MARKUS 11 - ALLAH WENE FANO WENE

Yesus o Yerusalem kwik lebag wene

¹ At Yesus inim lausa anyo o Yerusalem kwik laul ulug Duk Zaitun anyo aldukmu o sili Betfage inim, o Betania inim horog aik lausareg etano wereg lit, at ele wauk on biren mon-enepmin ulug,

² hweag-esauk kwit, “O sili atlumu lakiek. Owan kwik lauk kwit, wam keledai aut sabu ililig ap homi ambolowag fam hweria atuk eleg on hinil haluhup. Haluhupdeg ai loloho walug wamluhup.

³ Walug waharuk mu, it ap homi etman, Hit nunggwelug keledai lolduk kahep? ulug, hein og-henepuk halug, hiren, Nit Tuhan keledai eleg ma, Wag lakiek, ulug, hweag-neseheik ma, walug lauldeg obalma feik wamul, ulug, hweag-esakiyug,” ulug, hweag-esasi.

⁴ Hweag-esasi mu, it anyo lausareg, wam keledai aut kwe humon sok fam kumbi ililig mu inil hausareg, lolswa ma,

⁵ it ap homi we on etma wereg anyo en, “Hit keledai aut kumbi ililig nangginluhup en lolduk kahep?” ulug, hein og-esausa.

⁶ Hein og-esausa ma, it anyo en, “At Yesus en airoho hweag-esakiyug,” ulug, hweag-esasi anyo hweag-esausa ma, iren, “Yu o, walug lakiek,” ulug, hweag-esausa ma, walug lausa.

⁷ Keledai anyo walug, Yesus akit wahausa ma, it anyo enesum dagma on nonggoloho wam ambolowag fam yangguli fousa ma, at Yesus anyo fam hweriatsi.

⁸ Hweriatsi mu, it ap homi humdoho enesum fiselaroho kwe humon fam doaldil laheg, it foman e enggela enggelaman somboroho kwema doaldil laheg, debelug,

⁹ at anyo lauk kweleg, it foma it dam laheg, foma ombolim laheg, dil lauk kwit, “Allah mot-dukohon! Tuhan en mondorik wahasi su, mot-dukohon.

¹⁰ Nenomba Daud apma nenobahamin ulug waharuk mu, leho foukohon. Bohol emberimmu wereg anyo mot-dukohon!” ulug, enemitmit dil lausa.

¹¹ Enemitmit dil o Yerusalem kwik lausareg, ai en, at Allah obam wirigmu kwik lausa. Kwik lausareg, at Yesus anyo di angge su angge il kumu hil lasireg, o hup atmin ulug duruk kweleg, at ele wauk on ap nesanggoen anyo inim, o Yerusalem en wilibik watlug, o Betania kwik wahausa.

Yesus en e ara wipdoho febag wene

¹² Noholug, likia, o Betania en o Yerusalem kwe fam lauk kwit, Yesus siburu obok disi.

¹³ Disi mu, at Yesus yatman e ara eke enggela humdoho wereg ma, il fu hasireg, “E anyo anggen yihig a, eleg a?” ulug, indipmu horogdoho ha lasireg, anggen yihiruk sali owan aik waharuk eleg ma, enggela neg il hasi.

¹⁴ Enggela neg il hasireg, e ebe anyo hweag-utuk kwit, “Hat hanggen ap homi eke nauk kamuhup mun eleg,” ulug, hweag-utuk mu, at ele wauk on anyo enesanggo holswa.

Yesus en Allah obam wirigmu hwale febag wene

¹⁵ At Yesus ele wauk on inim o Yerusalem aik lausareg, at Yesus anyo at Allah obam wirigmu kwisireg, it ap homi Allah obam wirigmu etma onggo hundureheg, onggo hweleheg, duruk anyo muko wilibi feseruk kwit, it uang aham-aham atuk mu, enahan doaleg inim, it suwe bel hag onggo hundutuk on inim enahan hweriatuk angge anyo inim, endenoho fesesi.

¹⁶ Endenoho fesesireg, “Hit Allah obam wirigmu di angge su angge walug kweheg, wilip-aheg, duk fug,” hweag-esasi.

¹⁷ Hweag-esasireg, wene hweag-esauk kwit, “An nobam wirig su, di ap homi su ap homi enunggul unuk domog en somban uruk obam su, uruk kamuhup, ulug, lisu balfag anyo eleg? Lisu balfag famen, hit neg de, o su, ap herako walug herahaik waharukmu hag deberuhup mu, hisihi,” ulug, hweag-esasi.

¹⁸ Hweag-esasi mu, it Allah il hanim ap homi enobahet duruk on imam enowesi inim, it Allah wene melaleg hwalduk on guru agama inim, ele hweag-esauk mu enesanggo holswareg, it ap homi humdoho kabogdeg anyo hweag-esauk fam yanderuruk katswa ma, enakol atswareg, “Keroho waruhuk behep?” ulug, abug uswa.

¹⁹ Ne, o hup atsi mu, Yesus at ele wauk on inim o sili hummu etmano en wilibik wahausa.

E ara bug atfag ale fam hweag-esebag wene

²⁰ Wilibik wahausareg noholug, hubetdoho kwe fam lauk kwit, e ara anyo omanggen nim mundoho bug atsi hausa.

²¹ Hausareg, Petrus en e hweag-utuk mu hasi anyo ebet-atsi mu, “Guru, yei! E ara wipdoho ferihin anyo bug atsi su, hil hakin!”

²² Hweag-itsi mu, at Yesus en, “Henda Allah fam dip-debelug demdoho boruk kamin.

²³ Henda ik am heg am duk fug angge, henele uruk kahep higitdoho aruhu boruk kwit, Duk humon su, al oko ik yenggelegma sebelduk mu heamin, uruk halug, airoho duruk mu hahup, ulug, demdoho hweag-hisihi.

²⁴ Hit somban uruk kwit, di angge su angge heng-dulug, Mundoho hwilihi, ulug, demdoho boruk kahep ai fam og-hesauk mu hahup.

²⁵ Hit eke en somban imin ulug duruk kwit, ap eke hinim minggirig welahep halug, Henakni boholma wereg anyo en hit henesiag apeleg apdoho hobahaukwag ulug, at asiag hiren henapeleg apdoho folug welamek. [

²⁶ Enesiag henapeleg apdoho feselug welahep fug halug, Henakni boholma on en hit henesiag apeleg apdoho henobahamisi fug,” ulug, hweag-esasi.]

Sa ele fam duruk kahen, ulug, hein webag wene

²⁷ Hweag-esasireg, ai en, Yerusalem nin lausa. Lausareg at Yesus anyo Allah obam wirigmu kwisireg noruk kweleg, it Allah il hanim ap homi enobahet duruk on imam enowesi inim, it Allah wene melaleg hwalduk on guru agama inim, it ap enowesi inim, at akit wahausareg,

²⁸ “Hat di deheg su deheg duruk kahen anyo sa ele fam duruk kahen? San hweag-hitsi fam duruk kahen?” ulug hein, og-hausa.

²⁹ Hein og-hausa ma, at Yesus en, “An wene eke hein og-hesa. Onggo hweag-nutuk halug neg de, sa ele fam duruk kahi anyo hweag-hesamin.”

³⁰ Hweag-esasireg, “At Yohanes Pembaptis ai, boholman hweag-itsi fam ikma belap-enepuk katsi a? Ap homi en hweag-utswa fam belap-enepuk katsi a? Hit hweag-nemek!” ulug, hweag-esasi.

³¹ Hweag-esasi anyo, it it wene matuk kwit, “Niren, Boholman hweag-itsi fam, ul halug, aren, Ne, ai halug henenda nunggwelug at demdoho bouk fug angge welatuhup? hweag-nesamisi.

³² Ne, niren, Ap homi en hweag-utswa fam, ul halug ai oho anggindeg!” ulug, it ap homi mundoho at Yohanes Allah wene hweag-esauk on boruk katswa ma, enakol en

³³ Yesus hweag-utuk kwit, “Nit nenapeleg,” hweag-utswa. Hweag-utswa ma, “Ne, ai halug, an nim sa ele fam duruk kahi hweag-hesamin fug,” ulug, hweag-esasi.