MATIUS 26 - ALLAH WENE FANO WENE

At Yesus waruhuk, ulug, wenggelfag wene

¹ At Yesus wene ai mundoho hweag-esasireg, it at ele wauk on anyo hweag-esauk kwit,

² “Hup biren noholug soni Paskah eseruhup henelukdeg ma, esetuk salim, an Ap endag-atihik su, e salib fam dopno nobahakup ulug, nebe seneko, ap homi og-esahu,” ulug, hweag-esasi.

³ Hweag-esauk kweleg, it Allah il hanim duruk on imam enowesi inim, ap homi enowesi leho on mel, Allah il hanim duruk on imam leho on unuk Kayafas, obam ololuk etma kabog-duswareg,

⁴ Yesus herako sene-folug waruhuk ulug, inim wene balduk kwit,

⁵ “Ap homi it it wat-wat am no, soni esetuk salim senetuk ale, ousa,” uswa.

Hwe eke o Betania on en ahalue amben fano on Yesus fam hilili febag wene

⁶ At Yesus o Betania ap Simon atam ahap yebil aik baleg latsi on obam wereg ma,

⁷ hwe eke ahalue amben fano on, onggo humon foruk on anyo, ikwag helep on fam hwenanggeg angge walug, Yesus akit wahasireg, at Yesus siburu nauk kweleg, unggulmu hilili fesi.

^8-9 Hilili foruk anyo, it Yesus ele wauk on inil hausareg, enolok en enerim boruk kwit, “Ahalue su fam onggo uang humon oho folug, ap homi enangge eleg on og-esela angge famen, alemaroho su nunggwelug deheik?”

¹⁰ Uruk ale anyo, Yesus enegdeg ma esasireg, it hweag-esauk kwit, “Mun fano nabeheik ma, nunggwelug henele hwe su fam foruk kahep?

¹¹ It enangge eleg ai, hinim mundoho welamuhup famen, an neg de hinim mundoho welaruhuk fug.

¹² Hwe su en ahalue nobam hilili nobahakeik ai, an waratuk nealug, nebe owikmu nobahakup anyo, ulug, fik-foukdoho nobahakeik ma, embeseiyek.

¹³ Fano Wene su walug, di obam su obam hweag-isil noruk kwit, at ebereg welamag ulug, hwe su deheik ale hweag-isil noruk kamuhup, ulug, demdoho hweag-hisihi,” ulug, hweag-esasi.

At Yudas en Yesus warukwag ulug, onggo balfag wene

¹⁴ Hweag-esasi mu, it ap nesanggoen on eke unuk Yudas Iskariot anyo en, it ap Allah il hanim duruk on imam enowesi enekit lasireg,

¹⁵ “Yesus og-hesauk nealug, onggo ke og-numluhup?” ulug, hein og-esasi mu, it ap anyo en onggo uang bosie perak anggen 30 en og-umul ulug, wenako fousa.

¹⁶ Ne, ai hwili en at Yudas anyo, “O ke salim ebe seneko og-esauk ale wenggel-atuk mu, hahuk?” ulug, nangno-hauk katsi.

Yesus at ele wauk on nim soni Paskah nebag wene

¹⁷ Roti firig eleg on osoho folug, atam nauk ale horog aik wahasi mu, at Yesus ele wauk on omano en, Yesus akit wahausareg, hweag-utuk kwit, “Domba waroho soni Paskah naul en, kema fik-foukdoho hobaharuk kamul?”

¹⁸ Hweag-utswa ma, Yesus en, “Hit o sili humon etma kuluhupdeg, ap etma on ai hweag-utuk kwit, At nenowe guru en, An duhuk anyo horog aik waha ma, it nele wauk on nim, hat hobam etma soni Paskah osoko naul, eheik, hweag-umluhup.”

¹⁹ Hweag-esasi mu, it at ele wauk on anyo at Yesus melal-enepsi anyo higitdoho duruk kwit, domba Paskah osoko fik-foukdoho feik lausa.

²⁰ O hup atsi mu, at Yesus at ele wauk on nesanggoen anyo inim lausareg, huratlug, siburu nauk kwit,

²¹ at en, “Ap hit on en eke nowarukwag ulug, ap homi hweag-esa lamisi hihi, ulug, demdoho hweag-hisihi.”

²² Hweag-esasi mu, enenda mun hesilduk kwit, enemu en eke hweag-ereheg duruk kwit, “Yehei, Nowe, an ane, sa ane?”

²³ Hweag-utuk katswa ma, at Yesus en, “Ap waruk elma nenenggik misigmu dag-halug nauk kahe on su en, nebe nowarukwag ulug, hweag-esa lamisi.

²⁴ An Ap endag-atihik su, an duhuk nabug wene lisu baleg higitdoho dik lamin famen, at ap it ap homi an nebe nowarukwag ulug, og-esa lamisi ai neg de, elaheg. Endag-am fug on endag-atsi.”

²⁵ Hweag-esasi mu, at Yudas Yesus ebe warukwag ulug, hweag-esamisi on anyo en, Yesus hweag-utuk kwit, “Yehei, guru nowe, an den fug angge re, sa e?” Hweag-itsi mu, at Yesus en, “Haren at yig-dehen,” ai hweag-itsi.

Siburu ahalue nauk kamuhup wene

²⁶ Hweag-esasireg, siburu nauk kwit, at Yesus en roti enggikmu wasireg, Allah dang-dulug, kuroho at ele wauk on og-esauk kwit, “Su an nebe deg ma, oko nakiek.”

^27-28 Hweag-esasireg, ahalue ikwag fam hwenanggeg anyo oko, Allah dang-dulug og-esauk kwit, “Hit ap homi humdoho henesiag elehapdoho henobahalug, Allah hinim sebe-henebuhuk wene abug hweag-hesauk kahi anyo, hit demdoho bohup ulug, namep hililig deg ma, hit abirangge nakiek.

²⁹ Ne, an de o ketia hwili en bekit fobik an Nakni apma fesehumu wereg lit, anggur anggen ahalue keron hinim nahuk salim aik waharuk eleg kweleg, an anggur ahalue su, na fug angge welaruhuk, hweag-hisihi,” hweag-esasi.

³⁰ Hweag-esalug, suni eke ulug, wilibik wahausareg, Duk Zaitun fam lahaik lausa.

Yesus ai napeleg, ulug, imihin, Petrus hweag-etfag wene

³¹ Duk Zaitun fam laharuk kwit, at Yesus en, “Allah uruk kwit, An ap domba fahat-enesug on anyo watuk mu, domba kabogdeg linggik-longgo uhup, ulug, lisu baleg ma, hit mundoho hup anggo su an lin-nealug linggik-longgo uluhup, famen de,

³² an noluk apdoho unduhuk nobaharuk halug neg de, hit lauk eleg kweleg, an dam o Galilea etma lahuk,” hweag-esasi.

³³ Hweag-esasi mu, at Petrus en, “Eleg. It mundoho Yesus nenerim, ulug, fotog-healug longgo uruk kweleg, an neg de, fotog-healug longgo imin mun eleg.”

³⁴ Hweag-itsi mu, at Yesus en, “O hup anggo su salim, suwe ayam yohombuk on eke en ele owan uruk eleg kweleg, Yesus ai an napeleg, ulug, henahanam uruk mu heamin, ulug, dik-demdoho hweag-hirihi ai, ebetuk kamin.”

³⁵ Hweag-itsi mu, at Petrus en, “An nambieg waratuk halug, warahe ha alereg ma, Yesus napeleg ai neg de, imin mun fug lit deg.” Hweag-itsi mu, at ele wauk on anyo en, airoho neg uswa.

Yesus Getsemani wereg lit, somban ebag wene

³⁶ Ai hweag-esasireg, at Yesus at ele wauk on nim Getsemani aik lausareg, at Yesus at ele wauk on hweag-esauk kwit, “An lundima somban ik lauk kahi mu, hit dia welamek.”

³⁷ Hweag-esasireg, Petrus nim, Zebedeus omaliki biren nim, og-eneplug lasireg, enda hesilduk kwit, mun anggin atsi.

³⁸ Atsireg, “Yaho yei. An nenda hesilduk kwit waram ale napuk mu, hit suma wereg lit, ninim higitdoho nenenda enggatdoho welamul.”

³⁹ Hweag-esalug, hekipdoho lasireg, orohole belabeg sahaun atlug, Allah hweag-utuk kwit, “Yehei Nakni. An naplusa ale ikwag hwenanggeg hag su na fug angge embesihi ha ale fano halug, nobahain. Ne, eleg halug, an nendan bolug dimin ai fug. Ite, hat henda boruk kahen ale neg dimin,” ulug, somban isi.

⁴⁰ Somban uruk katsireg, at ele wauk on henahan anyo enekit wahasi. Wahasireg, nohoruk mu il esasireg, Petrus hweag-utuk kwit, “Ahwi, hit il misiham nimim nenenda enggatdoho welam fug alereg ma, ulug, nohoruk kahep?

⁴¹ Henendaman fano dul boruk kahep famen, henebe fam duk fug ale henepuk mu, siag duruk on henenda kahalik wam no, henenda enggatdoho somban neg uruk kamek.”

⁴² Hweag-esasireg, ekenim feselug lasireg, somban uruk kwit, “Yehei, Nakni. An ahalue hwenanggeg su, nauk eleg kweleg, embesouk fug alereg halug, hat hendan neg dimihin,” ulug, somban isi.

⁴³ Somban ulug, ambol sombandoho wahasireg kumu esauk men, it ap anyo noho inil enepsi mu, nohoruk mu esasi.

⁴⁴ Nohoruk kweleg, embeselug, lasireg, ele atam somban isi anyo nika ale henahaneg angge Allah hweag-utuk kwit, airoho hweag-itsi.

⁴⁵ Somban ulug, it at ele wauk on anyo enekit wahasireg, “Hit kel dauk kwit, nohoruk kamul neg, boruk kahep a? It siag duruk on anyo en, an nebe nowarukwag ulug, og-esamisi hwili mun horog aik waha.

⁴⁶ At nebe nowarukwag ulug, nonggo balsi anyo horog su waharuk mu, lakohon, inamek,” ulug, hweag-esasi.

Yesus senetfag wene

⁴⁷ At Yesus owan hweag-esauk kweleg, it ap nesanggoen on eke dohwal atsi on, Yudas anyo lauk kwit, it Allah il hanim duruk on imam enowesi mel, ap homi enowesi leho on mel en, ap esan misig karog weheg, yeik weheg, dulug, Yesus wag lowag ulug, mon-enepswa anyo inim, lausa.

⁴⁸ Ne, at Yesus warukwag ulug, wene balsi anyo en, atam wene balduk kwit, “Enegdeg ma haluhup en, an ap eke mako bug debelug dopdoho dang-duruk halug, ap ai neg, bolug, seneriyug,” ulug, wene inim balsi mu,

⁴⁹ at anyo bekit Yesus akit lasireg, “Guru Nakni,” ulug, mako bug debelug, dopdoho dang-duruk mu, at Yesus en, “Nare ahwi. Hat dimin ulug, wahen anyo din.”

⁵⁰ Hweag-itsi mu, it ap anyo humdoho lauk kwit, senerik lausa.

⁵¹ Senetswa ma, Yesus inim wereg on ap eke en karog lisoho ap Allah il hanim duruk on imam leho on amingming angge, esanggo fiyogdoho bo fesi.

⁵² Fiyogdoho bo fesi mu, at Yesus en, “It ap karog fam enowatuk halug, it en onggo karog fam enowatuk angge deg ma, henggarog ahunggwa elma kwelabin.

⁵³ An nili ukwag ulug, ketia su li it boholma on malaikat humdoho enebe esan nesanggoen og-nomag ulug, an Nakni heng-dihi ha fug alereg behen?

⁵⁴ Heng-dihi ha ale fano famen, heng-dele man, airoho duhu ulug, lisu baleg anyo, nangginoho dip-elep behen? Dip-ukwag ulug, an hweag-om fug angge welahi,” ulug, hweag-itsi.

⁵⁵ Hweag-itsireg, eta li at Yesus en ap homi kabogdeg anyo hweag-esauk kwit, “At yoholi angge on sen-enebik lauk hag, karog yeik inim walug wahep a? Hupmu hubet Allah obam wirigmu wene hweag-hesauk kweleg, sen-nabuk fug angge welatuhup famen,

⁵⁶ it nabi en lisu balfag anyo dip-ukwag ulug, nabik wahep ma, fano.” Hweag-esasi mu, at ele wauk on anyo en, Yesus lin-halug, linggik-longgo uswa.

It ap Yahudi enewene ayo wutuk on Mahkamah Agama enap anyo en Yesus ayo witfag wene

⁵⁷ Longgo uswa ma, it Yesus ebe senetlug, walug, ap Allah il hanim duruk on imam leho on unuk Kayafas akit, it ap Allah wene melaleg hwalduk on guru agama mel, ap enowesi leho on mel, kabogdoho wereg ma, lausa.

⁵⁸ Lauk kweleg, at Petrus anyo enombolim ik am heg am, ap imam leho on, obam bumbukmu horog aik lasireg, kwik lalug, nanggoho duruk mu esamin ulug, ap humon anyo autsi kahaleg latswa on enenggelegma huraik kwisi.

⁵⁹ Hwerieg wereg kweleg, it ap imam enowesi mel, it wene katukdoho balduk on Mahkamah Agama enap abirangge inim, “At Yesus watul ulug, etan seiale wene at obam foruk mu, esaul ane?” ulug,

⁶⁰ ap humdoho en, seiale wene obam dopno-halusa ulug, welatswa famen, indip hweahauk fug angge welatswa ma, ai en, fobik ap biren wahausareg,

⁶¹ “Ap su en, An Allah obam meiyaloho folug, wutuk kweleg, hup biren nohokup, isi,” ulug, hweag-esausa.

⁶² Hweag-esausa ma, at imam leho on anyo, inatsireg, “It ap su enele hobam foruk mu, hat wene onggo eke hweag-esamihin a, eleg a?”

⁶³ Hweag-itsi mu, at Yesus anyo en ele eleg angge bok welatsi. Bok neg wereg ma, at ap imam leho on anyo en, “Hat Kristus Allah amloho halug, fagdoho hweag-nesamihin ulug, at Allah oluk wereg on unuk yiko hweag-hirihi.”

⁶⁴ Hweag-itsi mu, at Yesus en, “Ai haren ehen famen, an eke hweag-hirik. O ketia su hwili famen, an Ap endag-atihik su, at omamne humdoho wereg anyo, enggik bekit fil hwerieg laruhukdeg, boholma anggulog anggelegma wambik waharuk mu, neahup, ulug, hweag-hisihi.”

⁶⁵ Hweag-esasi mu, at ap imam leho on anyo en, asum dilip-esauk kwit, “Allah siahap-biahapdoho foruk kweleg, eke ke nim hweag-nesowag ulug, nangno-hauk kahep? At eheik ale mun holehep ma,

⁶⁶ nanggindul behep?” Hweag-esasi mu, iren, “Binggi watul fano.”

⁶⁷ Uswareg, wasup orohole fam sup-debeheg, enenggik yinggilig fam wareheg, ne, foma enenggik dagdoho wareheg, duruk kwit,

⁶⁸ “Kristus ao, san howatuk hehen? In abi!” ulug, hweag-utuk katswa.

Petrus en, Yesus an napeleg, hweag-esebag wene

⁶⁹ Hweag-utuk kweleg, at Petrus anyo, oluluk eta hwerieg ma, hwele eke at imam leho on amingming angge akit wahasireg, “Hat mel at Yesus Galilea on hinim noruk kahen on hihi.”

⁷⁰ Hweag-itsi mu, at Petrus en, it mundoho inil hanim, “Hat ehen ai, an napeleg abi,” hweag-itsireg,

⁷¹ sokolma aik wilipuk men, hwele eke en, Petrus il hasireg, it etma on hweag-esauk kwit, “Ap su oho, at Yesus Nazaret on inim noruk on.”

⁷² Hweag-esasi mu, at Petrus en eke uruk kwit, “An ap ai, mun napeleg, Allah il hanim dik-demdoho hweag-hisihi.”

⁷³ Hweag-esasireg, etma wereg ma, ai en, it hesangge welatswa etmano en, Petrus hweag-utuk kwit, “Hele unggut uruk kahen ai fam, hat oho it on demdoho heauk kahe.”

⁷⁴ Hweag-utswa ma, “An ap ai mun napeleg ma, nakni owag yinggig,” ulug, Allah unuk hombuk owag balduk kweleg, suwe ayam anyo ele isi.

⁷⁵ Suwe ayam ele uruk katsi mu, at Yesus en, “Suwe ayam ele uruk eleg kweleg, haren henahanam, Yesus ai an napeleg, imihin,” hweag-itsi anyo, at Petrus enda ebet-atsi mu, wilibik lalug, enda hesilduk kwit, oba humon yatsi.