TITUS 2 - ALLAH WENE FANO WENE

Wene wirik wene halug neg, hweag-esauk karuhun hweag-etfag wene

¹ Hat Titus neg de, wene hweag-esauk kahen anyo re wirik wene halug neg, hweag-esauk kamin.

² It ap sobal on ai re, enenda hwal-dauk on nim, enalongdeg boruk on nim, it enenda wereg on inim, it wene enenda demdoho bolug wausa on hambukdoho foroho wereg on nim, ap airoho on welamag ulug, hweag-esauk kamin. Ap homi abirangge demdoho enenda hundig enebeheg, ne, anggin enobam atuk halug, enolokdoho wereg lit weheg, duruk kamag ulug, hweag-esauk kamin o.

³ It homi sobal on ai, it duruk ale furebelug, Allah mot-duruk kwit, duruk kamag ulug, it ap sobal on hweag-esahun ulug, hweag-hirihi anyo hag, higitdoho hweag-esauk kamin. Hunhun ale il laheg, ahalue wenenebo duruk on homoroho nenggeg, ai duruk kamuhup fug. Ite, wene fano wenggeloho homi duhum hweag-esauk kamag ulug, hweag-esauk kamin.

^4-5 Allah wene siahap-biahapdoho fouk no, it homi duhum anyo en enehunsi nim, enomaliki nim, enenda hundig enebeheg, enenda wereg aheg, enehunsi enelaheg en inil wamboroho noruk kaheg, enobam neg furoho welaheg, homi fano enehunsi enapma wereg lit, enele holeheg, duruk kamag ulug, it homi sobal on anyo en it homi duhum ai, komo-enepuk kamag.

⁶ Ne, it malik on sauwe on ai, airoho enenda wereg welamag ulug, komo-enepuk kamin.

⁷ Hat fam ap homi wal-heheg duruk kamag ulug, hat di ale su ale duruk kwit, fano neg dil lauk kamin. Dil lauk kwit, hat wene hweag-esauk kahen anyo, hat hele eke dopnoroho hesangge hweag-eseheg, halong eleg angge we unda hel-hel hweag-eseheg, duruk kam fug. Ite, halong wereg lit, hweag-esauk kahen halug,

⁸ it ap hele, “Nenerim,” boruk on anyo en wene siag hweag-esauk mu, fu-hobahalug, nit sebele nenobahakuk boruk famen, eleg ma, it enenggali amag ulug, wene wirik wene henggali ware hobahauk fug on anyo neg, hweag-esauk kamin.

⁹ It ap homi enamingming angge anyo en, enaknisi enele hole folug wene onggo hweag-esa fug angge enahayeg neg bohup en duruk kamag ulug, hweag-esauk kamin.

¹⁰ It ap homi enamingming angge anyo re, enaknisi enangge yoholi angge herahakup ousa. It anyo en we di deheg su deheg, furoho duruk kwit, fano duruk fam ap homi hesangge on anyo en, nenahap wendatuk on Allah wene wahuk boukwag ulug, “Heneknisi enengge wa fug angge furoho hwalduk kamek,” ulug, hweag-esauk kamin.

¹¹ Allah enda hundig en og-nesasi wene anyo it ap homi abirangge enahap wendarukwag ulug, og-nesasi.

^12-13 Nenakni humon Allah Yesus Kristus nenahap wendatuk on yanderuruk kweleg, enam aik waruhu anyo, nit nenenda ebereg lit, nenahayeg fam nangno-hauk kweleg, Allah enda hundig en hweag-nesauk kwit, “Hit o kwenangma suma wereg lit, Allah henakol bouk fug angge siag duruk kahep inim, kwenangma duk ale henenda nauk inim, embeselug, henenda wereg atlug, siag duk fug angge fano neg duruk kwit, Allah wene furebelug welamek,” ulug, hweag-esauk kamin.

¹⁴ Nit di siag su siag duruk kahe anyo, ekenim duruk kahe ha no, nenonggo baloho loloho nenobahakeg, ne, at omaliki at obahet eneg wereg lit, fano duruk ale nenenda ahanhan fam dil lauk kamag ulug, nenesiag horoho nenobahakeg, dukwag ulug, nit nenobahet waraik wahasi.

¹⁵ Wene su hweag-esauk kwit, “Diroho duhup, airoho duhup,” ulug, melal-enebeheg, hele omamne fam komo-enebeheg, duruk kamin. Ne, ap homi abirangge en hat sebele hobahauk no ulug, halong weregdoho duruk kamin.