AMOS 4 - ALLAH WENE FANO WENE

¹ Hit homi Samaria homi sapi o Basan fam asei hum atuk kwit wereg hag henesei hum amag ulug-dauk kahep on omano henesanggo holiek! Hiren de ap homi maben on sebeloho feselug, ap enenggik eleg on henenggik omamne fam bereloho feseruk kwit, henehunsi fam ik siomo duruk on henobahet hundig foukdoho foruk komag ulug neg mingming enepuk kahep!

² An Tuhan Mun Leho welahi on aire Tuhan mun namu eneg on welahi, An den wene abug mundoho uruk kwit, fobik de hit henebe ikan aeg fam hag lisoho henobahakukmu henebe abirangge re ikan hag aeg fam hambo amuhup.

³ Hit henebe re o Hermon fil etma lit hesahukdeg, henemu hundomog fak lehet horogma au yendeg elekwe foldong heg hwik henebik wilibuhuk. Airoho duhuk ulug An Tuhan en nele mundoho marihi,” ebag.

Israel on en holduk ale enerim deg ale en ebag wene

⁴ Tuhan Mun Leho on en ele uruk kwit, “Nomaliki Israel on yei! Hit henebe re o Betel wene kabog-duruk kahepma etmano lalug de, o etman siag duruk kamek! ne o Gilgal lalug siag henambono boruk aleroho duruk kamek! Airoho duruk kwit hiren foruk angge hubet hundig yalduk on walug laheg, ne henenggik ambiangman angge yihig balduk on en numen on furuk kahep on etma nukoho henahan debelug walug lauk kamek!

⁵ Hiren roti An nobam dang napuk kwit ulug walug feik laheg, ne hiren feik waharuk kwit eke amu on nim dopnoroho walug wahe ulug eheg, duruk ale aire hiren duruk ale fahet henahayeg alereg ma airoho duruk kamek!

⁶ An den siburu obok anggolo on hit henobam kota fam foruk kahi, famen ai fam hiren sombandoho An nakit waharuk kahep fug.

⁷ Hit heneyabukmu a yaho angge ik anggolo deg ma belabik wam no ulug An den kwe bale foruk kahi. An den osit kota eke fam belabik waharuk kwit kota ekema re embeseruk kahi. Ne, yabuk wirig misigmu re osit obam wamburuk kweleg yabuk wirig ekema re bug atuk kwit wereg.

⁸ Kota fomane re ap homi mun maben on de ik enenda ahe en duruk. Airoho duruk kwit kota amu on fam ik hera lauk famen de ik enebe ilit deg fug. Airoho hauk kwit en de hit henebe sombandoho An nakit waharuk kahep fug.

⁹ An den hol ahanhan on furik waheg, hit henangge anggur yabuk fam mel yabukmu yaho on fam mel hwerenangge mondorik waheg, duruk kahi. Henahan arah mel zaitun mel de mundoho bulue en nauk. Airoho duruk famen ohore hit henebe sombandoho An nakit waharuk kahep.

¹⁰ An den ouk amben siag on ap homi o Mesir on fam debeserihik hagdoho mondorik waharuk kahi. Hit henomaliki ap sauwe on de weim fam en mundoho enowatuk kahi, ne hit henangge kuda re ap en mundoho del-dauk. Hit henobam sabo saleg kwe etmano re wareg filik laharuk on amben en de henambiangma sang-sang uruk. Famen ohore hiren sombandoho An nakit waharuk kahep fug.

¹¹ Ap homi hiron fomane re An den ap homi o Sodom nim, Gomora nim elehap debeserihik hag debeseruk kahi. Foma hit henesahali kwe enoluk wereg on etma re, indok aro indok nauk men hesiloho foruk on hag deg. Airoho duruk kweleg famen hit henebe sombandoho An nakit waharuk kahep fug.

¹² Aireg ma re yaho hit Nomaliki Israel on, An den unggum og-hesahuk. Anggere An den hit henobam unggum og-hesahuk on ai wahup en de hit fik foukdoho welamuk,” isi ebag.

¹³ Dom mel hol mel etma Tuhan en neg waldebag; Aren duhuk ulug wene melaloho febag ale ap homi fam enam esauk. Aren neg nukoho nim hupanggo mel waldebag; o kwenangman duk-duk emberim kwe etma At lag-wag uruk. At unuk de Tuhan