IMAMAT 27 - ALLAH WENE FANO WENE

Tuhan obahet foruk kwit duruk kamuhup ale ulug wene melaleg hweag-esebag wene

^1-2 Tuhan en wene melaleg su it ap homi Israel on fahet hweag-utuk kwit, ap eke en ele diroho duhuk ulug uhu on fahet onggo baloho ulug ebe An og-nutuk kwit halug de, ap ai en onggo uang Tuhan Obam Sabo salegman foruk higitdoho fam onggo balduk karuhu.

^3-7 – It enebe umur 60 tahun emberim fil on en: ap halug uang perak 15 en feheg, homi halug uang perak 10 en feheg, – It enebe umur 20-60 tahun hwili on en: ap halug uang perak 50 en feheg, homi halug uang perak 30 en feheg, – It enebe umur 5-20 tahun hwili on en: ap halug uang perak 20 en feheg, homi halug uang perak 10 en feheg, – It enebe umur 5 apma fil on halug de: ap halug uang perak 5 en feheg, homi halug uang perak 3 en feheg, foruk kamuhup.

⁸ Ne, ap diroho duhuk ulug ele foruk on ai lahe onggo diroho foruk kamuhup ulug wereg on fouk ale enggik elaheg deg halug de, aren ap Tuhan obahet foruk on anyo walug it imam enekit waharuk kamuhup. Walug waharukmu it imam en onggo ap ai inim ilitdoho aren duk alereg on sebeloho foukwag ulug hweag-utuk karuhu.

^9-10 Aren diroho duhuk ulug uruk on ai lahe wam Tuhan og-hiruhuk ulug ele folug halug aren wam amu on inim aham duhu hayog. Di angge su angge Tuhan obahet ulug foruk on etma re Tuhan angge neg atuk mu re, aren aham duhu famen ohore wam ebe birenet de Tuhan angge neg aruhu.

¹¹ Famen de wam ai lahe ousa wereg on Tuhan obahet fouk fug alereg on fahet ap anyo en ele folug halug de at ele foruk on anyo en de wam anyo walug it imam enekit waharuk karuhu.

¹² Walug waharukmu it imam en wam anyo orohole deg ale kumu halug onggo diroho ulug aren hwili foruk karuhu. Ne, aren onggo hwili foruk on aire mundoho waratuk karuhu.

¹³ Ne, ap anyo en lahe wam anyo nikangge onggwareg onggo bal-damin boruk halug de aren wam anyo onggo deg ale higitdoho folug foma eke dua puluh persen eke inim dopnoroho foruk karuhu.

¹⁴ Ne, ap eke at obam wirig Tuhan fahet ulug foruk halug it imam en o anyo deg ale orohole kumu halug onggo diroho ulug katukdoho uruk kamuhup. Ne, onggo iren su hwili ulug foruk kamuhup on aire mundoho waratuk karuhu.

¹⁵ Ne, ap anyo en lahe o wirig anyo onggwareg onggo bal-damin ulug boruk halug de aren o anyo onggo deg ale higitdoho folug de foma eke dua puluh persen eke inim dopnoroho foruk karuhu.

¹⁶ Ne, ap eke anggwenang foma Tuhan fahet ulug foruk halug, onggore kwenang ai fam a nunggwe en hagdoho yaruhup ulug fubi debelug foruk kamuhup. Ne, 10 kilo gandum fahet de onggore uang perak on 10 en foruk kamuhup.

¹⁷ Ne, kwenang ai lahe tahun enonggwareg og-esauk on anyo fam foruk halug, onggore abirangge higitdoho foruk kamuhup.

¹⁸ Famen de kwenang anyo tahun enonggwareg og-esauk on li anyo mundoho atuk men foruk halug de it imam en tahun enonggwareg og-esauk on fobik on anyo owan waharuk eleg kweleg tahun nunggwe en welaruhu ulug onggo diroho fouk alereg ulug wenag halug onggo sebeloho foukwag ulug hweag-esauk karuhu.

¹⁹ Ne, ap foruk ahun anyo en kwenang anyo onggo bal-damin ulug boruk halug de aren kwenang anyo onggo higitdoho folug foma eke dua puluh persen eke inim dopnoroho foruk karuhu.

²⁰ Ne, kwenang anyo lahe aren Tuhan fam onggo baleg eleg angge ap amu on eke en hun-dowag ulug onggo hundutuk halug de aren kwenang ai fahet onggo balmin ulug ele uhu hayog.

²¹ Tahun enonggwareg og-esauk on fobik on fam de kwenang aire mundoho-mundoho Tuhan angge aruhu mu, it imam og-esahup.

²² Ap eke en lahe yabuk aren onggo hun-dasimu Tuhan og-utuk halug de,

²³ it imam en onggo deg ale kumu halug diroho fouk alereg ulug, tahun enonggwareg og-esauk on fobik on anyo aik waharuk eleg kweleg tahun nunggwe en welamuhuk ulug kumu halug hwili foruk karuhu. Forukmu ap anyo en yabuk anyo onggo nukoho anyo salim neg forukmu uang anyo Tuhan angge atuk karuhu.

²⁴ Tahun enonggwareg og-esauk on anyo fam de yabuk aire at onggwareg keram on anyo fam oho ne it aren ondohoma on fam oho og-esauk kamuhup.

²⁵ Di onggo su onggo aire o Tuhan Obam Sabo salegma en onggo deg aleroho neg duruk kamuhup.

²⁶ Wam domba omalik inim, kambing omaliki inim keram endag-atuk on aire Tuhan angge neg. Ne, wam omalik keram endag-atuk on aire Tuhan angge neg deg ma nenenda fano fam ulug Tuhan fahet waroho feik wam fug.

²⁷ Famen de wam ousa on en keram endag-atuk on halug de onggo balduk kamuhup fano neg famen de onggo Tuhan Obam Sabo salegma deg aleroho fam folug de foma eke dua puluh persen eke inim seberoho foruk kamuhup. Ne, onggo balduk eleg halug de ap amu on fam onggo Tuhan Obam Saboma deg aleroho hundutuk kamuhup.

²⁸ Wam inim, kwenang inim ap inim aire mundoho-mundoho Tuhan angge neg deg ma ap misig eke sa en ulug oho Tuhan fam diroho duhuk ulug awene eleg angge onggo hundureheg, onggo baleheg duk fug alereg.

²⁹ Ap waruhuk en ulug Tuhan obam eneko folug halug ohore onggo baluhup hayog, ap aire mundoho elehapdoho feiyug.

³⁰ Henanggwenang famen anggen yihig inim gandum famen inim, di ahan anggen su ahan anggen mundoho en inim en soho en hit hwelalug misig num on aire Tuhan fahet foruk kamuhup.

³¹ Ne, ap eke en lahe anggen yihig on etma en foma hun-damin boruk halug de ai fahet onggo foruk ale on inim foma eke dua puluh persen eke inim dopnoroho foruk karuhu.

³² Wam endetuk on en wenako numen deg halug num on aire Tuhan angge on. Ne, wam ai lahe misig-misig wenag hauk men wam nangginig on en num on halug aire Tuhan angge.

³³ Ap wam akni ahun ai en de fano on ke siag on ke ulug eneruhu hayog. Ne, aren oho aham duhu hayog. Aren aham duhu famen ohore wam ai ebe birenet de Tuhan angge atuk mu ap en onggo baluhup fug.

³⁴ Wene melaleg ai airoho Tuhan en Dom Sinai famen it ap homi Israel on fahet ulug Musa hweag-etfag on de ai.