MATIUS 25 - ALLAH WENE FANO WENE

Hwelani enebe numen debag ale wal-heheg hweag-esebag wene

¹ Hweag-esasireg, Yesus en ekenim, hweag-esauk kwit, “An waruhuk salim at boholma on apma fesehu ai, hwelani enebe numen enelampu fisaho hwelalug, ap hwe hwelauk on anyo waharuk mu ha wilibik lausa hag hahup.

² It hwelani ha wilibik lausa anyo re, enebe foaben enenda eleg, ne, enebe foaben enenda wereg ma,

³ it hwelani foaben enenda eleg on anyo en, enelampu ahaik oholukmu neg hwenanggeg, walug lausa famen, eleg atuk halug eke hwenanggukwag ulug, walug lausa fug.

⁴ Ne, it enenda wereg on anyo en neg de, enelampu fam ahalue hwenang-deheg, eleg atuk halug, hwenangguruk on mel, hwenang-deheg, debelug, walug wilibik lausa.

⁵ Wilibik lausareg, hwe hwelauk on anyo, waharuk eleg anunureg en, it hwelani anyo noho kungguk duruk kwit, nohousa.

⁶ Ne, hup andundu ap eke en ele humon fam uruk kwit, Ap hwe hwelauk on anyo su waharuk mu, ha manik.

⁷ Isi mu, it hwelani anyo inatswareg, enelampu hekel anyo buhun-dauk kwit,

⁸ it enenda eleg on anyo en enenda wereg on hweag-esauk kwit, Nenahaik mun eleg ahareg, nahul-atuk mu, hit henahaik eke hwenang-nesakiek.

⁹ Hweag-esausa ma, it hwelani enenda wereg on anyo en, Eleg. Foma minggiroho hit hwenang-hesauk kamul deg, nit hwenang-deheg dul halug, ai re, eleg atmisi angge re, hiren it onggo hundutuk on enekit hundurik lakiek.

¹⁰ Hweag-esausa ma, onggo hun-da lauk kweleg, at hwe hwelauk on anyo wahasireg, it fik-fouk duswa on anyo nim soni osoho nakoho lit, olma kulug, sok latsi.

¹¹ Sok lare folug wereg ma, it hwelani foma anyo en wahausareg, Yehei, nenakni. Sok hut-nenebin,

¹² hweag-utswa famen, at hwe hwelauk on anyo en, it hweag-esauk kwit, Hit an napeleg ma, lakiek, ulug, demdoho hweag-hisihi, ulug, hweag-esasi,” ulug, at Yesus en at ele wauk on anyo hweag-esasi.

¹³ Hweag-esasireg, at Yesus en, “O ai salim waruhuk nim, mo eta wereg kweleg, waruhuk nim, anyo hit henapeleg ma, henenda kahaleg lamek,” ulug, hweag-esasi.

Ap eke amingming angge enebe henahan debag ale, wal-heheg hweag-esebag wene

¹⁴ Hweag-esasireg, Yesus en ekenim hweag-esauk kwit, “An waruhuk anyo re, ap eke o ekema lauk kwit, at amingming angge wamag ulug, wol-enepsireg, wahausa ma, amunangge-manangge hwalduk kamag ulug, unduhuk fesesi ai hag.

¹⁵ It duruk kam ale enobabut furebesesireg, eke uang 5.000 og-ereheg, eke uang 2.000 og-ereheg, eke uang 1.000 og-ereheg, debesesireg, o ekema lasi.

¹⁶ Lauk kweleg, at uang 5.000 wasi on anyo en, di angge su angge hundutil lauk kwit, 5.000 ekenim dopno-deheg,

¹⁷ ne, at uang 2.000 wasi anyo en airoho neg 2.000 dopno-deheg, duswa.

¹⁸ Ne, at uang 1.000 wasi on anyo en neg de, obam lasireg, kwenang habuloho akni auang anyo sale feheg, debelug,

¹⁹ hup humdoho noholug wereg ma, akni anyo sombandoho wahasireg, Nauang anyo fam, it eke dopno-dausa ma esamin ane, ulug, wol-enepsi mu,

²⁰ at uang 5.000 wasi on anyo, atam akit wahasireg, Nakni yei. Haren uang 5.000 anyo og-nitihin famen, 5.000 ekenim dopno-dauihik su, hakin.

²¹ Hweag-itsi mu, akni en, Namloho yei. Hat namingming angge furoho duruk on su, mun fano dirihin. Hangge dorangge fam furebelug hwalduk katihin mu, humon abirangge hwalduk karuhun, ulug, unduhuk hobahakuk mu, unduhuk lit, an hakni nahayeg hauk kahi hag, ninim higitdoho hauk katmihin en, ma.

²² Hweag-itsi mu, at uang 2.000 wasi on anyo en wahasireg, Nakni yei. Hat uang 2.000 og-nitihin famen, ekenim 2.000 dopno-dauihik su, hakin.

²³ Hweag-itsi mu, akni anyo en, Hat namingming angge fano furoho duruk kahen on su, mun fano dirihin. Hangge dorangge fam fano furebelug hwalduk katihin mu, humdoho abirangge hwalduk karuhun en unduhuk hobahakuk mu, an hakni nahayeg hauk kahi hag, ninim higitdoho hauk katmihin en, ma.

²⁴ Hweag-itsi mu, at auang 1.000 wasi on anyo en, wahasireg, Nakni yei. Hat hobabut hapereg lit, hat a yaruk fug angge anggen neg baleheg, ne, a foluk fug angge en, andog-deheg, duruk kahen noluk deg ma,

²⁵ nakol en lauihikdeg hauang anyo, kwenang habuloho sale ferihik mu, welatsi angge re, su walug og-hirik wahi su, honggwareg hahun hwelakin.

²⁶ Hweag-itsi mu, akni anyo en, Hat namingming angge siag neg deheg, neyabuk duk fug angge koreg welaheg, duruk kahen on su, an a yatihik fug mu famen, anggen baleheg, ne, a foldihik fug mu famen, andog-deheg, duruk kahi holukdeg lit en, dirihin.

²⁷ Ai halug, an waharuk mu nealug, nauang ekenim hum atlug onggo wag wale en, it ap homi enuang hum amag ulug duruk on omano, nauang foroho lamuhup en, og-esa lelen man fano.

²⁸ Hweag-itsireg, autsi hweag-esauk kwit, Ap su, airoho disi mu, uang 1.000 anyo at enggik men, deloho uang 10.000 hweleheik anyo, og-emek.

²⁹ Hit henangge wereg halug, ekenim loukdoho og-hesauk mu, buleloho wambeheg, ne, henangge eleg halug, dorangge foroho welahep on etano deloho weheg, duruk mu, hahup.

³⁰ Namingming angge fano duruk ale apelegdeg, we alemaroho wereg su, dagma o mummu, oba yareheg, enaeg kilit mareheg durukmu etma wilibi feiyek hweag-esasi,” ulug, Yesus en at ele wauk on hweag-esasi.

O ahae fotog fam ap homi en-enebuhu wene

³¹ Yesus wene ekenim hweag-esauk kwit, “An Ap endag-atihik nalili angge lik-louk dalug, it boholma yonggo noruk on malaikat nim, wamuhukdeg, an wene melal-enepuk kahimu takhta lehoma etma hwerieg kweleg,

³² it malaikat omano en, ap homi enenggul unuk domog an nakit andog-enebuhup mu, an domba hwalduk on en kambing domba enetuk hagdoho, eneko fesehuk.

³³ Eneko feseruk kwit, it domba on halug de, nenggik bekit fil feseheg, ne, it kambing on halug de, nenggik hware fil feseheg, duhuk.

^34-36 Fesehukdeg, an enowe raja ma, it ap homi nenggik bekit fil fesehuk on anyo hweag-esauk kwit, An nakni ahayeg henobam henobahasi. An nasiburu obok deg ma, hiren nasiburu og-nereheg, ne, nahaik obok deg ma nahaik hwenang-nirik laheg, ap bohon deg ma og-nabeheg, nasum wandeg eleg ma, nasum wan-nobahakeg, ouk deg ma nea waheg, an sabu hetdeg ma hit nea waheg, duruk katuhup mu, an nakni en o bohol kwenang walduk fug kweleg, hit ap humon henenuk bogdeg welamuhup ulug, foukdoho henobahabag anyo, higitdoho, hit mun leho welamuhup en, manik.

^37-39 Hweag-esahuk mu, it enenda wenggeleg wereg on anyo en, an hweag-nutuk kwit, Nakni yehei. Hat siburu obok hapuk mu siburu og-hereheg, ik obok hapuk mu ik hwenang-hirik laheg, ap bohon deg ma og-habeheg, hasum wandeg eleg ma wan-hobahakeg, ne, hat ouk deg ma hea waheg, hat sabu hetdeg ma kumu hea waheg, napuk katuhup, hweag-nesehen ai, nangginig li em hapuhuk mu, ehen?

⁴⁰ Hweag-numuhup mu, an enowe raja anyo en, it anyo hweag-esauk kwit, Eleg. Hiren an nautsi sebeleg on enepuhup ai, an neg napuhup, ulug, demdoho hweag-hisihi, hweag-esahuk.

⁴¹ Hweag-esahukdeg, ai en, it nenggik hware fil fesehuk on anyo hweag-esauk kwit, Hit Allah en hururungdoho henobahasi su.

⁴² An siburu obok deg ma, siburu og-nereheg, ik obok deg ma ik hwenang-nirik laheg,

⁴³ ap bohon deg ma og-nabeheg, nasum wandeg eleg ma, wan-nobahakeg, oukdeg ma nea waheg, sabu hetdeg ma kumu nea waheg, napuk katuhup fug mu, suman wilibik laluhupdeg, at Iblis nim, at autsi nim, abirangge indok ambulbul ulog neg durukmu, an Nakni en buhundoho fesebag ma, etma lakiek, ulug, hweag-esahuk.

⁴⁴ Hweag-esahuk mu, iren an hweag-nutuk kwit, Yehei nakni. Siburu obok habeheg, ik obok habeheg, ap bohon hasum wandeg eleg angge laheg, oukdeg nim, sabu hetdeg nim, wereg ma nangginig li em ninil heauhukdeg en, let-hapuhuk fug mu, ehen e?

⁴⁵ Hweag-numuhup famen, an den it hweag-esauk kwit, Eleg. Hiren it ap sebeleg on su airoho enebuk fug angge welatuhup anyo re, an neg nabuk fug angge welatuhup, ulug,

⁴⁶ hweag-esahukdeg, it ap anyo siag onggo mundoho-mundoho nenek duruk kamag ulug, mon-enebuhuk famen, it enenda wenggeleg wereg anyo neg de, eneluk mundoho welamag ulug enebuhuk, ulug, hweag-esahuk,” hweag-esasi.