EFESUS 2 - ALLAH WENE FANO WENE

Wareg hag welatuhuk famen, nenelugap nenobahasi wene

^1-2 Hit o endam en it ap kwenangma on enenda nauk halug, mutlug lauk hag mutlug laheg, it di mungguat su mungguat bohol apmane bulkwe su wereg on enowe ap homi Allah wene sahalduk halug, enenda kahal-enepuk on Iblis anyo en, hweag-hesauk halug holeheg, dil lauk kwit, Allah wene sahaloho folug, di siag su siag duruk katuhup fam wareg hag welatuhup.

³ It Allah wene sahaloho folug siag duruk katswa fam Allah olok enobam foukwag ulug, welatswa hag, nit oho airoho nenenda nauk halug, mutlug laheg, siag duk ale nenepuk halug, dil laheg, duruk katuhuk fam, Allah olok mun nenobam foukwag ulug welatuhuk famen,

^4-5 at Allah anyo en, ap homi siag duruk halug, olok en folo-folo enowatuk eleg mun enelaheg boruk kwit, nangno-enepuk anyo en, nit mundoho Allah wene sahaloho di siag su siag dil noruk katuhuk fam, wareg hag wereg kweleg, Allah en nenelaheg boruk katfagdeg, Kristus olugap deberuk kwit, nit oho neneluk apdoho nenobahasi.

⁶ Allah en nenelaheg boruk katsireg, nenahap wendatsi hehe. Ne, at Kristus nim hundig wereg ma nesalug, at ninim neneluk apdoho unduhuk nenobahasireg, at o boholma etmano leho wereg anyo ninim higitdoho welamag ulug, leho nenobahasi.

⁷ Ai nenepsi anyo ai, nenelaheg boruk kwit, Kristus og-nesasi ai fam, o ketia wereg inim, fobik welamuhup nim, at ap homi abirangge enda hundig en angge enggik wereg en, kabogdoho bulel-baleldoho og-esauk anyo mundoho nenelukdeg lamag ulug, nenepsi.

⁸ Hit demdoho bolug henenda at obam dip-deberuk halug, henelaheg boruk kwit, henahap wendatsi. Hit en eke dauhup fam henepsi fug. Ite, Allah en onggo eleg we henepsi.

⁹ Hiren eke dauk fam leho fahat-dehep ha no ulug, aren we onggo eleg angge we henepsi.

¹⁰ Allah en neg wal-nenepsi mu, nit at angge at welahe. Nit fano duruk kamuhup ulug, Allah en endam wenggelfag anyo, Kristus Yesus ninim hundig lit, higitdoho duruk kamuhup ulug, wal-nenepsi.

Kristus ninim hundig mu nenebe misig at welahe

¹¹ Aireg ma, nori, nerekwi. It ap homi Yahudi on en enahap balduk mu, “Nit nenahap baleg on,” uruk kwit, “Hit henahap baleg eleg on,” ulug, hweag-hesauk, hit dagma holduk eleg on endag-atuhup anyo, atam welatuhup ale henenda ebetuk kamek.

¹² Ap homi Israel on neg Allah omaliki eneg on wereg kweleg, hit atam Kristus hinim minggirig wereg lit, we ap homi bohon hag welatuhup mu, at omaliki halug, wene abug hweag-esebag anyo hit hwela fug alereg latuhup. Hit atag henakni Allah henapeleg deg lit, “San fanoap nenebuhu,” ulug, henenda ebereg eleg angge

¹³ o yatma hag welatuhup famen, Kristus amep fam Allah hinim seberoho henobahasi mu, ketia Kristus Yesus hinim hundig at welahep.

^14-15 Nit ap Yahudi on mel, hit dagma on mel, weim kahaleg lit, bul honggolegma elehet oho hag ninim minggirig welatuhuk anyo meiyaloho hwik-esamin ulug duruk kwit, nit ap nenenggul unuk biren welatuhuk anyo, at ebe fam at omaliki nenenggul unuk misig neg atlug, ninim sebereg welamag ulug, at Kristus en anggerang owam hagdoho ebe wareg fam sebe-nenebeheg, Musa fene en, “Diroho diyug, airoho diyug,” ulug, melaloho febag wene anyo fam ninim minggirig welatuhuk anyo mel, elehapdoho feheg, disi.

¹⁶ Ne, Kristus airoho e salib fam waratuk kwit, ninim minggirig welatuhuk anyo elehapdoho folug, nenebe misig sebe nenobahasireg, ai en, hit ninim sebereg welamag ulug, Allah apma nenobahaik wahasi.

¹⁷ Ai fam Allah ninim sebe-nenepmin ulug, Kristus wahasireg, hit yatma hag welatuhup anyo nim, nit horogma welatuhuk anyo nim, “Anggerang owam mun wareg ma, seberiek,” ulug, hweag-nesasi.

¹⁸ Ne, ketia Kristus disi ai fam, nit Yahudi on mel, hit dagma on mel mundoho, Allah Aheime misig inim sebereg lit, nenakni Allah horog aik la ale fano atsi.

¹⁹ Ai halug, nori, nerekwi. Hit ap bohon kubil on hag welahep fug. Ite, hit ninim higitdoho demdoho boruk fam Allah omaliki o youwa misig on hag deg lit, ninim seberoho Allah eyog indip kwe wereg on welahep.

²⁰ Ne, o wituk kwit, atam anduli belabe folug, o ebe bug-bagdoho wutuk hag, it eke en helep fam o wituk halug, helep oboule atam doalduk anyo hag, ebe re Kristus Yesus at. Ne, o ebe witil laharuk hag ai, it mon-enepsi on rasul inim, it ap Allah en hweag-esauk kweleg, hweag-esauk katfag on nabi omano nim, iren wene hweag-nesauk kweleg, demdoho bolug wauhuk on nit nenebe at.

²¹ Ne, Allah en at obam amu eneko fano neg wit-dahuk ulug, nit nenebe amu amu anyo oko Yesus Kristus ebe misig fam dip-debelug, obam louk-louk witil laharuk kwit,

²² hit oho, Allah ebe hag Aheime hinim welamuhup ulug, hit henebe anyo oko Kristus fam hundi henobahalug, at obam hag wit-dauk kwit wereg.