ROMA 4 - ALLAH WENE FANO WENE

Abraham demdoho bebag fam fanoap debebag wene

¹ Aireg ma, nit Yahudi nenomba Abraham debag wene ai, nanggoho uk?

^2-3 At debag fam, Allah en fanoap debebag halug, ai fam dip-debelug leho fahat-da on de, “At Abraham en Allah demdoho bolug enda at fam dip-debebag fam Allah il hanim fanoapdoho febag,” ulug, lisu baleg wereg ai fam, Allah en debebag ma, at il hanim leho fahat-dauk ale ai siag.

⁴ Ap eke yabuk wutuk on en, onggo og-utuk kwit, “Su we og-hirihi,” ulug, hweag-utuk eleg. Ite, “Su yabuk wirehen fam onggo og-hirihi,” ulug, uruk.

⁵ Hiren, “Allah en at il hanim fanoapdoho nobahaukwag ulug, nangginik?” bouk fug angge wereg lit, it siag duruk on fanoapdoho feseruk on Allah anyo, demdoho bolug henenda at obam dip-deberuk hesalug, hit demdoho boruk ai fam Allah en at il hanim fanoapdoho henobaharuk mu, “Hit fano hisihi,” ulug, ahayeg boruk karuhu.

⁶ Ne, hiren, “An fano da,” ulug, dauk eleg kweleg, Allah en neg fanoapdoho henobaharuk halug, Henahayeg boruk kamuhup, ulug, at Daud anyo en ebag wene higitdoho hweag-hesauk kahi.

⁷ At Daud en uruk kwit, It Allah ele sahalduk on anyo, Allah en apeleg apdoho feseheg. Ne, it siag duruk anyo, enesiag eleg apdoho feseheg, duruk halug ai, enenda enahayeg boruk kamuhup.

⁸ Enakni Allah en it siag duruk on enggik wenako hweag-esauk eleg halug ai, enenda enahayeg boruk kamuhup ulug, ebag.

⁹ Nenenda nenahayeg boruk kamuhuk wene ebag ai, enahap baleg ai neg enobahet neg ebag ane? Baleg eleg on inim mundoho enobahet ebag a? Eleg. “At Abraham en demdoho bolug enda Allah fam dip-debelug welatfag ai fam, at Allah en at il hanim fanoap debebag,” ulug, Allah wene lisu baleg emberimmu hweag-hisihi anyo deg ma,

¹⁰ Abraham nangginig kweleg, Allah en at il hanim fanoap debebag behep? Ite, ahap baleg eleg kweleg, fanoap debebag ane? Baleg kweleg, fanoap debebag a? Baleg kweleg fug. Ite, baleg eleg kweleg, atam fanoap debebag.

¹¹ Ai en, fobik at ahap balfag ai, at Allah en demdoho at ahap baleg eleg kweleg, “Hat fano hiihi,” ulug, hweag-etfag anyo ap homi enoluk amag ulug, fobik at ahap anyo, “Baloho hwik-esakin!” ulug, hweag-etfag. Ne, ketia it enahap balduk eleg famen, it Allah demdoho boruk fam, at Allah en, “Hit fano hisihi,” ulug, hweag-esauk ai, it enomba Abraham.

¹² Ne, enahap baleg ai mel enomba Abraham. We enahap baleg ai fam enomba eleg. Ite, at Abraham en ahap balduk eleg kweleg, demdoho bolug enda Allah fam dip-deberuk kwit, duruk katfag anyo hag, nit airoho demdoho boruk kahe halug neg, nenomba Abraham.

Nenenda demdoho bohuk fam at Allah en abug hweag-etfag anyo hwelahuk wene

¹³ At Allah en, “Hat Abraham hombasi hinim, di o su o kwenang henonggwareg amuhup,” ulug, abug hweag-etfag ai, Allah en Musa wene hweag-etfag anyo wauk katfag fam hweag-etfag ai re fug. Ite, at Abraham enda Allah demdoho bebag fam, “Hat fano,” ulug, abug hweag-etfag.

¹⁴ Allah en Abraham abug hweag-etfag wene ai, it ap homi Musa wene melaleg anyo furoho duruk fam hwelahup ulug, debeselep man, nit demdoho boruk fam hwelahuk boruk kahe wene ai, we alemaroho deg lalep. Ne, Allah en abug hweag-etfag anyo mel, we alemaroho hweag-etfag boruk kala.

¹⁵ Allah wene melaleg wereg ai fam Allah olok nenobam nenobaharuk mu hauk kahe famen, ap enewene melaleg eke eleg lalep man, nit ap homi en wene melaleg sahaluk fug alereg ulug welala.

¹⁶ It ap homi Musa hweag-etfag wene wauk on inim, ne, at Abraham enda demdoho bebag hag, it demdoho boruk on inim, nit mundoho nenomba Abraham deg ma, Allah en abug hweag-etfag wahuk ai, nit duruk kahe fam de fug. Ite, “Demdoho boruk fam Allah enda hundig lit onggoleg we hwelauk on nenobaharuk hihi,” boukwag ulug, hweag-etfag.

¹⁷ Ai hweag-etfag anyo, “Di ap homi su ap homi mundoho hat enomba apdoho hobahaki,” ulug, hweag-etfag wene lisu baleg wereg anyo hag, mundoho enomba atfag. Ne, ap homi waratuk on enoluk apdoho feseheg, ele fam neg di angge su angge eleg man wereg apdoho feheg, duruk mu, at Abraham demdoho bebag on Allah anyo en hweag-etfag halug, demdoho ebag boruk kahe.

¹⁸ “Hat hombasi humdoho saha uhu,” ulug, hweag-etfag anyo, duk fug alereg kweleg famen, wene ai fam demdoho bolug enda mundoho dip-debebag ma, hweag-etfag wene lisu baleg anyo higitdoho, ap homi humdoho enomba atfag.

¹⁹ At Abraham at onggwareg en de, “An nebe ondoho kweleg, 100 tahun hagdoho welahi mu, mun sobal atihikdeg, nomaliki endag-enebuk fug ale atihik. Ne, nohwe Sara anyo mel ibilireg ma, omalik enderuk fug alereg,” ulug, olukdeg latfag famen, enda Allah fam dipdeg anyo embesouk fug angge dip-deberuk katfag ma,

²⁰ abug wene hweag-etfag anyo, “Aruhu ane, eleg a?” bebag fug. Ite, endan, “Mundoho demdoho duhu hihi,” boruk kwit, Allah leho foruk katfag.

²¹ “At Allah omamne humdeg ma, hweag-nereheik ai, demdoho duhu,” bolug, enda mundoho wene ai fam dip-debelug welatfag ai fam,

²² at Allah en, “Hat fano hiihi,” ulug, hweag-etfag.

²³ “Hat fano hiihi,” ulug, hweag-etfag ale lisu baleg wereg ai, at amu neg fano debebag halug neg ebag fug.

²⁴ Ite, nit Allah il hanim fanoapdoho nenobahukwag ulug Tuhan Yesus waratuk men, oluk apdoho unduhuk fesi anyo demdoho bolug, nenenda at obam dip-deberuk kahe anyo mundoho nenobahet ebag.

²⁵ At Yesus waratsi ai, nit Allah ele sahaloho folug, di siag su siag duruk nesalug, warukwag ulug, og-eseheg, ne, nit Allah il hanim fanoapdoho nenobahaukwag ulug, oluk apdoho feheg, disi.