DANIEL 6 - ALLAH WENE FANO WENE

Daniel ebe singa weregma kwenang habuligmu belapfag ale

¹ At Belsyazar anyo mundoho ware febag ma, Darius obam Media on anyo en takhta raja hwerieg welatfag ma anyo sebelfag. Eta li em at ebere umur enam puluh dua tahun en deg li em debag.

² Airoho debagdeg de Darius en kerajaan anyo yohwandoho re seratus dua puluh propinsi en debebagdeg o etma domog ap gubernur en melal-enepuk kamag ulug unduhuk fesebag.

³ Daniel inim ne ap biren eke nim de it ap gubernur etman raja laleg hal ale duruk kam no ulug furebeseruk kamag ulug unduhuk fesebag.

⁴ Airoho fesebag ma weregman de yabuk it ap gubernur en duruk on mel, ne ap inil furebeseruk kwit wereg on omano fomane en duruk on mel sebeleg hag deg kweleg, Daniel en duruk on neg de mun fanoreg latfag. Ai fam de raja en de at Daniel ebe kerajaan ai fam along wereg on welamag ulug unduhuk feikoho debag.

⁵ Famen it ap gubernur mel ne inil fubi debeseruk kwit wereg on mel etmano en Daniel en melal-enepuk wereg lit kwasikdoho duruk ale ulug hera debag, famen Daniel de at yabuk dipdoho deheg, bekitdoho deheg, ne eke salim deheg, bok aheg duk fug angge welaheg, ne siag ale on eke duk fug angge welaheg, duruk katfag ma re iren eke hebag fug.

⁶ Airoho debagdeg iren uruk kwit, “Niren at Daniel duruk ale re aren on apne wauk on fahet duruk ale neg de siag on eke durukmu hauk kahe” ebag.

⁷ Airoho ebagdeg fobik en it anyo raja wereg ma olukap dukoho enebe abirangge ambine lebagdeg hweag-utuk kwit, “Nenakni Raja Darius, hat hebere holuk mundoho-mundoho welaruhun!

⁸ Nit mundoho nenakni haren kerajaan au fam hwalduk kahe on mel, inil fureberuk kwit wereg on mel, it gubernur mel, ne gubernur enapma wereg on mel, ap yabuk on fam duruk on mel en nenele seberoho marehereg de, nenakni haren wene melaloho wilipuk kwit ap homi abirangge en surat ai holoho dukwag ulug wilibuhun en ulug hweag-hutuk kahe. Nenakni haren wene melaloho foruk kwit de nukoho tiga puluh en eta fam de ap misig en oho eke dewa misig eke fam oho ne ap fam oho heng angge heng uhup fug, we nenakni hat hamu hobam neg heng uruk kamuhup. Ne, ap eke wene melaleg ai sahale folug duruk halug, ap aire singa wereg ma kwenang habuligmu etma belabuhup ulug melaloho wilibin.

⁹ Nenakni haren airoho duhup ulug melaloho wilipmihin on aire o Media nim Persia nim fam etma wene diroho diyug suroho diyug ulug indip melaloho welamagdoho fohupmu re ap en owag loluk fug alereg lamagdoho re nenakni hat henggik eneg angge femihin en heng-hapuk kahe,” ulug hweag-etfag.

¹⁰ Airoho hweag-etfag ma Raja Darius en surat wene melaleg anyo enggik eneg angge febag.

¹¹ At Daniel esanggo holduk men de debag ale anyo fahet holfagdeg de at anyo obam olma lebag. At obam ai ambe ambolma on aire o jendela re alukwe o Yerusalem fil yendeg latfag. Ma at eitogdoho re aren akni Allah anyo nukoho misig fam de enggik henahanam fam jendela ele husig on alukwema etano elenggen dimirebelug mot-duruk katfag.

¹² It Daniel aselei on etmano inil hauk men de at Daniel de akni Allah fam somban urukmu hebagdeg,

¹³ at Daniel duruk ale anyo fahet het dulug kul ulug raja wereg ma akit lebag. Lebagdeg iren uruk kwit, “Nenakni haren surat fam wene melaleg bale folug henggik eneg aleroho wilibi foruk kwit de, ap homi abirangge en de nukoho tiga puluh en eta fam de dewa misig fam oho, ne ap fam oho eke heng angge heng uk fug angge we nenakni hat hobam neg heng uruk kamuhup ulug wilibi ferihin fug no a? Ne, eke re ap homi eke wene melaleg ai sahale folug duhup halug de singa wereg ma kwenang habuligmu etma hwik-esa wambuhup irihin fug no? Irihin neg,” ulug hweag-etfag. Ai ebag ma raja en ele onggo uruk kwit, “Demdoho wene melaleg aire o Media mel Persia mel fam oma diroho suroho duhup ulug melaloho ferihik mu re ap en owag loluk fug alereg” ulug ebag.

¹⁴ Ai ebag ma iren raja fam uruk kwit, “Nenakni, hun Daniel o Yehuda on en sabu hetdoho hwik-enebik wahausa on misig anyo en de, nenakni hat fu hobahauk fug angge deheg, ne aren nenakni haren wene melaleg aire maben hag beheg, disireg de, aren hundig-handig somban nukoho misig fam de enggik henahanam uruk” ulug hweag-etfag.

¹⁵ Airoho hweag-utuk mu holfagdeg raja anyo enda hesilduk kwit enda fitfagdeg aren Daniel ahap wendatmin ulug wenggelfag. Airoho wenggelduk kwit neg weregman o hupmu atfag man ohore raja anyo meneni ebetuk kwit neg welatfag.

¹⁶ Ai en it ap etmano nikangge raja wereg ma watfagdeg enele uruk kwit, “Nenakni, hat henda wenggel-hauk kwit de o Media mel Persia mel fam wene diroho diyug suroho diyug ulug melaloho wereg on anyo fam de raja en wene melaloho wilibi foruk on aire aham duk fug alereg ulug wereg anyo,” ulug hweag-etfag.

¹⁷ Airoho ebagman ambiangman neg de raja en Daniel ebe senetlug de singa wereg ma kwenang habuligmu etmano belabukwag ulug hweag-esebag. Ai en raja en Daniel fam uruk kwit, “Hat hakni Allah obam dipdoho apne wauk kahen on ai en neg hahap wendat-habukwag” ulug hweag-etfag.

¹⁸ Airoho hweag-utlug de Daniel ebe kwenang habuligmu belabe folug helep humon misig eke kwenang habulig anyo elma febagdeg, raja en helep anyo fam cap kerajaan on mel, cap ap kaindeg en on mel de ahalue somug hag on fam enenggik eneg ale folug lare febag ma re, ap misig en ulug oho Daniel anyo singa etmano ambilikmen deloho wilibuk fug aleroho debag.

¹⁹ Airoho dulug de raja anyo ebe wereg ma obam lebag. Lebagdeg aren asiburu mel ahaik mel na fug angge wereg lit at endama ahayegdoho ulug duruk ale oho erimdoho welatfag. Ne, hup anyo salim de at ebe nohouk fug angge welatfag.

²⁰ Airoho welatfagdeg o hubet-habet de raja inatfagdeg daleag singa wereg ma kwenang habuligmu etmano lamin ulug lebag.

²¹ Lebagdeg etano aik lebagdeg, ele wareg fam hwiruruk kwit, “Daniel, Allah oluk mundoho wereg on amingming angge a! Hat hakni Allah haren obam dipdoho deg lit apne wauk kahen on anyo en de singa enambilikmu etman hat hahap wendat-habeheik a?” ulug hwirebag.

²² Hwirebag ma hol-hauk men Daniel ele onggo uruk kwit, “Nakni hat hebere holuk mundoho-mundoho neg welamuk!

²³ An hamingming angge nakni Allah anyo en de singa omano enambilik larukwag ulug malaikat mon-enebik waha ma re, iren an diroho suroho ulug oho nobahakesa fug. An den nakni Allah fam inim nakni hat hebe fam inim siag ale eke dirihik fug ale aire Allah oluk deg ma re, Aren an hamingming angge nahap wendat-nabeheik,” ulug hweag-etfag.

²⁴ Airoho urukmu holfagdeg raja anyo enda ahayeg mun hum aleroho debagdeg, aren Daniel anyo singa wereg ma kwenang habuligmu etmano en wilibi feik wamag ulug mingming enepfag. Airoho ebag ale anyo debagman de, at Daniel ebe Allah fam enda demdoho borukmu atlug de at ebene yebil angge ulug oho eke welatfag fug.

²⁵ Ai en raja en de ap Daniel fam wene obam dopno hebag enap etmano sen-enebukwag ulug mingming enepfag. Sen-enepfag ma re it anyo enohwesi mel, enomaliki mel seberoho re singa wereg ma kwenang bohwe habuligmu anyo hwik-enebik wambebag. Hwik-enepfag ma re it enebe singa wereg ma kwenangma erahamuno aik wambuk fugmen de singa omano en it etmano senggel-enepfagdeg enowag luluhun esebag.

²⁶ Anyo airoho dulug de raja en surat ap di enunggul unuk su enunggul unuk fam inim, enunggul domog fam inim enele domog fam inim o kwenangma mundoho omano baloho mondotuk kwit, “Henenda seroho welamek!

²⁷ Ap homi wilayah kerajaan an den melal-enepuk kahimu au fam welahep on abirangge en de Allah at Daniel en apne wauk on anyo fam henakol bolug leho foruk kamek! At aire li mundoho-mundoho etma Allah oluk wereg on, O ahae fotog huli ohore At de melal-enepuk kwit neg welaruhu. Kerajaan Aren on aire elehap aruhu fug, Ne, At along wereg on aire mun eleg aruhu fug.

²⁸ Aren neg ap homi enahap wendat-enebeheg, ne fiselaroho wilibi feseheg, duruk, Aren neg boholma inim kwenangma inim, along on deheg, duk fug ale on deheg duruk. Daniel de Aren singa ambilik elman ahap wendaroho wilibi feik wahasi” ulug wene wilipfag.

²⁹ Airoho ebag ma re Daniel anyo hun Darius en melal-enepuk wereg li em nim ne Koresy obam Persia on ai en melal-enepuk wereg li em nim de, eyabuk lehoma on neg wereg latfag.