ROMA 3 - ALLAH WENE FANO WENE

¹ Ai halug, it Yahudi on ai, we alemaroho eneko fesebag behep? Ne, enahap bal-dauk ai, we alemaroho bal-dauk behep?

² Eleg. It duruk kamag ulug eneko fesebag ai, wene humdoho wereg ma, hweag-hesa. Eke, Allah en, “An nawene it foroho lamag,” bolug, hwalduk on debesebag.

³ Debeseruk kweleg, it foman furoho duruk eleg halug, nangginoho behep? Furoho duruk eleg halug, at Allah en it debesehuk ulug, wenggelfag anyo, furebelug, debesehu fug behep?

⁴ Eleg. Debesehu. “Hat uhun on neg de, demdoho boukwag ulug, uhup. Ne, hawene lebegdoho bilingguruk fam, haren uruk kahen ai, demdoho bohup” ulug, lisu baleg ai hag, ap homi mundoho seiale wene uruk famen, Allah neg de demdoho neg uruk.

⁵ Nit siag duruk kahe famen, “Hat Allah fano neg duruk kahen on enegdoho heaul mu, nit nunggwelug holok en siahap-nenepuk kahen?” ulug, ap homi en uruk hag, “Allah su fureg eleg angge nenepuk mu hauk kahe,” ulug, airoho hweag-erehe halereg behep?

⁶ Eleg. Nit siag duruk kweleg famen, onggo siahap-nenebuk fug angge sebeloho nenobaharuk halug, nangginoho di ap homi su ap homi en-enebuhu behep? Eleg.

⁷ Ne, an den uruk kwit, “An seiale wene uruk kahi famen, hat Allah demdoho neg uruk kahen ename hobaharuk nealug, ap homi en leho hobaharuk mu, nunggwelug hat siag duruk kahen hweag-nutuk kahen?” ulug, ihi halereg behep? Airoho ihi ha fug alereg.

⁸ Ne, it eke en uruk kwit, “Paulus mel en diroho uruk. Nit siag duruk mu, ambiangma Allah leho foukwag ulug, siag dukohon,” ulug, enepenendoho nenebug balduk ai, ap homi airoho uruk on ai re, Allah en unggum enobam fohu.

Di ap homi su ap homi fano duruk eleg, siag neg duruk wene

⁹ Airoho deg ma, nit Yahudi on neg along, ne, it ap homi dagma holduk eleg on maben deg behep? Mun eleg.

¹⁰ Allah Wene fam baleg higitdoho. “Ap misig eke fano duruk on wereg fug. Ap eke enda wenggeleg on mundoho wereg fug.

¹¹ Misig eke en airoho Allah enda boruk hag, Duhuk, ulug, mun boruk eleg.

¹² Ap homi mundoho Allah enambolhan embeselug, we hesangge enendan bolug, dil noruk kwit, eke fano duruk fug, mun siag neg dil noruk.

¹³ It ap homi waratuk on enamben saha uruk hag, it enambilikmen seiale wene eheg, kisu wese aeg kamol fam enowatuk mu waratuk hag, enele famen airoho ap homi enowatil laheg, duruk.

¹⁴ Enele famen wene mun siag olok on neg, ap homi bet-enepuk kwit, hururungdoho feseil laheg,

^15-17 enenggik ambiang fam ap homi folo-folo enowatil laheg, ap homi inim sebereg fano welam ale, Nenerim, ulug, di o su o lauk kwit, hesangge lal-fal enebil laheg, duruk

¹⁸ Dil lauk kwit, Allah nakol e! ulug, mun bouk fug angge wereg,” ulug, lisu baleg ai hag, nit Yahudi on nim, it ap homi dagma holduk eleg on nim, mundoho siag duk ale neg nenepuk mu, ulug, hweag-hisihi.

¹⁹ Ai halug, Allah en, “Diroho diyug, airoho diyug,” ulug, melaloho Musa hweag-etfag wene anyo mundoho it wene ai oho folug, duruk ai neg enobahet de fug. Ite, di ap su ap mundoho enele elehapdoho feselug, siag onggo og-esowag ulug, wene melaloho hweag-etfag hauk kahi.

²⁰ Allah en wene melaloho Musa hweag-etfag wene anyo, duruk fam ap homi fano enebukwag ulug, hweag-etfag fug. Ite, “An siag duruk kahi hihi,” ulug, enegdoho hauk kamag ulug, ebag ma, wene melaleg Musa hweag-etfag ale duruk fam Allah en, “Hat ap fano,” ulug, uhu fug.

Enenda demdoho boruk fam Allah il hanim ap homi fanoapdoho feseruk wene

²¹ Allah en at il hanim ap homi fanoapdoho feseruk ai, Allah en Musa hweag-etfag wene anyo mel, it endam Allah wene hweag-esauk katfag on nabi anyo en ebag wene anyo mel, lisu baleg higitdoho enam atsi mu, Musa wene melaleg duruk fam de fug.

²² Ite, Yahudi on mel, dagma holduk eleg on mel, Yesus Kristus demdoho bolug, obam dip-deberuk halug neg de, Allah il hanim fanoapdoho feseruk.

²³ Nit mundoho siag neg dil lauk kwit, Allah en nit ap fano leho welamag ulug bebag anyo hagdoho am fug angge welahe famen,

²⁴ Allah enda hundig en onggoleg we nenepuk kwit, at Yesus en nenonggo bale folug, loloho nenobahasi anyo fam Allah il hanim fanoapdoho nenobahasi mu welahe.

^25-26 Atam, it ap homi siag duruk kweleg, Allah enda sakoreg lit, fesebag famen, ketia neg de, siag duruk nesalug, ambiangma dipdoho duruk mu, nit nenendan Yesus demdoho boruk nesalug, at Yesus waratsi mu amep wilipsi anyo fam, Allah enda sakoroho foruk kwit, nit siag duruk on nenesiag elehapdoho nenobaharuk kamag ulug, at Allah en Yesus waruhup ulug, wepdoho febag. Airoho debag fam, aren ambiangma dip-nenobahakeg, ne, nit ap homi Yesus demdoho bolug, nenenda at fam dip-deberuk kahe nesalug, Allah il hanim fanoapdoho nenobahakeg, duruk mu howag ulug, disi mu, ulug, hweag-hesauk kahi.

²⁷ Airoho disi mu, indip ke fam winik-wonog uruk kahep? Indip eleg kweleg, nunggwangge fam dip-debelug, winik-wonog il lauk kahep? Hit Allah wene melaleg higitdoho duruk kahep fam dip-debelug winik-wonog uk ale fano behep? Eleg. Nenenda demdoho boruk fam neg Allah il hanim fanoapdoho nenobaharuk mu, ai fam dip-debelug, henahayeg hehep halereg.

²⁸ At Allah en, “Diroho diyug, airoho diyug,” hweag-etfag on wauk kahe fam fanoapdoho nenobahaku ai eleg. Ite, demdoho boruk fam neg Allah il hanim fanoapdoho nenobahaku ai hauk kahe.

²⁹ At Allah ai, it dagma holduk eleg on enakni fug, it Yahudi on neg enakni deg ma, ulug, uruk kahep? Eleg. Dagma on inim enakni.

³⁰ At Allah ai, misig neg wereg ma, enahap baleg on nim, baleg eleg on nim, enenda demdoho boruk fam neg fano apdoho fesehu.

³¹ Airoho halug ai, nit demdoho boruk ai fam, Musa wene melaleg anyo sebeloho foruk kahe behep? Eleg. Wene ai at leho foruk kahe.