HAGAI 1 - ALLAH WENE FANO WENE

O Tuhan Obam anyo nikangge wurukwag ulug en melal-enepfag wene

¹ Hun Darius ap homi Persia enap fahet raja inatfagdeg melal-enepuk kwit weregman neg de tahun bireneg on wereg kweleg, bigalem folfalik on tanggal satu wereg kweleg Tuhan en ele Nabi Hagai fene en hweag-esebag. Wene dukwag ulug Tuhan en ebag on aire hun Sealtiel amloho Zerubabel ap homi Yehuda on fahet gubernur welatfag on ai mel, hun Yozadak amloho Yosua ebe Imam Agung welatfag on ai mel en dukwag ulug hweag-esebag.

² Tuhan Along humon wereg on anyo en Hagai fam hweag-utuk kwit de, “Ap homi enunggul unuk au en uruk kwit de, o Tuhan Obam anyo nikangge wuruhuk on de li owan deg uruk” ulug hweag-etfag.

³ Airoho ebagdeg nikangge at Hagai fene en Tuhan en it omaliki etmano fam uruk kwit de,

⁴ “Yaho nomaliki, hit de henobam mun omamneroho wirigmu hambuk deg on fene wereg ale li mun aik waharuk kweleg welahep, famen de An Nobam anyo re o meiyaleg neg kabog laharukmu olun deg kweleg famen airoho deg lahep oma?

⁵ Hit henebe deg lahep ale eta furobahat dakiek!

⁶ Hiren anggen a humdoho folduhup famen de anggen yihig we dorangge neg bal-dauk kahep. Hit henangge nauk on wereg famen de henahummu homo henobahauk fug ale atuk. Hit henahan anggur ahaik wereg famen de, hit henendama homo henobauk fug ale atuk. Hit henasum wan-dalug lahep famen de henahap fam ahanhan henobahauk fug ale atuk. Ne, hit ap yabuk duruk henap onggo og-esaukmu hwelauk kahep on ohore etano fam higitdoho henoluk welam fug ale atuk ai.

⁷ Ai indip keroho fam atuk ulug de fureberuk kahep a?

⁸ Ketia re dom-dom kwe lahaik lalug de e mininggoho An Nobam ai wiriek. Ai fam de An oho nahayeg hahuk ne ap homi en de An napne wauk kam aleroho napuk kamuhup. Hit henebe deg lahep ale eta furobahat dakiek.

⁹ Hiren de anggen yihig humdoho bal daul ulug henenda beg-beg uruk men de we dorangge neg balduk kahep; airoho baleg henobam walug waharuk kahep famen An den fun esauk kahimu hol en firulug lauk. Nunggwelug airoho duruk kahi boruk kahep? Aire An Nobam anyo o meiyaleg neg kabog laharuk kwit wereg kweleg hit henebe henemu domog en henobam wereg ma wit-dauk kahep ai fam duruk kahi ai.

¹⁰ Ai fam de osit wam fug eleg angge neg wereg ma re hiren yaho foruk kahep angge eke wilipuk fug ai.

¹¹ An den de kwenang fam nim, dom-dom kwe inim, gandum yabuk yaho kwe inim, anggur, zaitun yabuk yaho kwe inim, o kwenang suma fam di angge su angge wilibig on fene inim, ap homi inim, di on su on hiren endag-dauk kahep on fam inim iringgoho bug lelog deg lamag ulug deberihik ai” ulug hweag-etfag.

Ap homi Israel on en Tuhan en ebag on holoho debag wene

¹² Airoho ulug hweag-esebag ma at Zerubabel mel, Yosua mel ap homi Israel on abirangge sabu hetdoho o Babel hwik enebik lebagman sombandoho watfag on omano mel en at Hagai Tuhan en yonggo angge mondorik watfag on anyo en hweag-esebag ale etmano holoho debag. Iren de Tuhan fam enakol bebagdeg de Tuhan en diroho diyug airoho diyug ulug hweag-esebag on etmano holoho debag.

¹³ Airoho debag ma at Hagai en ap homi etmano fam de, ‘Tuhan en henalong baloho hwal-henepuk karuhuk ulug abug isi’ ulug hweag-esebag.

¹⁴ Airoho Tuhan en at Gubernur Zerubabel mel Imam Agung Yosua mel, ap homi sabu hetdoho hwik enebik lebagman sombandoho watfag omano abirangge mel en de Tuhan Mun Along wereg on it enakni Allah anyo Obam wurukwag ulug enendama debag.

¹⁵ Airoho debag ma re it anyo bigalem folfalik on wereg kweleg tanggal dua puluh empat fam at Raja Darius ebe melal-enepuk kwit weregman neg de tahun bireneg on wereg kweleg yabuk o anyo wutuk ale fahet indip debag.