MATIUS 3 - ALLAH WENE FANO WENE

At Yohanes Pembaptis en hweag-esa lauk katfag wene

¹ O ai salim at Yohanes Pembaptis ikma belap-enepuk on anyo en o Yudea leimu ap homi elegma wene hweag-isil lasireg, ap homi hweag-esauk kwit,

² “At boholma on apma henobahaku anyo horog aik wahasi mu, henenda wenggele folug, henesiag embeseiyek,” ulug, wene hweag-esa lasi.

³ Hweag-esa lasi ai, at Nabi Yesaya en wene hweag-esauk kwit, “Ap eke leimu ap homi elegma hum uruk kwit, Tuhan waruhu kwe fik-foukdoho yareheg, ne, at lauk karuhu kwe buhundoho yareheg, duruk kamek, ulug, il waharuk mu hahup,” ulug, ebag ai, at Yohanes fahet ebag.

⁴ At Yohanes anyo asum ai, wam unta oruk soaloho yihig folug sum wan-deheg, ne, ombahaluk de, wam ahap belangdeg on wan-deheg debelug, wereg lit, at asiburu ai re, bulue nim, kin ahalue madu nim nauk katsi.

⁵ Etma wereg ma, it ap homi o Yerusalem on mel, o Yudea on mundoho mel, Ik Yordan foma foma abirangge inim, enobam domog en at akit lausareg,

⁶ enesiag fag-duruk katswa ma, Ik Yordan ahummu belabe feseruk katsi.

⁷ Belap-enepuk mu, ap Farisi on nim, ap Saduki on nim, humdoho at akit ikma belap-nenebukwag ulug lauk mu esasireg, it hweag-esauk kwit, “Kisu ap homi enowatuk on kabogdeg hag de hit. Allah olok henebik waruhu anyo henebuk no, lil amuhup en husumbi san hweag-hesasi?

⁸ Henenda wenggele folug, henesiag embeseruhup halug, e anggen fano yihil lauk hag, hit airoho higitdoho duruk kamek.

⁹ Hiren, Nit fano, boruk kwit, Nenomba re ai Abraham, ulug, neg boruk kam fug. At Allah en helep su oko, Abraham ombasi buhundoho fesouk alereg ma, ulug, hweag-hesauk kahi.

¹⁰ E muko femin, ulug, yaha e indipmu mun wepdoho fesi mu, di e su e anggen fano on yihiruk eleg halug, muko indok menggalegma yaluhu,” ulug, hweag-esasireg,

¹¹ “An de, hit henenda wenggele folug henesiag embeseruk hesalug, ikma belap-henepuk kahi famen, at eke nombolim waruhu anyo en neg de, at ap along deg ma, an de sebeleg nahun en at eyog hetdeg on lolihi ha siag deg. Ne, an den ikma belap-henepuk kahi hag, aren Allah Aheime nim, indok nim, walug, henobam belap-henebik waruhu.

¹² Gandum anggen enerukwag ulug enetuk angge e sengdeg at enggikmu wereg ma, enetukmu mun ene folug, ebe halug neg ambolma kabogdoho lahabe feheg, ne, asinahap halug, indok nahul-atuk eleg ma kwelabe feheg, fesehu,” ulug, hweag-esasi.

Yohanes en Yesus ikma belapfag wene

¹³ Hweag-esasi mu, at Yesus anyo en, “Yohanes en ikma belap-nabukwag,” bolug, o Galilea en Yohanes Ik Yordan ikma wereg ma, akit lasi mu,

¹⁴ Yohanes en huli kwe baloho hweag-utuk kwit, “Haren an ikma belap-nabuk fano famen, an nakit wahen abi!”

¹⁵ Hweag-itsi famen, at Yesus en, “Nit airoho duruk fam Allah en di angge su angge fano neg duruk kamuhup bebag anyo, dip-uruk katmisi angge re, Fano, in,” hweag-itsi mu, “Fano,” isi.

¹⁶ Fano, ulug, ikma belabe fesi mu, Yesus ikman owan wilibik waharuk kweleg, bohol heale fesireg, Allah Aheime suwe bel hag da-da Yesus obam huraik wambik waharuk mu hasi.

¹⁷ Hasireg, boholman ele uruk kwit, “An namloho nenda hundig nahayeg napuk su,” ulug, uruk mu holsi.