WAHYU 1 - ALLAH WENE FANO WENE

¹ Buku su, fobik di deheg su deheg folo-folo duhu ale, nit at amingming angge neneluk amag ulug, at Allah en Yesus Kristus hweag-itsi mu, nit unug-nesasi anyo su. Allah en Yesus Kristus hweag-itsi mu, aren an at amingming angge Yohanes unug-nea wamag ulug, boholma yonggo mondotuk on malaikat misig an nakit mondorik wahasi.

² Unug-nea wahasi mu, an Yohanes en nil hauihik on mundoho fagdoho bilinggoho lisu balduk kahi su. Ne, Allah wene Yesus Kristus en demdoho fagdoho hweag-nesasi wene fahet lisu balduk kahi.

³ Wene ai dip-uhu salim horog aik waharuk mu, ap eke en ap homi enesanggo holukwag ulug duhu ale unug-nitsi wene su kumu heheg bilingguruk anyo inim, ne, duhu ale wene lisu baleg su bilingguruk mu, ap homi en enesanggo hole folug, furoho duruk anyo oho, Allah en fanoap enepuk mu enahayeg bohup.

It Yesus omaliki o sabiren kabogdeg anyo dang-enepfag wene

^4-5 An Yohanes en hit nori nerekwi Yesus omaliki o propinsi Asia o domog sabiren kabog-duruk kahep anyo dang-henebihi. At atam inim, ketia inim, fobik inim mundoho eitog wereg on Allah anyo mel, ne, Allah en ap homi fahat-enesug lit takhta fam wereg kweleg, ap homi eneheime hag enebe sabiren olohotma obahet duruk kwit, wereg anyo mel, at Yesus Kristus mun furebelug dipdoho neg fagdoho hweag-nesauk on, it ap homi waratuk men, owan enoluk atlug inam fug mu, atam oluk atlug inatsireg, it di ap su ap kwenangma on enaknisi raja mundoho sebeleg kweleg, at neg Enakni wereg on anyo mel, enenda hundig en henelaheg beheg, henenda hambukdoho henobahakeg, henebukwag. At Yesus Kristus enda hundig nenepuk kwit, nit siag duruk mu nesalug, waratuk kwit, amep hililig fam wundetdoho nenobahasireg,

⁶ Allah apma nenobahalug, at Akni Allah obahet neg duruk kamag ulug imam unduhuk nenobahasi. Aireg ma, at Yesus Kristus along wereg on unuk mundoho mundoho leho foruk kamul. Amin.

⁷ Furiek! At hena anggelegkwe waharuk mu, di ap homi su ap homi enunggul unuk domog, it at ware fousa on mundoho inim enemu hundomog en at inil hahupdeg, enenda wat-dauk kwit, oba siagdoho yatuk kamuhup. Demdoho duhu.

⁸ Atam welatfag inim, ketia wereg inim, fobik welaruhu inim, at mundoho eitog omamne along humon wereg on Nenakni Tuhan Allah en uruk kwit, “Indip onggombi an neg welahi,” ulug, uruk.

At Yohanes en o Patmos wereg lit, a hag fam Kristus ebe il hebag wene

⁹ Hit henobam anggin-fanggin henobaharuk kweleg, Allah apma henobahaku angge re, “Fano,” ulug, Yesus hinim hundig lit, henenda hambukdeg lit, wauk kahep ai, an henowe Yohanes oho higitdoho napuk kweleg, wauk kahi. An den Allah wene Yesus Kristus en demdoho fagdoho hweag-nesasi wene anyo hweag-esauk katihik mu, ik laut yenggeleg bul kwenang hukdegma o pulau Patmos suma hele waroho nobahaik wahausa ma, welahi.

^10-11 Wereg kweleg, Tuhan mot-duruk salim hari Minggu anyo fam Allah Aheime nobam atsi mu, an nambol fil en ap ele humon uruk kwit, “Hat hil hamihin on ai, buku fam lisu bale folug, it Yesus omaliki o Efesus inim, Smirna inim, Pergamus inim, Tiatira inim, Sardis inim, Filadelfia inim, Laodikia inim, o domog sabiren kabog-duruk anyo enobam mondoriyug,” ulug, bohweap trompet ele hag, uruk on nesanggo holdihik.

¹² Nesanggo holdihikdeg, “Ap san hweag-nutuk e?” ulug, nil fu hamin ulug nalukwe endenoho fu hauk men, lampu owag emas fam buhundeg angge sabiren wereg ma hauihik.

¹³ Ne, lampu owag sabiren anyo anggelegma bul etma, ap homi enorohole hag ap eke wereg ma hauihik. Ap anyo asum yaron ummen bekit eyogma wan-debelug, amigmu saniog emas on bugdeg welaheg,

¹⁴ suwe bondol oruk mun kuron wereg hag, at oruk de huplu sanggunuroho welaheg, ne, il anggen de indok ambulbul duruk hag deheg,

¹⁵ ne, eyog de bosie tembaga orohole mun fano amag ulug indokma amorolengdoho yalduk men, helag-felag angge duruk hag, deheg, ele re ik hul humon wamburuk kwit, aplohok dung uruk hag, eheg,

¹⁶ at enggik bekit fil en sohwalanggen sabiren foroho welaheg, ambilikmen karog yaron aeg foma foma maho on wilibik waheg, ne, orohole re mo nukoho bik bul yatuk kwit, ambogbag duruk hag deheg, duruk mu, hauihik.

^17-18 At ebe airoho wereg ma, nil hauihikdeg, ap wareg on hag eyogma ying-atihik famen, enggik bekit fil en nobam sen-napuk kwit, “An noluk neitog wereg lit, indip inim onggombi inim, an welahi mu, hakol bouk fug. Waratihikdeg famen, furin, mundoho noluk wereg lit, waratuk indip inim, ap homi waratlug lauk mu inim, an neg hwalduk kwit, sok husuruk angge ki anggen an foroho lahi.

¹⁹ Ai halug, ketia duruk ale inim, fobik aruhu ale inim, mundoho hat hil hehen on mel, hahun on mel, lisu baliyug.

²⁰ Sohwalanggen sabiren an nenggik bekit fil foroho welahi hehen ai inim, ne, lampu owag emas fam buhundeg sabiren hehen anyo inim, ai dot heraho hag deg ma, indip fagdoho hweag-hirik. Sohwalanggen sabiren ai re, it Yesus omaliki kabog-durukmu fahat-enesug wereg on malaikat sabiren anyo fahet hehen. Ne, lampu owag sabiren ai re, Yesus omaliki o domog sabiren kabog-duruk on anyo fahet hehen,” ulug, hweag-nutuk mu, hauihik.