EFESUS 5 - ALLAH WENE FANO WENE

Allah omaliki o seleg fam dil lauk wene

¹ Nori, nerekwi. Hit Allah omaliki henakni enda hundig on welahep ma, at duruk hag, hit higitdoho dil noruk kamek.

² Ap homi enobahet Allah owam waroho indok yalduk men, at Allah en amben sang-halug, ahayeg boruk hag, at Kristus henelaheg besireg, “Enobahet waratmin,” ulug, henobahet waratsi fam Allah ahayehap debesi hag, hiren nelaheg helaheg boruk kwit, at eke fanoap debeheg duruk kamek.

³ Hit demdoho boruhup on ai Allah omaliki famen, homi fam neg henenda dipdeg lit, hesangge-besangge enebil laheg, hit henenda wenggeluk fug angge siag on neg hesangge dil laheg, nenda nenda beil laheg, duruk kahep halug, it ap homi foman, “Allah omaliki famen, siag duruk su esakiek,” ulug, wene henobam dopno-hesa ale siag deg ma, duruk ai on mundoho duk fug angge welamek.

⁴ Homi enebug neg il laheg, enenda wenggeleg eleg angge hesangge il laheg, enenda homi fam neg dipdeg lit, maheag il laheg, duruk on ai mundoho uk ale siag deg kweleg, il noruk mu, hit Allah omaliki halug, airoho uruk mun ousa. Ite, Allah unuk neg leho foruk kamek.

⁵ It homi fam neg enenda dipdeg lit, hesangge-besangge enebil lauk on mel, enenda homi fam neg ebereg lit, enenda wenggeluk fug angge siag on neg hesangge dil lauk on mel, it nenda nenda beil lauk kwit, Allah obalma di angge su angge leho feil lauk on mel, Allah Kristus inim en enomaliki enapma feseruk kweleg, ap ai on duruk on enapma fesehup mun eleg ma, fureberuk kamek.

⁶ It Allah wene sahaloho folug, siag ai on dil noruk halug, Allah olok enobam feseruk mu, it hesangge enapelegdoho wereg anyo en enele ahalue ik dep-dep waharuk kwit, lal-henebuk no fureberuk kamek.

⁷ It ap airoho uruk on anyo re, hit hinim hun-dahup ousa.

⁸ Hit atam o mumdegma welatuhup famen, ketia Tuhan en seleg apdoho henobahasi mu, at omaliki o seleg fam wereg lit duruk hag, hit airoho dil lauk kamek.

⁹ E anggen yihil lauk hag, it seleg fam wereg lit, dil lauk ai, enenda sakoreg fam ap homi fanoap debeseil laheg, siag duk fug angge Allah uruk ale higitdoho dil laheg, enenda biren fug, misig wereg lit enele demdoho neg il laheg, duruk mu,

¹⁰ hiren, “An dimin boruk kahi su, Allah enda boruk ale higitdoho dimin ane?” ulug, furebelug neg, Allah omalik seleg fam wereg lit, duruk hag hit airoho dil noruk kamek.

¹¹ It ap o mum fam wereg lit, ebe eleg kweleg, alemaroho on dil noruk on anyo, hinim seberoho dil la fug. Ite, hummen enenggali ware feseruk kamek. (

¹² Iren herako duruk ale dindiluk ale oho nenenggalireg famen.)

^13-14 Ap eke en uruk kwit, “Yaho yei. Hit nohoruk kahep anyo heneluk amek. Heneluk atlug, it ap homi mun wareg wereg anyo, enenggelegman wilibik waharuk halug, Kristus en selehap henepmisi,” ulug, isi wene ai, esahe fisatuk halug, di angge su angge o mumdegma wereg on enameg hauk anyo hag, it ap herako duruk anyo hummen enenggali wat-enepuk halug, “Ap su enebabut airoho wereg ma, esehe” bolug, ukwag ulug, isi hehe.

^15-16 Aireg ma, hit dil noruk kahep anyo, mun furebelug dil noruk kamek. O su li em ap homi en siag neg amuroho duhuk enenda wenggelduk mu, henenda eleg we hesangge dil lahup ai ousa. Ite, henenda mun wereg lit, “Ketia fano duruk on eke au iyale aha ma, dimin,” ulug, dil noruk kamek.

¹⁷ Henenda sohouroho hag henenda eleg hesangge dil noruk kam fug. Ite, Tuhan en duruk ale wenggelsi anyo neg furebelug, dil noruk kamek.

¹⁸ E anggur anggen ahalue homoroho nalug wenenebo dil lauk men, siahap dehep ha no, embeselug, Allah Aheime en neg melal-henebukwag ulug, duruk kamek.

¹⁹ Ne, hit hit henenda mun henahayeg fam nenowe unuk mot-duruk kwit, Allah debag ale furebelug felaleg suni mazmur nim, Yesus disi fam mot-duruk suni nim, Allah Aheime en debeseruk kweleg felalduk suni nim, abirangge uruk kamek.

²⁰ Uruk kwit, di angge su angge humdoho nenepuk anyo fam, Tuhan Yesus Kristus unuk yiko, nenakni Allah dang-duruk kamek.

Ap enohwesi nim duruk kamuhup wene

²¹ Kristus along boruk kwit, henenda sebe ulug, napma hapma welamek.

^22-23 Hit homi su yei. At Kristus amu en nit Yesus omaliki di o su o welahe on, nenahap wendaroho at ebe misig amag ulug, hunduko nenobahasi mu, nenenggul hag Kristus wereg anyo hag, hit homi henenggul hag de henehunsi ai. Aireg ma, hit henehunsi oho on en, “Nenehunsi enapma sebe ulug welahe halug ai, Tuhan apma sebe ulug hag welahe,” ulug, boruk kwit, henehunsi enapma sebe ulug, welamek.

²⁴ Ne, Yesus omaliki di o su o welahe anyo re, Kristus apma wereg lit, ele holduk kahe anyo hagdoho, hit homi airoho henehunsi enapma mundoho sebe ulug wereg lit, it enele neg holduk kamek.

²⁵ Ne, hit ap su yei. Hit henohwesi wereg halug, Kristus en nit Yesus omaliki di o su o welahe anyo enda hundig boruk kwit, “Enobahet waratmin,” ulug, nenobahet waratsi anyo hag, hit henohwesi airoho henenda hundig boruk kwit, fanoap debeseruk kamek.

^26-27 Nit Yesus omaliki di o su o welahe on nenobahet waratsi anyo re, “An nomaliki horeg eleg angge enebe nong-hongdeg angge hwelahuk de, nerim. Ite, enebe mun horoho amu eneg angge mun fano angge hwelahuk,” ulug, ikma belap-nenebeheg, at ele wauk kahe fam nenesiag elehapdoho feseheg, duruk kwit, Allah obahet eneko nenobahaukwag ulug, nenobahet waratsi.

²⁸ Hit ap henebe henenda hundig dauk kahep anyo hag, henohwesi airoho henenda hundig enepuk kamek. Ap eke ohwe enda hundig boruk halug, at ebe enda hundig dauk. (

^29-30 Kristus enggik eyog hag nit deg ma, at Kristus en at omaliki di o su o welahe anyo, enda hundig nenepuk kwit, kul-nenebeheg, hwal-nenebeheg, duruk hag, nit ap en nenebe ai nenerim boruk kahe fug. Ite, nenebe nenenda hundig dauk kwit, hwal-dauk kahe.)

³¹ “Aireg ma, ap eke en akni isinga embeselug, ohwe nim seberulug wereg lit, enebe biren famen, misig neg amuhup,” ulug, Allah en ebag ale, Allah wene fam lisu baleg wereg anyo higitdoho hweag-hisihi.

³² Allah en wene ebag anyo re, wene indip heraho hag ebag boruk kwit, Kristus omaliki di o su o welahe anyo ninim nangginoho hundig welamuhuk ulug, wal-heheg hweag-nesauk boruk kahi famen, ai neg hweag-nesauk fug.

³³ Ite, hit ap henebe henenda hundig dauk kahep hag, henemu hundomog henohwesi enelaheg beheg, ne, hit homi anyo en henehunsi enalong beheg, duruk kamuhup ulug, hweag-nesauk boruk kahi.