EFESUS 6 - ALLAH WENE FANO WENE

Ap omalik hwelani omalik en enaknisi enisingasi inim duruk kamuhup wene

¹ Ap omalik hwelani omalik yei. Henisingasi henaknisi enele hweag-hesauk halug, hole folug, duruk kamuhup ale anyo re, Allah en at wenggelsi mu, furoho duruk kamek.

^2-3 Allah en wene melaloho feseruk kwit, “Henisingasi henaknisi enalong boruk kwit, enele furoho holduk kamek,” ebagdeg ai en, furoho hole folug duruk hesalug, ekenim henebuhuk ebag ai, “Kwenangma suma henebe fano welamuhupdeg, mun sobal konu atlug waramuhup,” ulug, ebag ma, henisingasi henaknisi enele furoho hole folug, duruk kamek.

⁴ Hit henomaliki wereg on halug, enenda enolok am no ulug duk fug. Ite, Allah wene mutlug lauk kamag ulug komo-enebeheg, Allah wene hweag-eseheg, duruk kwit, kul-enepuk kamek.

Enamingming angge enaknisi nim duruk kamuhup wene

⁵ Hit ap homi enemingming angge welahep halug, “Nakni su Kristus hag deg ma,” ulug, Kristus obahet duruk kwit hag, henakol beheg, enalong boruk kwit, henenda fano sakoreg fam enele hole folug, enobahet duruk kamek.

⁶ Dil lauk kwit, “Enahayeg bolug, an mot-napuk kamag,” ulug, inil hanim neg duhup ai eleg. Ite, “An Kristus amingming angge deg ma,” ulug, Allah enda boruk ale anyo “Higitdoho dimin,” ulug, henenda fano sakoreg lit, debeseruk kamek.

^7-8 Nit ap homi enamingming angge welahe nim, ap homi we hesangge wereg on nim, abirangge fano dil noruk nesalug, nenakni en onggo higitdoho og-nesahu neneluk deg ma, “Su ap homi enobahet fug. Ite, Tuhan obahet duruk kahi,” ulug, henenda henahayeg fam dil noruk kamek.

⁹ Ne, hit enaknisi su yei. Hit henemingming angge wereg halug, “Nit nenakni boholma misig wereg anyo en nenamingming angge nim, enaknisi nit inim, duruk kahe onggo higitdoho og-nesahu,” boruk kwit, “Siag duruk mu halug, howatmin,” ulug, henele hape fam hweag-esa fug. Ite, it henamingming angge en, enenda enahayeg fam henobaharuk hag, hit airoho henenda sakoreg fam debeseruk kamek.

Weim yabukoho lit lik-louk duruk hag, Allah en og-hesauk fam airoho deg lamuhup wene

¹⁰ Wene mundoho hweag-hisihi mu, ahae fotogdoho eke su hweag-hesarohon. Tuhan omamne humon anyo fam, heneyog dimirebelug, henolokdoho welamek.

¹¹ At Iblis apenen lal-henebik wam no, muko wilibi fohup en, Allah en henesehen henendog angge lik-loukdoho henobahasi anyo, wauk kamek.

¹² Weim hag yapuk kwit inim hulireg lahe on aire ap homi on nim, yapuk kahe fug. Ite, omamne wereg on mel, o mummu kwenangma suma along wereg on mel, mungguat boholma noruk on mel, nim yapuk kahe.

¹³ Ai halug de hit weim mundoho yaplug henolok hambuk lele waroho kahaleg lamuhup en de henandog angge Allah en wiroho henobahasi anyo lik-louk dalug lit welamek.

¹⁴ Hinim yabuhup en lik-louk doho wereg lit, bahaluk bug-duruk hag, demdoho wene Allah airoho wereg ulug hweag-hesausa wene henendama bugdoho weheg, sing wan-duruk hag, Allah abut fano neg wereg ale wan-deheg,

¹⁵ sepatu wan-dalug lauk hag, Allah ninim seberuruk wene Fano Wene anyo fik-fouk dulug laheg, duruk kamuhup.

¹⁶ Duruk kwit de, at siag neg duruk on anyo en andog indok nonggwaleg angge hag leheik waharuk anyo, oho fahat-dauk kamuhup en, dog bei angge mapnu-dauk hag, henenda demdoho bolug, Allah obam dip-debeheg,

¹⁷ enunggul enowaruk no ulug, topi wirik on wan-dauk hag, henahap wendaruhu wene eberoho hweleheg, karog yaron wauk hag ai Allah Aheime en Allah wene og-nesasi anyo weheg, duhup.

¹⁸ Airoho kahaleg wereg lit, Allah en let-nesowag ulug, Allah Aheime en hweag-hesauk kweleg, bale fouk fug angge Allah heng-deheg, kungguk duk fug angge heneluk wereg lit, it demdoho bousa on Allah omaliki enobahet somban eheg, duruk kamek.

¹⁹ Hiren somban airoho uruk kwit, an oho Fano Wene heraho welatfag anyo hweag-isil noruk kamag ulug, Allah en eneko unduhuk nobahasi famen, sabu hetdoho kwelabe nobahausa ma, suma wereg lit, nakol en nele bok welaruhuk ai re, eleg.

²⁰ Ite, wene anyo hweag-esahuk ulug, duruk kweleg, Allah en, “Airoho hweag-esakin,” ulug, hweag-nutuk halug, nakol bouk fug angge nele seroho fagdoho hweag-esauk karuhuk ulug, it Allah omaliki abirangge enobahet somban uruk kwit, an nim nobahet somban uruk kamek.

Ambiangma dang-enepfag wene

²¹ An nenaut nenda hundig on Tuhan eyabuk furoho duruk on Tikhikus anyo en, an nebe keroho wereg lit, duruk kahi wene anyo, abirangge heneluk amuhup en, hweag-hesa waruhu.

²² Heneluk amuhup en henekit mondorik waruhuk mu, waruhureg, nit abirangge nanggoho welahe ale hweag-heseheg, henenda aho ware henobahakeg, dik waruhu.

²³ Hit nori, nerekwi, Allah omaliki abirangge demdoho bolug, henenda hesangge fano misig sebereg wereg lit, nelaheg helaheg boruk kamuhup ulug, nakni Allah Tuhan Yesus Kristus ambieg en henobahakeg,

²⁴ ne, hit Tuhan Yesus Kristus henenda hundig anyo eleg am fug angge, mun hundig wereg hesalug, henelaheg boruk kwit, fahat-henesug laheg, duruk kamag ulug, henobahet somban uruk kahi. An Paulus en mundoho hweag-hisihi, nori, nerekwi.