MATIUS 6 - ALLAH WENE FANO WENE

Ap homi enelaheg bolug, enangge og-esauk kamuhup wene

¹ Hweag-esasireg, ekenim hweag-esauk kwit, “Ap homi en inil nesowag ulug, inil hanim di fano su fano duruk kahep ha no, fureberuk kamek. Airoho duhup halug, Henakni boholma on en onggo og-hesahu fug.

² Henangge ap homi enenggik eleg on og-esauk halug, it ap enonggwareg enenda furebahat-dauk fug on anyo, ap homi en nit fano boukwag ulug, somban uruk obam nim, kwema nim, Airoho dehe, ulug, hweag-isil noruk hag, hit airoho duk fug. It ap airoho duruk fam ap homi en yande-enepuk anyo re, onggo ai at hwelauk, ulug, demdoho hweag-hisihi.

³ Hit neg de henangge ap homi enenggik eleg on og-esauk kwit, An nangge ap homi airoho og-isihi, ulug, enolukdoho hweag-esa fug.

⁴ Ite, ap homi inil eleg ma herako og-esauk kamek. Herako og-esauk hesalug, Henakni herahoma duruk ale il hauk on anyo en onggo og-hesahu,” ulug, hweag-esasi.

Somban uruk kamuhup wene

⁵ Hweag-esasireg, ekenim hweag-esauk kwit, “It ap yamdal on duruk on anyo, Ap homi en inil nesowag, ulug, somban uruk obam nim, kwe humon handohwal durukmu nim, etma unduhuk lit, somban uruk ale neg enenda enahayeg boruk hag, hit somban airoho uruk kam fug. It ap airoho duruk ai fam, ap homi en yande-enepuk anyo re, onggo ai at hwelauk, ulug, demdoho hweag-hisihi.

⁶ Hiren neg de, somban ul boruk halug, henobam kuluhupdeg sok lare folug, Henakni herahoma wereg lit, duruk ale il hesauk on anyo heng-duruk halug, onggo aren og-hesahu.

⁷ Hit somban uruk kwit, it ap dagma holduk eleg on en, Nenele yatdoho uruk nesalug, nenele holmisi, ulug, abi-babi ale duruk hag, hit airoho somban uruk kam fug.

⁸ Hit henangge eleg halug, anggolo boruk kahep ai, owan heng-duruk eleg kweleg, Henakni mun olukdeg ma, it ap ai en uruk hag, hit airoho uk fug.

⁹ Ite, hit somban su hagdoho uruk kamek. Nenakni boholma on, yehei. Hat hamu eneg welahen ma, leho hobaharuk kamag ulug, let-nenepuk kamin.

¹⁰ Nit ap homi mundoho hat hapma welamuhuk en nenobahaik ma. Boholma on en hat henda boruk kahen ale duruk anyo hag, nit kwenangma suma airoho duruk kamag ulug, nenebin.

¹¹ Yoho nenesiburu naul on, hat higitdoho og-nesakin.

¹² Ne, it ap nit siahapdoho nenobaharuk anyo, nenepeleg apdoho foruk kahe hag, haren nit siag duruk kahe anyo mun hapeleg apdoho nenobahain.

¹³ Nenobabut balukwag ulug nenobahaik la fug. Ne, at mun siag on anyo en siahap-nenebuk no nenahap wendarin, Nenakni Allah, ulug, uruk kamek.

¹⁴ Hiren ap homi siahap henepuk mu henepeleg apdoho foruk kahep halug, at Henakni boholma on en hit siag duruk kahep on oho mun apeleg apdoho henobahaku.

¹⁵ Ne, hiren ap homi siahap henepuk mu henepeleg apdoho foruk kahep fug halug, at Henakni boholma on en oho siag duruk kahep on apeleg apdoho henobahaku fug,” ulug, hweag-esasi.

Siburu na fug angge wereg lit, somban uruk kamuhup wene

¹⁶ Hweag-esasireg, ekenim hweag-esauk kwit, “Hit siburu na fug angge henambilik hweang hag welamul boruk kahep halug ai, it ap enonggwareg enenda furebahat-dauk fug on anyo en, Nit nenambilik hweang hag wereg kweleg nesowag, ulug, enorohole ambum wereg dauk hag, hit airoho duruk kam fug. It airoho duruk fam ap homi en yande-enepuk anyo, it onggo ai at hwelauk, ulug, demdoho hweag-hisihi.

^17-18 Hit neg de, hit siburu na fug angge henambilik hweang hag welamul boruk kahep halug, ap homi inil hesa fug men, Henakni herahoma wereg on neg il hesowag ulug, kume wareheg, heneruk bilinggeheg, debelug, wereg lamek. Ai duruk halug, Henakni herahoma duruk ale il hauk on anyo en onggo og-hesahu,” ulug, hweag-esasi.

Enangge andogdoho boholma fahat-dahup wene

¹⁹ Hweag-esasireg, ekenim hweag-esauk kwit, “Kwenangma suma re, henangge nobulong en baleheg, ip-deheg, it ap heraharuk on en sok husoho henangge herahaik kweheg, durukmu suma henangge andogdoho fahat-dauk kam fug.

²⁰ Ite, nobulong en baleheg, ip-deheg, it ap heraharuk on en sok husoho henangge herahaik kweheg, duruk elegma boholma etma re henangge kabogdoho monde fahat-dauk kamek.

²¹ Henangge andogdoho weregma, henenda etma wereg laruhu,” ulug, hweag-esasi.

Henebe o seleg duruk ai, hinil, hweag-esebag wene

²² Hweag-esasireg, ekenim hweag-esauk kwit, “Henebe esahe fisaho hag seleg ai, hinil. Ne, hit hinil fano wereg halug, henebe nim selegdeg welamuhup famen,

²³ hinil siag wereg halug neg de, henebe mundoho o mumdeg hagdoho welamuhup. Ai halug, seleg henendama wereg anyo seleg wereg fug famen o mum wereg halug ai, henebe o mum alongdoho mundoho welamuhup angge re, furebeiyek,” ulug, hweag-esasi.

Allah inim, henangge nim, seberebelug mutlug lahep ha fug alereg, hweag-esebag wene

²⁴ Hweag-esasireg, “Ap eke en aknisi biren enamingming angge atlug enobahet duruk kam fug alereg. Birenet enobahet dil lauk halug, eke erim boruk kwit, eke enda hundig beheg, ne, eke en dimihin hweag-utuk ale anyo, sakoroho duruk kwit, eke en duruk ale hweag-utuk anyo erim beheg, duhu. Hit en Allah nim, kwenangma angge henenggik wereg dauk anyo nim, inim ambine mutlug la fug alereg,” ulug, hweag-esasi.

²⁵ Hweag-esasireg, “Ai halug, hiren, Neneluk welamuhuk en, nenahaik nenesiburu nunggwangge naul? Ne, nenebe fano welamag ulug, nenesum nunggwangge wan-daul? ulug, henenda wenggelduk kwit, henenda firig welam fug, ulug, hweag-hisihi. Ne, nauk kahep ai along, ne, heneluk welamuhup ai, mabendeg behep? Ne, wan-dauk kahep ai along, ne, henebe fano welam ale ai, sebeleg, boruk kwit, henenda firig welahep? Eleg.

²⁶ Suwe bohol kwe noruk angge ai kumu esakiek. Iren a yag-deheg, anggen baloho iring-deheg, duruk eleg famen, hit Henakni boholma on en enesiburu og-esauk anyo hit henepeleg ma uruk kahep? Suwe ai, enda hundig eleg hag kweleg, og-esauk famen, hit neg de, enda hundig humon wereg lit, og-hesahu fug, ulug, uruk kahep?

²⁷ Hit eke waramuhup sali horog aik waharuk kweleg, we henenda wenggeldil lauk fam, Noluk lohon ekenim welalereg warale, ulug, henenda wenggelduk kahep anyo higit aruhu behep? Am fug alereg.

^28-29 Airoho eleg kweleg, nunggwelug henahap fam wan-dauk on neg henenda firig welahep? Owil angge leimu laharuk anyo furebeiyek. At Salomo ap raja lit, asum fano on neg wandeg halug, ap homi en yanderuruk katfag anyo famen, ai mabendeg hag. It owil angge ai neg de, hekel soaleheg, yabuk wireheg, duruk eleg famen, Allah en hwal-enepuk kweleg, orohole mun fano yihiruk mu, ulug, hweag-hisihi.

³⁰ Enggelangge dagma angge ketia oluk lahakeg, ne, sono harep fisatuk halug, nenggeg, duruk famen, at Allah en orohole fanoapdoho deberuk mu, aren enggela anyo dorap debeheg, ne, hit anyo alongdoho hag henobahakeg, duhu fug ulug, uruk kahep? Eleg.

³¹ Duhureg ma, henenda firig wereg lit, nenahaik nenesiburu nunggwe naul? Ne, nenesum nunggwe wan-daul? ulug, ai neg henenda wenggeldil la fug.

³² It ap homi dagma on anyo en, ai on mundoho heraril noruk famen, hit Henakni boholma on en, Nit ai angge eleg, ulug, henenda boruk anyo, at olukdeg lit wereg ma, henenda firig lit, wenggeldil la fug.

³³ Ai halug de, hit atam hit heneluk anyo Henakni Allah apma henobaharuk kamag ulug, Yehei, beheg, ne, at fano mundoho duruk kamuhup boruk anyo, hit higitdoho duruk kamuhuk, ulug, momal-deheg, duruk kamek. Airoho duruk hesalug, aren henobaharuk kwit, hiren, Ai angge eleg ma, ulug, henenda boruk kahep anyo nim mundoho Allah en dopnoroho og-hesauk mu hahup.

³⁴ Aireg ma, sono duhup angge fahet yoho henenda firig welam fug. Yoho duruk on henenda wenggelduk kahep anyo anggin mun humdeg ma re, sono duruk on mel, henenda wenggeluhup ai ousa,” ulug, hweag-esasi.