FILIPI 1 - ALLAH WENE FANO WENE

¹ Hit Kristus Yesus hinim hun-atuhup on, Allah omaliki o Filipi welahep anyo nim, Allah omaliki fahat-enesug lahep on omano inim, ap let-enepuk on omano inim, an Paulus namloho Timotius ninim Kristus Yesus amingming angge welahe on anyo en, wene eke hweag-hesakohon.

² Nenakni Allah Tuhan Yesus Kristus nim enenda hundig en og-heseheg, henenda seroho fano welamuhup ulug, henebeheg, duruk kamag.

At Paulus en enobahet somban uruk katfag wene

³ An henobam nenda hundig ebetuk kwit, nakni Allah dang-duruk kahi.

^4-5 Somban uruk kwit, o atam en bekit ketia huli fano wene hit nim higitdoho dil noruk kahep anyo ebet-atuk halug, nenda nahayeg boruk kwit, henobahet dang-duruk kahi.

⁶ “At Allah en fanoap henebuhuk ulug, atam indip disi huli anyo en, henendama henepuk kweleg neg, o ahae fotog Yesus Kristus waruhu,” ulug, an demdoho boruk kwit hweag-hisihi.

⁷ An ketia sabu hetdoho wereg kweleg inim, atam nawene balukwag ulug, unduhuk nobahausa ma, Fano Wene mun hambukdoho welamag ulug, hweag-esauk kweleg inim, hit fotog-neauhup fug mu, Allah en nelaheg boruk kwit, unduhuk nobahasi anyo, “Hat ninim higitdoho duruk kamul,” ulug, duruk katuhuk anyo fam, hit an nenda mun hundig welahep ma, henobam nenda ebet-atuk halug, nenda nahayeg wereg lit, henobahet Allah dang-duruk kam ale neg napuk.

⁸ At Kristus Yesus en, “Nomaliki e!” ulug, henelaheg boruk kwit, enda hundig henepuk anyo hag, an oho, “Hit ninim nenenda hundig welala e!” boruk kahi ai, Allah oluk.

⁹ Hit di wene su wene indip furoho heneluk aheg, ne, henenda weregdoho wereg lit, Allah henenda hundig deheg, it hinim wereg anyo henenda hundig enebeheg, duruk ale, ekenim humdoho duruk kamuhup, ulug, henobahet somban uruk kahi.

^10-11 Hit duruk kamuhup en henobahet somban uruk kahi anyo, hit higitdoho duruk kahep halug, di angge su angge abut bale folug, ebe on halug neg, duruk kamuhup. Duruk kamuhup mu, Kristus waruhu li em Allah unuk motdeg leho welamag ulug, e anggen ebe on yihil lauk hag, Yesus Kristus en henepuk kweleg, fano neg duruk kamuhup anyo fam, il hesahureg, “Hit siag duruhup fug. Fano neg duruk katuhup,” ulug, ele henobam henobahaku fug.

Noluk welaruhuk halug ai re, Kristus obahet neg hweag-esebag wene

¹² Yehei, nori, nerekwi. An napswa anyo fam Fano Wene mun saha isi mu, heneluk amuhup ulug, hweag-hisihi.

¹³ An sabu hetdeg welahi su fam, it ap enenuk bogdeg enautsi abirangge anyo nim, it ap hesangge on abirangge nim, “Paulus en Fano Wene hweag-isil noruk katsi fam sabu hetdeg wereg,” ulug, eneluk atsi.

¹⁴ Ne, nenori foma humdoho anyo, Allah wene hweag-isil noruk ale enakol boruk katswa famen, an sabu het-napswa anyo fam enambong se atuk kwit, enekol eleg angge hweag-isil noruk.

¹⁵ It foman, “Nit oho nenele holduk kamag,” ulug, enerim napuk kwit, “Sebele foruk kamul,” bolug, Kristus wene hweag-esauk famen, it foman neg de enenda fano fam hweag-esauk.

¹⁶ Wene Fano Wene Kristus en hweag-nitsi wene anyo, hwaloho hweag-esauk kamag ulug, Allah en unduhuk nobahasi enelukdeg ma, ninim nenenda hundig wereg lit, hweag-esauk.

¹⁷ Ne, it foma anyo en neg de, enenda fano fam Kristus wene hweag-esauk fug. Ite, “An den uruk ale neg holukwag,” ulug, an sabu hetdeg kweleg, anggin ekenim nobam foukwag ulug, enenda hape boruk kwit, hweag-esauk.

¹⁸ Airoho il noruk halug, ai oho fano neg. It enenda hapereg lit, hweag-esauk ane? Enenda fano fam hweag-esauk ane? Ai Kristus wene neg hweag-esauk mu, “Fano neg,” ulug, nahayeg boruk katihik mu, ketia oho, nahayeg at boruk kahi.

¹⁹ Hiren nobahet somban eheg, Yesus Kristus Aheime anyo en nenda aho ware nobahakeg, duruk ai fam fisela-nabuhup nolukdeg lit, nahayeg boruk kahi.

²⁰ An duruk kamag ulug unduhuk nobahasi anyo, foma duruk kahi fug halug, nenggali ware nobaharuk ale nerim deg ma, “Yehei,” bolug, an nebe fam Kristus leho foruk kahi anyo, ketia higitdoho boruk kwit, waratuk halug, noluk welaruhuk halug, “Fano neg,” ulug, nakol eleg angge wereg lit, “Hweag-isil noruk kale e,” ulug, nahayeg boruk kahi.

²¹ Noluk welahi ale halug ai re, Kristus obahet neg. Ne, wararuhuk halug ai, an eke hwelak lahuk en.

²² Ai famen, noluk welaruhuk halug, Allah wene hweag-isil noruk fam eke anggen yihig fesouk angge fahet dihi ha no, katukdoho, “Waraik a? Noluk welaik a?” ulug, momal-da ale re, siag.

^23-24 An Kristus ninim welaruhuk ai fano neg boruk kwit, kwenangma suma embeselug, “Kristus ha lele ahi!” boruk kahi famen, hit hinim wereg lit, henepuk ale eke wereg neg en, nenda mun biren-baren napuk, nori, nerekwi.

²⁵ Ai fam henebuhuk ale eke wereg berihik mu, hit demdoho boruhup anyo fam henenda wirik atuk kwit, henenda henahayeg boruk kamuhup, ulug, hinim welaruhuk boruk kahi.

²⁶ An wilibi nobaharuk mu, henekit waharuk nealug, henenda henahayeg humon boruk kwit, Kristus leho fohup ulug, noluk wereg lit, henesa waruhuk boruk kahi.

²⁷ An suma wereg kweleg a, etma hesa waharuk nealug a, hit Fano Wene wauhup anyo fotog-ha fug angge, henenda misig atlug, hambukdoho wereg lit, dil noruk ale holuhuk en, Fano Wene Kristus en hweag-nesasi anyo, hit furoho neg dil noruk kamek.

²⁸ It hinim minggirig welahep anyo henekol bouk fug. Henakol eleg angge noruk ai fam, it hinim minggirig welahep anyo en, “Ohuk! It demdoho uruk mu, nit neg de, elehapdoho nenobahaku hihi,” ulug, uhup. Ne, hit neg de, Allah en demdoho henahap wendat-henepsi heneluk amuhup.

²⁹ At Allah en henelaheg boruk kwit, duhup ulug wenggelfag anyo re, hit henenda Kristus fam dip-debelug demdoho bohup, ulug, neg wenggelfag fug. Ite, at ele wauk fam anggin-fanggin inim hahup, ulug, wenggelfag.

³⁰ Siahap biahapdoho nobaharuk kweleg, Allah wene eleg am no ulug, hundig hweag-esauk ale neauk katuhup anyo nim, ketia napswa ale deg kweleg, nambong seroho wereg lit, dil lauk kahi ale holduk kahep ai nim, hit ninim higitdoho duruk kamul.