AMOS 6 - ALLAH WENE FANO WENE

Israel luluhundoho eleg amuhup ebag wene

¹ Hit o Sion etma henahayegdoho wereg lahep on etma mel, ne hit en boruk kwit de nit Samaria suma lombukdoho welahe boruk kahep on mel, henamelmel boruk kamek. Yaho hit henunggul unuk Israel on enowesi kaindeg-kaindeg memeroho welahe boruk kahep on yei, hit de ap homi holduk on en hiren let nenebukwag ulug henobam waharukmu welahep on etma henamelmel duruk kamek.

² Hit henebe o Kalne lahupdeg ha lakiek, ai en bekit o Hamat kota hummu etman dulug, de o kota Gat Filistin on enobam etma lakiek. Hiren boruk kwit o etma re fanoreg ma kerajaan Yehuda on en mel Israel on en mel etma fano boruk kwit duruk kahep a? Ne, wilayah iren on de healegma wilayah hiren on de dotdeg a?

³ Hiren boruk kwit, nukoho siag on nenobam aik waharuk alere owan deg boruk kahep famen de, hiren duru kahep ale etma fam de nukoho mun olok hapereg on ai folo-folo waikoho horog atuk ai.

⁴ Hit nohoruk angge mun ebe on fam nohoruk kaheg, soni wam sapi ino domba sauwe on ino fam esetlug nenggeg-dauk kwit, henahayegdoho wereg lahep on etma henamelmeldoho welamek!

⁵ Hit de Daud en duruk katsi hag hiren oho suni felalug suni omano no kecapi kong-duruk kwit wilipuk kahep.

⁶ Hit ik anggur ahaik ikwag gelas ele sopdoho hwenangguruk kwit nauk kahep, ne hiren ahalue amben fano on aro dalug duruk kahep famen de Israel mundoho siag atuk ale anyo fahet henenda wat-dauk kahep fug.

⁷ Airoho duruk kahep ale ai fahet de hitdam hele wareg kwik henebik lahup. Airoho duhupmu re hiren soni esetuk kahep on mel osoho folug misigmu nauk kahep on mel etma ahae fotog aruhu.

⁸ Tuhan Mun Leho Wereg on mel Omamne wereg on mel en mun omamneroho uruk kwit fureboukwag ulug diroho isi, “Ap homi Israel on en leho fahat-dauk ale etma An nerim duruk kahi; Iren enobam bumbuk mun eberoho wiri fahat dalug wereg on etma nerim duruk kahi. It enobam kota indip mel abirangge ilonggoma wereg on mel An den it enaselei on fam og-esahuk,” isi ebag.

⁹ Ap homi enebe numen o misig obam heraho lamuhup famen oho re it enebe waramuhup neg.

¹⁰ Ap misig eke it enahain elekwe on ap wareg anyo salikoho are wareg anyo wag watlug wilibuhu. Walug wilipuk kwit aren ap o ai ambol fil wereg on etmano fam uruk kwit, “Hat hinim de ap homi enoluk wereg on eke wereg a?” Uruk karuhu. Airoho urukmu onggo uruk on hol-hauk men de, “Eleg!” Uruk karuhu. Ap misig it enahain elekwe en ap wareg salduk on anyo en uruk kwit, “Hele eke nim uk fug! Niren de Tuhan unuk ehe ha fug alereg.” Uruk karuhu.

¹¹ Tuhan en wene melal-enepuk li em de o wirig doron lohon mun abirangge lilibug esahup.

¹² No kuda duk helep anggen on fene buroho la alereg a? Ap en eke ik laut no sapi fam habuldil la alereg a? Duk fug alereg famen hiren de dipdoho duruk ale omano ahamdoho asig angge ap enowatuk on deberuhup, ne demdoho on anyo siag on apdeberuhup.

¹³ Hit henele werahap hauk kwit Lodebar along elehap deberuhuk uruk kahep. Ne, hiren nikangge henele uruk kwit, “Nit de o Karnaim bin kwik la ale fahet de nenomamne welahe uruk kahep.”

¹⁴ Tuhan Mun Leho on mel Mun Omamne wereg on mel amu en ele uruk kwit, “Yaho ap homi Israel on, hit henobam welahepma etma bin kwik wamag ulug ap tentara enunggul unuk amu on henobam mondorik waruhuk. Airoho mondorik waruhukmu iren hit kwe o Hamat lauk on il utara fil etman de o Araba Donggoma il selatan huli etma sebeloho henobaharuk kamuhup,” isi ebag.