TITUS 3 - ALLAH WENE FANO WENE

Allah omaliki halug, duruk kamuhup wene

¹ It ap homi en pemerintah inim, it ap enalong wereg on inim, enapma wereg lit, enele holeheg, duruk ale eke fano enam atuk halug, “Duruk kamul,” ulug, boruk kamag ulug, hweag-esauk kamin.

² Ap eke siahap biahapdoho feheg, yeik yabeheg, duhup de fug. Ite, enenda sakoreg wereg lit, di ap su ap abirangge enelaheg boruk kamag ulug, hweag-esauk kamin.

^3-4 Nit oho endam nenapelegdoho morue hag welaheg, wene hweag-nesauk on holuk fug angge welaheg, kwe kwaniroho laheg, ap eke amingming angge hweag-utuk halug, “Yu o,” ulug, duruk anyo hag, nit nenenda nauk halug, duk ale nenepuk anyo mutlug laheg, duruk katuhuk. Di angge su angge dil lauk kwit, siag neg deheg, duruk katuhuk. Nerim-herim eheg, nolok-holok deheg, ai on neg duruk katuhuk famen, nenahap wendatuk on Allah di ap homi su ap homi enelaheg en fanoap debeseruk on anyo enam aik wahasireg, nenahap wendat-nenepsi.

⁵ Nit fano duruk katuhuk fam nenahap wendat-nenepsi fug. Ite, at amu endan nenelaheg bolug, fanoap nenobaharuk kwit, Allah Aheime fene en nenenda siag horoho folug, obalma ket ondoho nenobahakeg, nenoluk kerap nenebeheg, disi ai fam nenahap wendat-nenepsi.

⁶ At Allah en nenahap wendatuk on Yesus Kristus disi fene en Allah Aheime hililoho og-nesasi.

⁷ At Allah enda hundig en nenepsi fam nenesiag elehapdoho folug, nit at apma fanoapdoho nenobahasireg, ap eke akni abinggi angge hwelauk hag, nit neneluk mundoho welamuhuk on, nenenda ebereg anyo hwelahuk en, Allah Aheime hililoho og-nesasi.

⁸ An wene hweag-hirihi ai demdoho. It ap homi Allah wene demdoho boruk anyo, enenda fu debelug, di fano su fano duruk kamag ulug, an hweag-hirihi wene ai hundig-hundig hele omamne fam hweag-esauk kamin. Wene ai, “Fano,” ulug, wauk fam fanoap dahup mu, hweag-esauk kamin.

⁹ Wene ambiangma fano dahup fug wene nim, henombasi endag-atil watfag wene inim, Musa wene baleg fam, “Diroho airoho,” uruk kwit, yeik yapuk inim, ai dil lauk kwit, ambiangma etma eke fano dahup fug ale fahet dil lauk mu, besehun fano.

^10-11 Ap homi enenda kahalduk on anyo en fano wene fotog-esalug, siag neg dil lauk fam, enggali aruhu angge fahet dil lauk mu, holukdeg ma, birenam komo-debelug, fotog-esahun o.

Duruk kamag ulug, wene ambiangma hweag-etfag wene

¹² An den ap Artemas ane, ap Tikhikus a, mondorik waharuk nealug, o sanim waruhu li em fam, o Nikopolis etma welaruhuk berihik mu, wereg ma folo-folo nea manu.

¹³ Wene bilingguruk on ap Zenas anyo mel, ap Apolos mel, folo-folo mon-enebik waharuk kwit, enangge eleg halug, og-esakiyug o.

¹⁴ It nenomaliki ai, e anggen yihiruk eleg on hag welam no, enangge eleg halug, wauk kamag ulug, yabuk furoho duruk ale melal-dauk kamag o.

¹⁵ It ap ninim welahe on abirangge en dang-henepuk. Ne, it Allah wene demdoho bolug, ninim nenenda hundig, hinim welahep etma abirangge, “Dang-henepuk,” ulug, hweag-esakin. Allah henelaheg en fanoap henepuk karuhu. Namloho e! An Paulus en balihi.