MARKUS 10 - ALLAH WENE FANO WENE

Yesus en ap enohwesi embeseruk ale fahet hweag-esebag wene

¹ Hweag-esasireg, o etma embeselug, o Yudea kwe lasireg, Ik Yordan foma fil nindig-atsi. Nindig-atsireg, ap homi humdoho at akit kabog-dik lausa ma, hweag-esauk katsi hag, hweag-esasi.

² Hweag-esauk mu, it Farisi on foma anyo at akit lausareg, abut baldul ulug hweag-utuk kwit, “Nit nenewene melaleg famen uruk kwit, Ap eke en ohwe oho on embesehu fano, ulug, hweag-nesauk mu, hauk kahen a, eleg ane?”

³ Ulug, hein og-hausa ma, at Yesus en, “At Musa en wene keroho hweag-hesebag?” hweag-esasi.

⁴ Hweag-esasi mu, it anyo en, “At Musa en, Hwe embesehuk ulug lisu baloho folug neg de embesehup fano, ebag,” hweag-utswa.

⁵ Hweag-utswa ma, at Yesus en, “Henobabut maloloreg lit hweag-hesauk mu, henesanggo holuk fug alereg en wene melaleg ai lisu bal-hesebag famen,

⁶ at Allah en o walhilmu, di angge su angge wal-duruk kwit, ap wal-deheg, hwe wal-deheg, debebag ma,

⁷ ap eke en isinga akni embeselug ohwe inim sebe ulug,

⁸ enebe biren famen, misig neg amuhup, ebag ma,

⁹ at Allah en sebe-debesesi on ai, ap homi en minggiroho fesehup fug,” hweag-esasi.

¹⁰ Hweag-esasireg, olma kuswa ma, at ele wauk on anyo en wene hweag-esasi on anyo, ekenim hein wausa.

¹¹ Hein wausa ma, “Ap en at ohwe atam on embeselug amu on wauk halug, ohwe atam on anyo wereg kweleg, hambena duruk.

¹² Ne, hwe en ahun atam on embeselug, ap amu on hwelauk halug, hwe ai hambena duruk neg,” ulug, hweag-esasi.

Yesus en enomaliki doron fanoap enebukwag ulug enobahet Allah hweag-etfag wene

¹³ Hweag-esasi mu, enomaliki doron at enggik enunggulmu sebel-enebukwag ulug, at akit og-eneplug wahausa ma, at ele wauk on en, bet-enepswa.

¹⁴ Bet-enepswa ma, at Yesus olok hum atsireg, bet-enepuk kwit, “Allah apma welamuhup ai, it omalik doron su hag deg ma, an nakit wam hag kwe baluk fug. An nakit waharuk kamag!

¹⁵ It omalik doron su, Allah apma welamul ulug kwik lauk hag hit airoho kwik lauk eleg halug, kuhup fug,” ulug, “demdoho hweag-hesauk kahi,” hweag-esasi.

¹⁶ Hweag-esasireg, omalik doron anyo mako bug-debesesireg, enggik enunggulmu sebele feselug fanoap enebukwag ulug enobahet Allah hweag-itsi.

Ap enenggik wereg on debag wene

¹⁷ Allah fanoap enebukwag ulug hweag-itsireg, kwe humon fam lamin ulug duruk mu, ap eke at akit buroho lasireg, apma sebe ulug, “Guru nowe, yei. Hat fano neg welahen su, an noluk mundoho welaruhuk en keroho dimin?” ulug, hein wasi.

¹⁸ Hein wasi mu, at Yesus en, “Ap misig eke fano duruk eleg. Allah amu neg fano wereg ma, hat nunggwelug an fano hweag-nerehen?”

¹⁹ Hweag-itsireg, “Diroho diyug, airoho diyug wene numen melalfag anyo, Ap homi enowaruk fug, homi baluk fug, ap enengge yoholi angge wa fug, ap homi seiale enobam dopno-esa fug, ap homi lal-enepuk kwit enengge hwela fug, hakni hisinga enenggilug boruk kwit, enele holduk kamek, ebag wene ai, hat holukdeg lahen.”

²⁰ Hweag-itsi mu, at anyo en, “Eleg, Nowe. Wene ai an omalik dotdeg man furoho duruk katihik,” hweag-itsi.

²¹ Hweag-itsi mu, at Yesus alukwe endenoho, il kumu hasireg, enda duruk kwit, “Wene misig neg de owan duruk kahen fug mu hiihi angge hweag-hirik. Hat hamunangge manangge onggo baloho, it ap enengge eleg on anyo yohwan-enebik lakin. Yohwan-enepuk halug, hat hangge fano on boholman humdoho hwelahun. Ai debelug, an ninim lauk kamul en manu.”

²² Hweag-itsi mu, angge humdoho foroho wereg ma, orohole hesilduk kwit, enda firoho lasi.

²³ Lauk kweleg, at Yesus anyo alukwe endenoho at ele wauk on anyo kumu esauk kwit, “It ap enenggik humdoho wereg on anyo, at Allah apma feserukmu kwik la ale mun anggindeg,” ulug, hweag-esasi.

²⁴ Hweag-esasi mu, at ele wauk on anyo enakol humdoho atswa ma, at Yesus en nin eke, “Nautsi. At Allah apma feserukmu kwik la ale mun anggindeg,” ulug, hweag-esasireg,

²⁵ “Wam unta hein ele foreg kwe kwik la alereg famen, ap enggik humdoho wereg on Allah apma feserukmu kwik la fug alereg,” isi.

²⁶ Ai isi mu, it anyo enakol humdoho atswareg, yanderuruk kwit, “Ai halug, Allah en sa mel enahap wendaruhu?” ulug, hein og-og atuk katswa.

²⁷ Hein og-og atuk katswa ma, at Yesus anyo en il kumu esauk kwit, “It ap homi en duk fug alereg famen, Allah en neg de di angge su angge duk alereg.”

²⁸ Hweag-esasi mu, at Petrus en, “Ne, nit neg de di angge su angge mundoho embeselug hat ninim noruk kamuhuk en waharuhuk anyo re,” hweag-itsi.

²⁹ Hweag-itsi mu, at Yesus en, “An nelaheg en Fano Wene hum amag ulug, henobam wirig inim, henowesi henautsi inim, henerekwi inim, henaknisi henisingasi inim, henomaliki inim, heneyabuk wirig inim, mundoho embeseruk halug,

³⁰ ketia re obalma, henobam wirig inim, henowesi henautsi inim, henerekwi inim, henisingasi inim, henomaliki inim, heneyabuk wirig inim, deng humdoho neg, ap homi enerim henepuk kweleg, wahup deg, fobik en henoluk mundoho-mundoho welamuhup.”

³¹ Hweag-esasireg, “Ap humdoho it dam lauk on ai, fobik amuhup. Ne, it fobik lauk on ai, it dam amuhup,” ulug, hweag-esasi.

At Yesus en, Nowaruhup, ulug, henahanam fagdoho hweag-esebag wene

³² O etman, o Yerusalem kwe fam lauk kwit, at Yesus atam lasi mu, it at ele wauk on anyo en, “Nanggin-nenebuhu?” ulug, enakol en enenda firig lit, lauk kweleg, fobik it ap homi enombolim lausa anyo en enakol dil lausa. Enakol dil lauk mu, at Yesus en it ap nesanggoen on anyo og-eneplug enemumu lasireg, at fobik debehup wene hweag-esasi.

³³ Hweag-esauk kwit, “Yaho yei. Nit o Yerusalem lauk kahe. Etma kwik lahuk mu, an Ap endag-atihik anyo nebe seneko, it at Allah il hanim ap homi enobahet duruk enap imam enowesi inim, it Allah wene melaleg hwalduk on guru agama inim, og-esauk halug, it ap en nowarukwag ulug enele maho folug, it ap dagma on og-esahup.

³⁴ Og-esahup mu, nenggali wareheg, wasulahap supdoho nobam dag-debeheg, yeik lal-fisog nowareheg, debelug binggi nowaruhup. Nowaruhup mu, hup biren noholug henahaneg salim noluk inaruhuk,” ulug, hweag-esasi.

Yakobus Yohanes inim en Yesus heng-debag wene

³⁵ Hweag-esasi mu, at Zebedeus omaliki Yohanes Yakobus inim, at Yesus akit lausareg, “Guru yei. Nit nenenda wenggeloho folug hweag-hutuk kahe anyo nenebuhun en wahe,” hweag-utswa.

³⁶ Hweag-utswa ma, at Yesus en, “Hit wenggelug wahep anyo an nangginoho henebuhuk ulug wahep?” ulug, hein og-enepsi.

³⁷ Hein og-enepsi mu, it biren anyo en, “Hat Allah en leho hobahaku mu, hangge lik-louk dalug fobik waharuk halug, hat hebe foma foma unduhuk nenobahakun en, hein og-heehe,” ulug, hweag-utswa.

³⁸ Uswa ma, at Yesus anyo en, “Hit hweag-nerehep ai, henapeleg deg lit hweag-nerehep. An nahaik hwenanggeg nahuk ai, hit nenggep halereg behep? Ikma belap-enepuk anyo hag an belabe nobahakup ai, hit inim belabe henobahakup fano behep?” Ulug, hein og-enepsi mu, it anyo en, “Yu o, fano neg.”

³⁹ Uswa ma, at Yesus en, “An nahaik hwenanggeg nahuk anyo, hit ninim nenggeg, ne, an nabuhup anyo, hit ninim nenebeheg, duhup famen de,

⁴⁰ nebe foma foma welamuhup ale ai neg de, an den eneko henobahaki ha fug alereg. Allah en eneko fesebag anyo neg de fesehu,” ulug, hweag-esasi.

⁴¹ Hweag-esauk on it foma numen anyo holswareg, it Yakobus Yohanes inim bet-enepswa.

⁴² Bet-enepswa famen, at Yesus en it mundoho hwi-enepsireg, wahausa ma, hweag-esauk kwit, “It ap dagma on fahat-enesug welamag ulug unduhuk feseswa enap ai, enele omamne fam melal-enebeheg, ne, it enaknisi ap humon en ap homi airoho dil noruk kamag ulug enele omamne hweag-eseheg, duruk ale hit heneluk famen,

^43-45 hit neg de airoho duk fug. An Ap endag-atihik anyo an nobahet duhup en mingming-henebuhuk ulug waharihik fug. Ite, henemingming angge hag atlug henobahet deheg, ne, hit ap homi humdoho henobahet wararuhuk fam henonggo bale folug, wundetdoho henobahakeg, dukwag ulug waharihik mu, hit ap su on eke en, An kain on aruhuk, boruk halug henemingming angge aheg, ne, hit ap su on eke en, An neg enowe welaruhuk, boruk halug, hit mundoho henapma wereg lit, henobahet deheg, duruk kamuhup,” ulug, hweag-esasi.

Yesus en Bartimeus il bug on hilinggebag wene

⁴⁶ Wene anyo hweag-esasireg, o Yerikho aik lausa. At ele wauk on anyo inim, it ap homi humdoho kabog-duswa on anyo inim lausareg, ai en, o Yerikho etmano en dagma wilibik lauk mu, Timeus amloho Bartimeus il bugdeg lit aheng-heng on anyo kwe humon elahaletma heng-enepuk kwit, hwerieg welatsi.

⁴⁷ At Yesus Nazaret on waharuk ulug esanggo holsireg, “Yesus, yei! Hat Daud omba wahen su, an nelaheg bein,” ulug, ele hum fam hweag-itsi.

⁴⁸ Hweag-itsi mu, it ap homi anyo en ele eleg amag ulug bet-duswa man, ekenim, “Daud omba yei! Nelaheg bein!”

⁴⁹ Ulug, ele hum fam abiroho eheg neg isi mu, at Yesus anyo sombandoho bok atsireg, “Hwiriek!” hweag-esasi mu, iren ap il bug on anyo hwiruruk kwit, “Hwi-hapuk mu, hakol duk fug. Inamin,” hweag-utswa.

⁵⁰ Hweag-utswa ma, feiyaloho inatsireg, asum dag fikit horoho hwik-esalug, Yesus akit lasi.

⁵¹ Akit lasi mu, at Yesus en, “An den hat nanggin-napmisi ulug behen?” Isi mu, at il bug on anyo en, “Nowe guru, nil hiling-nabukwag ulug behi,” hweag-itsi.

⁵² Hweag-itsi mu, at Yesus en, “Hat henda an nobam dip-debelug, demdoho behen anyo fam hil fano aha ma, hobam lag.” Hweag-itsi mu, il bug on anyo fenggen atsireg, at Yesus inim kwe humon fam lausa.