LUKAS 2 - ALLAH WENE FANO WENE

Yesus endag-atfag wene

¹ Ai salim ap kain on Kaisar Agustus en it ap homi di obam su obam enebe wenag-enepuk kwit, enunuk lisu balukwag ulug wene melalsi.

² Enunuk balduk ale keram duswa ai, ap Kirenius o propinsi Siria etma gubernur wereg kweleg balswa.

³ Enunuk balukwag ulug, it ap homi mundoho enobam indipmu domog lausa.

⁴ At Daud omba ambiangma on eke Yusuf anyo, o Galilea sili Nazaret en o Yudea sili Betlehem etma lasi.

⁵ Hwe Maria Yusuf momalsi anyo omalik ahummu atsi mu, ambieg enunuk lisu balukwag ulug lausa.

⁶ Lausareg, wereg ma, enderikoho il fenggensi mu,

⁷ omalik wandeba ap angge endetsi. Endetsireg, sum hwililipdoho o ap homi kwe lauk kwit, nohorukmu hopo isi mu, wam enobam wam en sahaleg angge belapukmu etma yinggi fousa.

Ap domba hwalduk katfag wene

⁸ Hup ai salim, o Betlehem dag fil etma, it ap domba hwalduk on en domba enggelangge naukmu etmano o hubanggo enandomba hwalduk katswa.

⁹ Hwalduk kwit, wereg ma, Tuhan ayonggo mon-enebik waharuk on malaikat eke it wongdeg man, enekit inaik waharuk kwit, Tuhan aseleg enobam fisaho fesesi mu, enakol humon bousa.

¹⁰ Enakol humon bousa ma, yonggo anyo en, “Henakol bouk fug. It ap homi mundoho enahayeg bohup wene walug hweag-hesa wahi mu, henesanggo holiek.

¹¹ Tuhan henahap wendat-henepuk on Kristus anyo, yoho re Daud welatfagma etano henobahet endag-heseheik.

¹² Ne, omalik anyo su, ulug, enegdeg ma haluhup en, omalik asum hwililipdoho wam en sahaleg angge belapukmu yinggi fehesa angge re, laluhupdeg, higitdoho ha la kwiyug,” ulug, hweag-esasi.

¹³ Owan hweag-esauk kweleg, enapeleg man, it boholma yonggo waharuk on malaikat esan humdoho inim seberik wahausareg, inim suni uruk kwit, Allah unuk mot-duswa.

¹⁴ Mot-duruk kwit, “Bohol emberimmu wereg on Allah unuk leho foruk kamul. Ne, kwenangma suma Allah en enda enepuk anyo enenda seroho welamag,” ulug, mot-duswa.

¹⁵ Mot-duswareg, yonggo anyo domba hwalduk on embeselug, enambol somban boholma laharuk kweleg, it ap domba hwalduk on eke en eheg, eke en eheg, uruk kwit, “Omalik endag-aha ale Tuhan en hweag-neseheik su, nit o Betlehem ha lakohon.”

¹⁶ Uswareg, buroho lausareg, Yusuf, Maria, omalik anyo wam en sahaleg angge belapukmu yinggi folug, inim wereg ma, hera-debeselug, hweag-enepswa.

¹⁷ Hweag-enepswareg, inil esalug, yonggo en omalik ondoho abug hweag-esasi wene anyo ap homi bilinggoho hweag-esausa.

¹⁸ Wene hweag-esausa anyo, it ap homi holswareg, it mundoho en, “Yehei u!” ulug, yanderuswa.

¹⁹ Yanderuswa famen, at Maria neg de wene il lauk on mundoho ai, endama furebesireg, endama ebetuk katsi.

²⁰ Ne, it ap domba hwalduk on enambol somban waharuk kwit, yonggo en it hweag-esasi anyo higitdoho inil heheg, enesanggo holeheg, duswa ma, Allah unuk motdoho leho feil wahausa.

Yesus ahap balukwag ulug, Allah og-etfag wene

²¹ Hup sabiren noholug, liginen am ahap balswa ma, at isinga owan ahummu am fug mu at boholma yonggo en, “Unuk Yesus soaliyug,” ulug, hweag-itsi anyo higitdoho unuk Yesus soalswa.

²² Soale folug, Musa en, “Homi omalik ondoho folug, olman wilibuk fug angge, hup airoho noholug, sali baliyug,” ulug, Allah wene melalfag on lisu balfag higitdoho, noholug, omalik Tuhan og-umul ulug, walug o Yerusalem wahausa.

^23-24 Walug wahausa anyo re, Tuhan Allah wene melalduk kwit, “Ap wandeba endag-atuk halug ai, an Tuhan nobahet eneko nobahayug,” ne, eke, “Suwe bel hag lohon biren ane, suwe yalma hag omaliki biren ane, waroho, an Henakni nunuk bogdeg og-numuhup,” ulug, lisu balfag anyo higitdoho dul ulug, walug lausa.

²⁵ Ap Yerusalem on eke unuk Simeon welatsi. At de Allah akol boruk kwit, Allah wene furoho duruk katsi. Duruk kwit, it ap Israel on enenda aho ware feseruk on wamag ulug nangno-hauk katsi. Ne, Allah Aheime at obam welatsi.

²⁶ Allah Aheime at obam wereg lit, Tuhan en eneko unduhuk fohu on Mesias anyo hil ha fug angge wararuhun fug, ulug, endama olukdoho fesi mu,

²⁷ Allah Aheime en Simeon enda wenggel-itsi fam Allah obam wirigmu kwisireg wereg ma, Yesus isinga akni en Allah wene melalfag ma, duruk ale higitdoho dul ulug, omalik Yesus walug kuswa.

²⁸ Kuswa ma, at Simeon anyo omalik anyo mako bugdoho wasireg, Allah unuk mot-duruk kwit,

^29-32 “Nakni! Hat en di wene su wene fag-dil waharuk kwit, it ap dagma on enolukdoho selehap enebeheg, ne, homaliki Israel enunuk leho feheg, duhun en, it di ap homi su ap homi mundoho inil hanim fik-fouk dirihin nenahap wendatuk on anyo, an neg de nil hihi mu, hweag-nitihin anyo higitdoho hat hamingming angge an anyo nenda sereg lit, hea waruhuk en ketia fotog-neakin” ulug, mot-disi.

³³ Omalik abug isi ale anyo akni isinga en holswareg, “Yehei u!” ulug, humdoho yanderuswa.

³⁴ Yanderuruk kweleg, at Simeon anyo en ahayeg enobam fesireg, Yesus isinga Maria hweag-utuk kwit, “Hesanggo holeg lamin. At Allah en homalik su ap homi Israel on humdoho leho feseheg, sebele feseheg, dukwag ulug, eneko unduhuk fesi. Ap homi eneluk am on wereg lamag ulug at unduhuk fesi famen,

³⁵ ap homi humdoho, Nenerim, uruk fam enendama boruk anyo enam aruhu. Hat oho fit fam henda daloho howatuk hag henda anggin hahun,” ulug, hweag-itsi.

³⁶ Hwe Allah wene hweag-esauk katsi on eke Fanuel ahaloho unuk Hana, ununggul unuk Asyer on welatsi. Duhum deg lit, ahun wasireg, inim tahun sabiren sebereg welatswareg, ahun waratsi.

³⁷ Waratsi mu, sohwe wereg lit, 84 tahun disi mu, mun sobal atsireg, Allah obam wirigmen wilibik la fug angge mundoho etma Allah obahet neg amu duruk kwit, hup hundig sekan hundig siburu na fug angge ambilik hweang hag debelug, somban neg uruk katsi.

³⁸ Nukoho ai salim neg hwe anyo wahasireg, Nenakni Allah dang-disireg, it at eke ap homi Yerusalem on wundetdoho feseik waruhu nangno-hauk anyo enobam omalik ondoho anyo abug fagdoho hweag-esasi.

³⁹ Tuhan Allah awene melalfag anyo akni isinga mun higitdoho duswareg enobam o Galilea sili Nazaret wahausa.

⁴⁰ Ne, omalik anyo sauwe aheg, di wene su wene oluk aheg, duruk kwit enda wereg on atsi. Ne, Allah ahayeg at obam welatsi.

Nimi Yesus tahun nesanggoen debelug, Allah obam wirigmu debag wene

⁴¹ Yesus akni isinga tahun eke waharuk fam domba waroho soni Paskah esetuk mu naul ulug, o Yerusalem laheg neg duruk katswa.

⁴² It doron ondoho kweleg tahun nesanggoen atuk halug, soni Paskah eserukwag ulug, laheg duruk katswa ma, nimi Yesus tahun nesanggoen atsi mu, inim eserukoho lit lausa.

⁴³ Soni nalug, akni isinga anyo enobam wongdoho waharuk kweleg, nimi Yesus anyo inim wahasi fug. O Yerusalem bok atsi.

⁴⁴ Akni isinga en enapelegdeg lit, ap homi humdoho inim waharuk ane beil wahausareg, nohoul ulug duruk kwit, hauk men ebe eleg ale en, owe aut a, ori a, inim wereg ane, ulug, heraruswa.

⁴⁵ Heraruswa man, ebe eleg ale en, enambol sombandoho o Yerusalem heraril lausa.

⁴⁶ Heraril lauk kweleg, hup biren nohousareg, henahaneg salim Allah obam wirigmu, it ap guru Yahudi on enenggelegma hwerieg lit, enele holeheg, aren it hein og-enebeheg, duruk mu, hweahausa.

⁴⁷ It ap humdoho at ele holswa anyo at enda mun wenggeleg lit, wene furebeheg, onggo hweag-eseheg, duruk mu, hausareg, “Yehei u!” ulug, yanderuswa.

⁴⁸ Akni isinga anyo en hweahausareg, enakol en youk lalug, isingan, “Namloho. Nunggwelug airoho nenepihin? Hakni ninim nenenda firig lit, hera-habil waharuk kahe su, nesakin!”

⁴⁹ Hweag-itsi mu, at anyo en, “Hit nunggwelug an hera-nabil wahep? An Nakni obam wirigmu welam ale napuk ai hit henepeleg ma hisihi.”

⁵⁰ Wene ai hweag-esasi famen, it furebousa fug.

⁵¹ Ai en inim o Nazaret wahausareg, at akni isinga enapma wereg lit, enele furoho holduk katsi. Ne, at isingan wene il noruk anyo endama furebelug, ebetuk katsi.

⁵² At Yesus neg de enda wereg aheg, ebe sauwe aheg, duruk kweleg, Allah inim, ap homi inim en enahayeg at obam foruk katswa.