MATIUS 23 - ALLAH WENE FANO WENE

It guru agama nim, Farisi on nim, duruk ale fam enepe enggat benggatdoho welamuhup ulug, hweag-esebag wene

¹ Yesus hein og-hauk ale enakol en bok wereg ma, at Yesus en it ap homi kabogdeg inim, at ele wauk on nim, hweag-esauk kwit,

² “It Allah wene melaleg hwalduk on guru agama nim, ap Farisi on nim en, Musa hweag-esauk katfag obalma nit hweag-esauk kamul, ulug, hweag-hesauk mu,

³ iren di angge su angge duhup ulug hweag-hesauk halug, furebelug duruk kam fano famen, it duk fug angge wereg lit, hweag-hesauk anyo siag neg deg ma, hit airoho duruk kam fug.

⁴ Iren anggin humon oko ap homi enobam enum fam feselug, louk-foukdoho noruk kweleg, let-esaul bouk fug angge, inil ombandu en, fu isil noruk.

⁵ Munangge manangge duruk ai, Ap homi inil nesowag, ulug, dil noruk kwit, Allah wene baleg anggwe angge enelahama dopnoroho sabu het-deheg, enasum ambiangma erahamu amumulit angge, enasum oholukmu yarangge boreheg, duruk.

⁶ Ne, soni esetuk kwit, it ap kaindeg on huratukmu huraheg, it ap Yahudi somban uruk obam bulmu huraheg,

⁷ munangge manangge onggo hundutukmu, Nit neg dang-nenebukwag, beheg, ap homi en, Nangguru, ulug, hweag-nesowag, beheg, duruk ale enahayeg boruk famen,

⁸ hit neg de, hweag-hesauk kahi on, an namu neg. Ne, hit nare hare neg welahep ma, ap homi en, Guru ahwi, hweag-hesahup fug.

⁹ Ne, hit Henakni boholma on misig deg ma, it ap kwenangma on suma eke, Nakni, ulug, hweag-umuhup fug.

¹⁰ Ne, nele melal-henepuk kahi on, an Kristus nebe misig deg lahi mu, ap homi en, Nenowe hunuk bogdeg, hweag-hesahup fug neg.

¹¹ Ap henenggelegma eke humon hag wereg ai, henamingming angge at welamag.

¹² Hit henenda leho fahat-dauk hesalug, sebele henobahakeg, ne, henenda sebele fahat-dauk hesalug, leho henobahakeg, duruk mu hahup,” ulug, hweag-esasi.

It enonggwareg enenda furebahat-dauk fug en, Yesus en bet-enepfag wene

¹³ Yesus en ekenim hweag-esauk kwit, “Hit Allah wene melaleg hwalduk on guru agama nim, ap Farisi on nim, henonggwareg henenda furebahat dauk kahep fug on su. Ap homi Allah apma kuk no ulug, hiren sok laroho wilibi feseheg, hit kuk fug angge wereg lit, it kwik wamul boruk anyo kwe bale feseheg, duruk kahep ma, henelaheg e! [

¹⁴ Hit guru agama nim, hit Farisi on nim, henonggwareg henenda furebahat-dauk kahep fug on su re, henelaheg e! Hit de homi sohwe on enobam wirig mel, enengge mel felelengdoho hwelauk kwit en de, ap homi en enesanggo hol-halug, It fano, boukwag en, somban yehei-u il laheg duruk kahep ma, Allah en siag onggo anggin on henobam folug siahap henobahaku.]

¹⁵ Hit guru agama nim, hit Farisi on nim, henonggwareg henenda furebahat-dauk kahep fug on su re. Ap misig eke hit henewene wauk kamag ulug, heraril ik laut yenggeleg foma fil laheg, di obam su obam laheg, duruk kahep on ai, Allah en siag onggo anggin on henobam folug, indok ambulbul ulog neg durukmu hwik-henebuhu ai hag de, it henele holduk on ai oho, Allah en siag onggo hit fahet dotdeg hag famen, it neg de birenam obam loukdoho fesoukwag ulug duruk kahep ma, siahap henebuhu.

¹⁶ Hinil bug wereg lit, ap homi kwe lit-esauk kahep su, hiren uruk kwit, henele demdoho boukwag ulug, Allah obam wirig unuk yiko ap homi hweag-esauk halug ai, we dil noruk famen, bosie emas Allah obam wirigmu wereg on anyo unuk yiko ap homi hweag-esauk halug neg de, nenele uruk kahe anyo, mundoho duruk kamuhup ulug, uruk ai along, ulug, uruk kahep ma, henelaheg e!

¹⁷ Henenda eleg hinil hupnig su, hiren bosie emas alongdeg behep ane, bosie emas Allah obam wirigmu feik kuruk fam Allah obahet enetuk mu, obam wirig ai, along behep a?

¹⁸ Hiren hweag-esauk kahep ale eke su. Allah owam waroho indok yaldukmu unuk yiko ap homi hweag-esauk kahep halug ai, we hweag-esauk kahep famen, Allah obahet waroho indok yale foruk on ai unuk yiko ap homi hweag-esauk nesalug neg de, uruk anyo mundoho welaruhu ulug, uruk mu, along, ulug, hweag-esauk kahep ma, henelaheg e!

¹⁹ Hinil hupnig su, Allah obahet foruk on ai, along boruk kahep ane, Allah obahet foruk anyo indok yaldukmu, indok yalduk fam Allah obahet enetuk mu, indok yaldukmu ai, along, boruk kahep a?

²⁰ Ai deg ma, hit Allah owam waroho indok yaldukmu unuk yiko hweag-esauk kahep halug ai, ebe buhundeg nim, munangge manangge etma foruk on, anyo nim, seberoho unuk yiko hweag-eseheg,

²¹ ne, Allah obam wirig unuk yiko hweag-esauk kahep halug ai, ebe wirig nim, at etma wereg on Allah ebe anyo mel, seberoho unuk yiko at hweag-eseheg,

²² ne, hiren bohol unuk yiko hweag-esauk kahep halug ai, at Allah wene melal-enepukmu takhta nim, etma hwerieg on Allah unuk nim, seberoho unuk yiko hweag-eseheg duruk kahep ma, hweag-hisihi.

²³ Hit guru agama mel, ap Farisi on mel, henonggwareg henenda furebahat-dauk kahep fug on su. Wene dipdoho neg wenggelduk nim, ap homi enelaheg en debeseruk nim, henenda furoho duruk nim, Allah wene melaleg indip humon ai deg kweleg embeselug, hiren de, we bingga enggela hag mel, kami ahap hag mel, hende hag mel, foma dorangge minggiroho Allah obahet foruk kahep ma, Henelaheg! Indip humon anyo duruk kwit, dot-dot ale ai oho duk on famen, duruk kahep.

²⁴ Hit hinil hupnig wereg lit, ap homi kwe lit-esauk kahep su, ik nauk kwit, kolun dorangge henelma kuruk halug, luko hwik-esauk kahep famen, wam unta ebe wereg kweleg, nauk kahep ma, biloho henehummu wamburuk mu, hisihi.

²⁵ Hit guru agama inim, ap Farisi on inim, henonggwareg henenda furebahat-dauk kahep fug on su. Hit henahaikwag henowaruk nim hwenang dauk kwit, ap homi enengge hesangge yoholi angge weheg, henenda nauk halug neg, an aruhuk, ulug, deloho hweleheg, duruk kahep ai fam, henahaikwag henowaruk elma singon ele sopdeg wereg kweleg, dagma neg horuruk kahep ma, henelaheg!

²⁶ Hit ap Farisi on hinil hupnig su, henahaikwag henowaruk atam ilonggoma ho-dauk halug, dagma nim horeg ma hahup.

²⁷ Hit ap guru agama inim, Farisi on inim, henonggwareg henenda furebahat-dauk kahep fug on su. Ap wareg on enebe filik atuk on enowag solongdeg kwenang apma saleg kweleg, emberimmu obam fano wirig wereg hag, welahep ma, henelaheg!

²⁸ It ap homi en henebe fu hesauk kwit, It ap fano, boruk famen, henonggwareg henenda furebahat-da fug angge wereg ale nim, di siag su siag duruk kahep nim, henendama hoporoho wereg ma hisihi,” ulug, hweag-esasi.

It ap guru agama nim Farisi on nim eneko siag enobam fesehu wene

²⁹ Yesus en ekenim hweag-esauk kwit, “Hit ap Allah wene melaleg hwalduk on guru agama, hit Farisi on mel, henonggwareg henenda furebahat-dauk kahep fug on su. Hiren it endam nabi omano, enowag febagma buhun-deheg, it ap endam enenda wenggeleg welatfag on, enowag hwandi febagma hwaleheg, duruk kwit,

³⁰ Nenombasi en ap Allah hweag-esauk katfag on enowatswa nabi ai, it eneluk welatfag ai li em, nit nim welala man, ap anyo enowatla fug,

³¹ uruk kahep anyo fam, hiren it Allah wene hweag-esauk on enowatfag enombasi anyo, Nit at welahe, ulug, fag-duruk kahep ma, henelaheg!

³² Henombasi enenggik andoma debesebag etano, hiren ahae fotogdoho diek.

³³ Hit kisu sahe anyo on, omalik sahareg on su. Allah en eneko indok ambulbulmu mon-henebuhu mu, nangginoho longgo uhup behep? Duk fug alereg!

³⁴ Ai halug, an den ap Allah wene hweag-esauk on nabi nim, ap enenda wereg on nim, wene hweag-esauk on guru mel, henekit mon-enebik waruhuk halug, foma e salib fam enowareheg, foma, hit somban uruk kahep obam etman fetnangge fukdoho enowareheg, foma da kwil ya kwil, mug-magdoho feseil laheg, enebuhup.

³⁵ Ai fam at Habel enda wenggeleg kweleg, amep wambebag hwili en, at Zakharia Berekhya amloho anyo Allah owam waroho og-utukmu bul etma watuhup hwili en, it ap enenda wenggeleg on enamep kwenangma suma wambisi anyo, hit henobam loukdeg laruhu.

³⁶ Hit ap homi ketia welahep su, wene mundoho abirangge anggin hit henobam welaruhu, ulug, demdoho hweag-hisihi,” ulug, hweag-esasi.

Yesus en ap homi o Yerusalem on enelaheg bebag wene

³⁷ Hweag-esasireg, “Yehei. Hit ap homi Yerusalem on su. Hiren it Allah wene hweag-hesauk on anyo enowareheg, it ap Allah en yonggo mon-enebik waharuk halug, helep fam fuk-fak heheg enowareheg, duruk kahep ma, yehei! An de, suwe ayam isinga en omaliki ahwerabul apma sebeloho fahat-enesug hag kabog-henebuhuk boruk kahi famen, nenerim uruk kahep anyo.

³⁸ Fotog-hesahuk mu, henobam su we huhulmu neg welaruhu,

³⁹ Hiren at Nenakni Tuhan unuk fam wahasi on leho foukohon, ulug, owan uk fug angge wereg lit, eke nea fug angge welamuhup, ulug, demdoho hweag-hisihi,” ulug, hweag-esasi.