap lohon en de ena og-heheg, ne it duhum sauwe en de ena og-hauk hag heheg duruk kamuhup.

²⁹ Li eta fam de An namingming angge ap mel homi mel fam Naheime enobam hilili feseik waruhuk.”

³⁰ An fobik boholma lendi en duk fug ale on deheg, kwenangma suman duk fug ale on deheg, duruk kwit mep inim, indok inim, hobu inim, ahe inim duhuk.

³¹ Airoho durukmu o mo mum aheg, bigalem orohole mep hagdoho aheg, duhu. Mundoho airoho neg aruhu aire An henakni Tuhan en nukoho ahae fotog salim aik waruhu on anyo owan aik wam fug kweleg atam aruhu.

³² Famen de ap homi sa en An henakni Tuhan en nabug baluhup on de enahap wendat enebuhuk. An Tuhan en uruk kwit de, An nomaliki o Yerusalem fam etman momal enepihik on de enahap wendat enebuhuk,” ulug ebag.