ROMA 2 - ALLAH WENE FANO WENE

Allah en it ap homi siag onggo debesehu wene

¹ Nori, nerekwi! It foma fahet neg siahapdoho feseruk kahep? Hit oho siag duruk kahep fug a? Eleg. Duruk kahep ma, hit eke en it duruk ale higitdoho duruk kwit en, it neg siahapdoho feseruk kahep halug ai, hit henonggwareg siahapdoho fahat-dauk kahep su hauk kahep?

² At Allah en ai, ap homi siag airoho duruk esalug, furoho neg siag onggo og-esauk mu, nenelukdeg.

³ Nenelukdeg ma, yaho! Hit oho airoho duruk kwit en, it eke duruk esalug neg siahapdoho feseruk halug ai, hit mel onggo siahap-henebuhu fug ulug, uruk kahep a? Onggo siahap-henebuhu.

⁴ At Allah en onggo folo-folo siahapdoho henobaharuk eleg ai, henelaheg en enda sako debelug, nangno-henepuk mu, at ele ai siahapdoho foul ulug, uruk kahep? Hit siag duruk kahep ale henenda wenggele folug, embesehup ulug, henelaheg en nangno-henepuk su hauk kahep fug a?

⁵ Allah enda airoho boruk famen, henobabut siag neg wereg ma hesalug, henenda omamne deg lahep ai, Allah olok en onggo siag furoho neg en-nenepuk ai salim, ebenaheg humdoho henebukwag ulug, dauk kahep ma hisihi.

⁶ At Allah en it ap homi duruk ale higitdoho onggo og-esahu.

⁷ Ne, it ap homi foman boruk kwit, “Allah en leho nenobaharuk kwit, nenalong wereg apdoho nabelal-habelal og-nesahu,” ulug, enenda mundoho hambuk debelug, fano neg dil lauk esalug ai, Allah en eneluk mundoho wereg on og-esahu.

⁸ Ne, it foman enonggwareg enobahet neg dahuk bolug, dil noruk kwit, Allah wene ebag anyo mutlug lauk eleg, siag neg duruk esalug neg de, Allah en, “Ap su mun siag,” ulug, olok en siahap enebuhu.

⁹ It di ap homi su ap homi siag duruk on mundoho ouk-bouk enebeheg, anggin-fanggin apdoho feseheg, duhu ai, Yahudi on debeseruk kwit, ap homi dagma holduk eleg on inim higitdoho debesehu famen,

¹⁰ it ap homi fano duruk halug neg de, Allah en leho feseruk kwit, enalong wereg apdoho, enenda we fano welamag ulug, it Yahudi on debeseruk kwit, it ap homi dagma holduk eleg on nim mundoho higitdoho debesehu.

¹¹ At Allah ai, ap homi enebe fano halug neg furebeseruk eleg ma, airoho enebuhu.

¹² It ap homi dagma holduk eleg on ai, at Allah en Musa wene melaleg hweag-etfag wene enapelegdeg lit, siag duruk kamuhup fam, waramuhup famen, it Yahudi on neg de, at Musa wene hweag-etfag wene enelukdeg lit en, siag duruk kamuhup mu, at Allah en wene hweag-etfag ai fam enda dip-debelug, hein og-enepuk kwit, en-enebuhu.

¹³ Allah en Musa hweag-etfag wene ai, we enesanggo neg holduk fam eleg. Ite, enendaman furoho oho folug ebe dil lauk fam Allah en, “Ap ai fanoreg hihi,” ulug, boruk.

¹⁴ It ap homi dagma holduk eleg on anyo en, at Musa hweag-etfag wene anyo enapeleg lit en, it enendan at ebag wene anyo higitdoho duruk halug ai, enapeleg lit en, at ebag anyo higitdoho duruk mu,

¹⁵ Musa hweag-etfag wene ai, mun enendama wereg hag deg lit en, eke, “Siag disi hihi,” ne, eke, “Fano disi hihi,” ulug, enendama ebet-atuk ai fam, Allah en wene melaloho hweag-esebag fug famen, enendama demdoho wereg hag hauk kahi.

¹⁶ Ne, an hweag-esauk kahi higitdoho at Allah en, it ap homi enendama herako wenggelduk anyo, Yesus Kristus en en-enebukwag ulug, unduhuk fesi anyo en en-enepuk li em, “Ai fano disi hihi, ai siag disi hihi,” ulug, enendaman ebet-atuk mu hahup.

It Yahudi Musa wene melaleg duruk fam enahap wendat-dahup fug wene

¹⁷ Hit Yahudi on neg de, nanggoho boruk kahep? Hit Yahudi on su, Allah en melaloho hweag-etfag wene anyo fam henenda dip-debelug, “Allah ai, nit neg nenakni,” ulug, winik-wonog eheg,

¹⁸ “Allah enda boruk anyo nit neneluk,” ulug, eheg, Musa melaloho hweag-etfag wene anyo fam, “Su fano, su siag,” ulug, enegdeg ma heheg, duruk kahep.

¹⁹ Ne, eke, “Nit su ap homi inil hupnig on kwe sen-eneplug laheg, o mum fam lauk anyo seleg fam lowag ulug, selehap enebeheg, duruk kahe on nit,” ulug, eheg,

²⁰ “Allah en ebag wene Musa melaloho hweag-etfag on nit neg foroho lahe ma, nit neg neneluk,” ulug, boruk kwit, ap homi enapeleg on hweag-eseheg, omalik doron biling-eseheg, duruk kwit en famen,

²¹ hit hwela fug angge wereg lit, enemu on halug neg hweag-esauk kahep ai, nunggwe fahet duruk kahep? Hiren ap homi hweag-esauk kwit, “Heraharuk ale ai ousa,” ulug, hweag-esauk kwit en, nunggwelug heraharuk kahep?

²² Hiren, “Homi baluk fug,” hweag-esauk kwit en, nunggwelug hit homi balduk kahep? Duhwi kembu wutuk ale ahaye duruk kwit en, hit de kembu obam wirigmu kulug, ebe ilirangge anyo herag-dauk kahep anyo eleg?

²³ “At Musa ebag wene hwalduk on nit,” ulug, uruk kwit en, Allah ele sahale folug, wene ebe siahapdoho foruk kahep ai, nunggwelug duruk kahep?

²⁴ “Hit duruk kahep famen, it dagma holduk eleg on en Allah unuk siahap-biahapdoho foruk ahi,” ulug, lisu baleg wereg anyo, hit Yahudi on oho duruk kahep ma hisihi.

²⁵ Henahap bal-dauk kahep ai, at Musa hweag-etfag wene wauk kwit, baloho hwik-esauk fano famen, wene foma anyo sahaloho embeseruk kwit, bal-dauk halug neg de, alemaroho bal-dauk kahep ma, hisihi.

²⁶ Ne, it enahap bal-dauk eleg on anyo en Musa hweag-etfag wene anyo oho folug, higitdoho dil noruk halug, Allah en, “It ap su enahap baleg eleg famen, baleg hag wereg,” ulug, og-enebuhu eleg behep? Og-enebuhu!

²⁷ Airoho deg ma, hit Yahudi ai, Musa hweag-etfag wene lisu bale folug, hwalduk kwit, henahap bal-dauk kahep famen, wene ebe duk fug angge sahalduk kahep ma, it enahap baleg eleg on anyo en wene demdoho duruk mu, henenggali ware henobahakup eleg behep? Ware henobahakup!

²⁸ It Yahudi en ondoho on enahap demdoho baleg sa mel? Eleg. Enebe ondoho on we enahap baleg ai fam, “Enebe Yahudi on,” uruk eleg.

²⁹ “It Yahudi on”, uruk ai, Musa hweag-etfag wene wauk fam eleg. Ite, enahap bal-dauk hag, at Allah en Aheime fam enenda eneg aleroho feseruk ai neg de, Yahudi on ai. It ap homi enenda airoho Allah en eneg ale debeseruk ai, it ap homi en leho feseruk eleg. Allah en neg leho feseruk.