MATIUS 24 - ALLAH WENE FANO WENE

Allah obam wirig meiyaloho hwik-esahup, hweag-esebag wene

¹ At Yesus Allah obam wirigmen wilibik waharuk kweleg, at ele wauk on anyo Allah obam wirig eta anyo unug-umul ulug, Yesus akit wahausa ma,

² at Yesus en it hweag-esauk kwit, “Hit dia wirig abirangge hinil hauk kahep ane, eleg a? Helep eke obam louk-louk wirig welaruhu fug. Ite, mundoho meiyaloho hwik-esahup, ulug, demdoho hweag-hisihi,” hweag-esasi.

Lal-faldoho anggin henobam henobahakup, hweag-esebag wene

³ Ai en, dukmu Zaitun fam lahasireg, amu etma hwerieg ma, at ele wauk on anyo akit lahausareg, “Hat hweag-nesehen ale etano, nangginig li em duhu? Ne, hat waruhun nim, o ahae fotog aruhu nim, horog aik waharuk halug, neneluk amag ulug, nangginduk mu hahuk?”

^4-5 Hein og-hausa ma, at Yesus en, “It ap homi humdoho en an nunuk il waharuk kwit, Kristus ai re an, ulug, ap homi humdoho enenda lal-enebuhup mu, hit mel, lal-henebuk no henenda kahaleg lamek.

⁶ Weim kahaleheg, weim yabeheg duruk on, henesanggo holuhupdeg, henenda eleg am fug. Ai ail waruhu famen, ahae fotog atuk kwit duruk, bouk fug.

⁷ Ap homi enenggul unuk domog dog abeheg, ap raja eke autsi en eke autsi nim, dog abeheg, di obam su obam siburu obok aheg, meik humon lang-fang deheg, duhu ai,

⁸ homi omalik il fenggenduk mu nenek duruk hag, airoho henobam anggin-fanggin henepuk mu hahup.

⁹ O ai salim it ap homi en henobam anggin-fanggin henobahalug, henowarukwag ulug, seneko ap homi og-eseheg, hit an nele wauhup fam, it ap homi enenggul unuk domog en enelok enerim henebeheg, duhup.

¹⁰ Ai salim, an nele wauk on eke en an nele embeseheg, ap eke en at eke waruhuk ulug, abug baleheg, at eke en at eke olok alitno beheg, duhup.

¹¹ Ne, ap eke wamuhupdeg, we seialeroho, Allah wene eke hweag-hesa, ulug, ap homi humdoho enenda lal-enebuhup.

¹² It ap homi en Allah wene embeselug, siag neg duruk ai, hum aruhu mu, ap homi humdoho enenda ahanhan fam Allah wene mutlug lauk kamuhup famen, enenda hol atuk kwit, seram bohup.

¹³ Airoho dil waharuk kweleg, henenda hambukdoho hwerieg kweleg, o ahae fotog aik waharuk halug, henahap wendaruhu.

¹⁴ Allah apma fesouk wene fano wene su, di ap homi su ap homi eneluk amag ulug, di o su o mundoho fagdoho hweag-isil lauk halug neg de, o ahae fotog aruhu,” ulug, hweag-esasi.

Enobam anggin-fanggin nikdoho debesehup wene

¹⁵ (Hit lisu baleg kumu hauk kahep su. Wene su ke fahet baleg wereg, ulug, henenda furebeiyek.) “Namelmel on, at Nabi Daniel en waruhu abug ebag anyo, Allah obahet eneg weregma etma inaik waharuk mu, hinil hahupdeg,

^16-18 hit o Yudea welahep su, henobam indipmu hesangge welahep anyo en, henangge olma hwelak kweheg, heneyabukmu wereg on anyo en henasum olma wereg on anyo hwelak waheg, duhup fug. Ite, etman neg longgo ulug, domma lahaik lakiyug.

¹⁹ O ai salim, it homi omalik ahummu wereg on nim, enomaliki owan ag mon-enepuk on mel, ai neg de, enelaheg.

²⁰ Hit longgo uhup anyo, o osit sanim sebeleg kweleg ane, somban uruk salim ane, am no, hit Allah hweag-ereheg neg, uruk kamek.

²¹ At Allah en, di angge su angge wal-debag hwili en, ketia hwili ap homi anggin-fanggin enobam feseruk katfag famen, ai we dorangge hag debeseruk katfag. Ketia oho dorangge debeseruk famen, o ai salim fam henobam anggin-fanggin nikdoho henobaharuk mu hahup.

²² Anggin-fanggin henobam henobahaku li anyo at Allah en hwili hop-debeik waruhu fug halug, ap homi enahap wendaruk fug angge enowaruhu mu, at Allah en at omaliki momaloho en-enepsi anyo enowaruk no ulug, hwili fohu.

²³ Ai duruk kweleg, ap eke en, Kristus anyo dia wereg ma hakiek, eke en, Kristus anyo etma wereg ma hakiek, hweag-hesauk halug, henenda furebouk fug.

²⁴ It foman seiale wene hweag-hesauk kwit, Kristus anyo an neg, eheg, ne, Allah wene hweag-esauk on nabi anyo an neg, eheg, il wamuhupdeg, it Allah omaliki momaloho en-enepsi anyo, lal-enepul fano ane, ulug, enakol wereg on mel, duk fug ale on mel, duhup famen,

²⁵ ai owan duruk eleg kweleg, wene su fagdoho hweag-hesauk kahi mu, henenda furebeiyek.

²⁶ Iren uruk kwit, O leimu ap homi elegma wereg, ulug, hweag-hesauk halug, ha laheg, Olma ilonggoma etma wereg, ulug, hweag-hesauk halug, demdoho bolug, ha kweheg, duk fug.

²⁷ Mo indip fil en oeal lepeng-hauk mu, mo obuk uruk fil nim, fotog dik lauk hag, an Ap endag-atihik anyo re airoho waruhuk.

²⁸ Bak filik atukmu etmano suwe bak filik nauk on kabog-duruk,” ulug, hweag-esasi.

An Ap endag-atihik on waruhuk, hweag-esebag wene

²⁹ Hweag-esasireg, ekenim hweag-esauk kwit, “Henebe anggin-fanggin henebuhup mu, mo mum aheg, bigalem aseleg eleg aheg, sohwalanggen boholman lol-heg wambik waheg, it bohol bul suma enomamne wereg anyo enowag elek deheg duhup.

³⁰ Duhup mu, an Ap endag-atihik anyo waruhuk ulug, enoluk atuk on eke, boholma etma duruk halug, it ap homi kwenangma on enenggul unuk domog en oba yatuk kweleg, an Ap endag-atihik anyo nalili angge lik-louk debelug, nomamne wereg lit, boholma anggulog anggelegma, waharuk mu neahup.

³¹ Ne, an den namingming angge boholma yonggo noruk on malaikat omano, mon-enepuk kwit, bosie bohweap fam hum ngai duruk nealug, an nomaliki momaloho en-enepihik on omano, o indip fil onggombi fil en, o esanggo foma foma fil en, kabog-duhup,” ulug, hweag-esasi.

E ara fam wal-heheg hweag-esebag wene

³² Hweag-esasireg, wene wal-heheg hweag-esauk kwit, “E ara alit sobalmin ulug duruk anyo, henenda wenggel-hakiek. Alit fisela-duruk kwit, sobalduk halug, mo somban dikoho lit, deheik, uruk kahep anyo hag,

³³ Airoho duhu, ulug, hweag-hesauk kahi su, hinil hahupdeg, Horog debeik waha, ulug, bohup.

³⁴ Hit ketia welahep su, owan eleg atuk eleg kweleg, duhu abug hweag-hisihi su, duruk mu hahup, ulug, demdoho hweag-hisihi.

³⁵ Bohol kwenang su eleg aruhu famen, an nele su neg de mundoho-mundoho welaruhu,” ulug, hweag-esasi.

Deta li em waruhu henapeleg, hweag-esebag wene

³⁶ Hweag-esasireg, “An Ap endag-atihik su, di salim waruhuk nim, mo eta wereg kweleg waruhuk nim, ap homi mundoho enapeleg. It boholma yonggo noruk on, malaikat oho enapeleg. Ne, an Allah amloho oho napeleg neg. An Nakni neg de, amu olukdeg.

³⁷ It ap homi ap Nuh wereg li em duruk katfag anyo hag, an Ap endag-atihik on waruhuk li em oho airoho duruk kamuhup.

³⁸ It ik humon owan yenggeldil laharuk eleg kweleg, siburu nenggeg, ahalue nenggeg, aben enohwesi hweleheg, homi en enehunsi hweleheg, duruk kweleg, ap Nuh anyo kapal wirigmu kwebag.

³⁹ Kwebag ma, it ap homi enenda we hesangge wongdeg kweleg, ik humon yenggeldil laharuk kwit, ap homi humdoho sebel-enepfag anyo hag, an Ap endag-atihik waruhuk li em oho, ap homi wongdeg kweleg, airoho waruhuk.

⁴⁰ O ai salim ap biren yabuk wutuk mu, eke weheg, eke embeseheg, duruk mu hahup.

⁴¹ Ne, homi biren inim sowabuk mininduk mu, eke weheg, eke embeseheg, duruk mu hahup.

⁴² Ai deg ma, Henowe Tuhan anyo o ke li em waruhu henepeleg ma, henenda kahaleg lamek.

⁴³ Ap obam onggwareg ahun en, Yoholi angge on ai salim watmisi, oluk alep man, kwema kahale folug, angge herahaik kuk no ulug, nohouk fug angge neg, mundoho kahaleg lalep, ulug, henenda furebeiyek.

⁴⁴ Ai deg ma, an Ap at endag-atihik su, hiren, Ai salim waruhu, boruk eleg kweleg, waruhuk mu, hit mundoho fik-foukdoho welamek,” ulug, hweag-esasi.

Ap obahet duruk on eke en hesangge deheg, ap eke en furebelug deheg, debag wene

⁴⁵ Hweag-esasireg, ekenim hweag-esauk kwit, “Ai halug, ap humon amingming angge eke ahainelekwe fahat-enesug lit, enesiburu nauk on higitdoho og-esauk kamag ulug, unduhuk fesi on enda wereg lit, fik-furoho duruk on anyo sa?

⁴⁶ Akni en amingming angge airoho duruk mu ha waruhu halug, amingming angge enda ahayeg hahu.

⁴⁷ Akni en at angge mundoho amingming angge anyo hwalduk kamag ulug unduhuk fohu, ulug, demdoho hweag-hisihi.

⁴⁸ Ne, ap amingming angge obabut mun siag on eke en, Nakni anunuroho welatlug waruhu behi, ulug,

⁴⁹ amingming angge foma anyo yeik enowareheg, it ahalue nalug wenenebo duruk on nim sebereg lit, siburu nenggeg, ahalue nenggeg,

⁵⁰ duruk mu, halug, ap amingming angge anyo en, Nakni ai salim waruhu, ne, mo eta wereg kweleg waruhu, bouk fug angge we hesangge wereg kweleg, waruhureg,

⁵¹ amingming angge anyo ebe yeik al bisangdoho ware fohureg, it ap homi enonggwareg enenda furebahat-dauk fug on feserukmu etma mondoruhu mu, wereg lit, oba yareheg, aeg kilit mareheg, duruk karuhu,” ulug, hweag-esasi.