MARKUS 7 - ALLAH WENE FANO WENE

It Yahudi enemulik duruk katfag ale melaleg wene

¹ Fobik en, ap Farisi on inim, it ap Allah wene melaleg hwalduk on guru agama foma inim, o Yerusalem en at Yesus akit kabog-dik wahausareg,

² at ele wauk on anyo enenggik horuk fug angge, we hesangge wereg lit, siburu nauk mu inil esausa.

^3-4 It Farisi on anyo inim, it Yahudi on mundoho inim enemulik duruk katfag ale melaleg duruk kwit, enenggik horuk fug angge siburu nenggeg, siburu hundutukmu etman walug watlug, horuk fug angge wereg lit, siburu nenggeg, saliog angge nauk fug. It enemulik duruk katfag ale melaleg deg ma duruk kwit, ikwag doron inim, humon inim, bosie waruk inim horuruk katfag.

⁵ Airoho duruk mu, it Farisi on anyo inim, it ap Allah wene melaleg hwalduk on guru agama anyo inim en Yesus hweag-utuk kwit, “Hat hele wauk on su nenemulik duruk katfag ale melaleg anyo duk fug angge wereg lit, nunggwelug enenggik horuk fug angge saliog angge siburu nauk?” ulug, hein og-hausa.

⁶ Hein og-hausa ma, at Yesus en hweag-esauk kwit, “Hit ap homi su henambilik fam an leho nobaharuk kahep famen, henenda neg de, ninim minggirig welahep.

⁷ Hit hweag-esauk kahep ai, ap homi enewene melaleg deg kweleg, Ebe on, ulug hweag-esauk kahep ma, alemaroho mot-napuk kahep, ulug, Allah en ebag anyo, at Yesaya en hit henenda furebahat-da fug angge wereg lit, duruk kahep halug, demdoho lisu balfag.

⁸ At Allah wene melaleg anyo sebeloho folug, hit henombasi duruk katfag ale melaleg deg ma duruk kahep hisihi,” ulug, hweag-esasi.

⁹ Hweag-esasireg, “Hit henombasi duruk katfag ale wene melaleg deg ma duruk kamul bolug, at Allah en melalfag wene hit osoko deberuk kahep hisihi.

¹⁰ At Musa en, Henaknisi henisingasi enele furoho holduk kwit, enanggilug boruk kamek. Ne, henaknisi henisingasi siahap enepuk kahep halug waramuhup, ebag famen,

¹¹ hiren neg de ap homi hweag-esauk kwit, Henaknisi henisingasi hweag-esauk kwit, An nangge og-hitmin ulug dihi famen, ai Allah fahet og-uruhuk ulug, dirihik, ulug, hweag-esahup fano, ulug, hweag-esauk kahep ma,

¹² ap homi enisingasi enaknisi enobahet duruk kam on embeseruk kamag ulug hweag-esauk kahep hisihi.

¹³ Henemulik duruk katfag ale melaleg deg ma, ap homi hweag-esauk kahep anyo dil lauk fam, Allah wene ai sahaloho embesoul ulug duruk kahep hisihi. Ai duruk kahep hag, hit airoho humdoho dil lauk kahep hisihi,” ulug, hweag-esasi.

Ke fam siahap nenepuk, hweag-esebag wene

¹⁴ Hweag-esasireg, it ap homi humdoho hwi-enepsi anyo mundoho wahausa ma, hweag-esauk kwit, “Hit mundoho an nele henesanggo furoho hole folug fureberuk kamek.”

¹⁵ Hweag-esasireg, “Nauk kahep ai fam siahap henepuk eleg. Ite, henendaman wenggel-hauk on wilipuk fam siahap henepuk.

¹⁶ Henesanggo wereg halug, furoho holduk kamek,” ulug, hweag-esasi.

¹⁷ Hweag-esasireg, ap homi anyo embeselug olma kwisi mu, at ele wauk on anyo en, “Hat wene wal-heheg hweag-nesehen anyo furoho hweag-nesakin,” uswa.

^18-19 Uswa ma, at anyo en, “Hit inim henenda furebouk fug angge wereg lit, uruk kahep. Di angge su angge nauk kahep on anyo henendama kuruk eleg, we henehummu wambulug kuruk on anyo embeseik lauk kahep ma, di angge su angge nauk kahep on fam siahap henepuk eleg, su hauk kahep a?” hweag-esasi. Wene ai hweag-esasi anyo nauk on mundoho ousa eleg ulug hweag-esasi.

²⁰ Hweag-esasireg, ai en, ekenim hweag-esauk kwit, “Henendaman wenggel-hauk on wilipuk fam siahap henepuk.

²¹ Henendama siag on wenggeleheg, hwelani duhum on herako enebeheg, ap homi enengge herako weheg, ap wareheg,

²² homi baleheg, ap enengge suahi beil laheg, siag neg deheg, lal-enebeheg, enenda wenggeleg eleg on dil laheg, henendaman ahe wilibeheg, enebug seiale eheg, winik-wonog il laheg, wenenebo on hag dil laheg,

²³ ai, dil noruk ai mundoho henendaman wilipuk fam neg siahap henepuk,” hweag-esasi.

Hwe eke enda demdoho bebag wene

²⁴ Wene airoho hweag-esalug, o etman lasireg, o Tirus kwik lasi. Kwik lasireg, o eke wirigmu kwisireg etma wereg lit, “Ap homi en nea no ulug, heraho welatmin,” besi famen, duk ale nong-hong isi.

^25-26 Nong-hong isi mu, hwe eke ebe Yahudi eleg on obam indip o daerah Fenisia o propinsi Siria etmano on deg ma ahaloho anyo mungguat siag on endama kwisi mu wereg ma, Yesus abug holsireg, at akit lasi. Lasireg, apma sebe ulug, orohole elaheg debesireg ele abiroho heng-duruk kwit, “Nowe yei,” ulug, “An nahaloho endama mungguat kwisi mu, lisoho wilibi femihin en, hweag-hirihi,” ulug, hweag-itsi.

²⁷ Hweag-itsi mu, at Yesus en hwe anyo hweag-utuk kwit, “Omalik doron enesiburu homoroho nowag. Nauk eleg kweleg, enobahet deg on deloho mene og-om fug alereg,” ulug, hweag-itsi.

²⁸ Hweag-itsi mu, at hwe anyo en, “Ai famen, nowe. Doron enesiburu nauk kweleg, anggen del-fol e doalegma meja apma wamburuk on ai re, mene en nauk,” hweag-itsi.

²⁹ Hweag-itsi mu, aren, “Hat wene fano on airoho ehen fam, mungguat hahaloho endama kwisi anyo fahe wilip-aha ma, hobam lag.”

³⁰ Hweag-itsi mu, obam lasireg, ahaloho anyo mungguat endaman wilip-atsireg, fano atlug nohorukmu yinggig wereg ma, ha lasi.

Yesus en ap esanggo dahom on, ele hebu lareg on hilinggebag wene

³¹ Ai debesireg, at Yesus anyo en o Tirus en Sidon wahasireg, o kota numen fene en dil noruk katsireg, ik Galilea yenggelegma aik wahasi.

³² Aik wahasi mu, it ap homi etma on en, ap esanggo dahomdoho, ele hebu lareg on eke hondoholug, at Yesus akit feik lausareg, Yesus en enggik obam sebele foukwag ulug, enorohole enelaheg debousareg, hweag-utswa.

³³ Hweag-utswa ma, it ap homi humdoho kabogdeg anyo embeselug, at esanggo dahom on anyo hondoholug, enemumu lausareg, esanggoma enggik dum kwelabe foruk kwit, wasulahap oko ambilik anggen fam dopno-debeheg,

³⁴ debesireg, alukwe boholma lahabe fesireg, endaman, “Yehei,” besireg, “Efata,” hweag-itsi. Ai hweag-itsi ai, nit nenele fam, “Husukwag,” hweag-itsi.

³⁵ Hweag-itsi mu, esanggo hut-aheg, ele eleg on anyo ele wereg aheg, atsireg, ele eberoho isi.

³⁶ Ele eberoho isi mu, at Yesus en ap homi etma wereg on anyo komo-enepuk kwit, “Ap homi mun hweag-esa fug,” ulug, hweag-esauk katsi famen, deg kweleg, ele sahale folug, hweag-esa laheg neg duruk katswa.

³⁷ Hweag-isil lauk on anyo, enesanggo hole fousareg, “Enesanggo dahom on anyo huse feseheg, enele eleg on anyo enele wereg apdoho feseheg, debeseil noruk kwit, di deheg, su deheg, fano neg dil lauk su, yaho hwi,” ulug, enakol atlug, yanderuruk katswa.